Read Tobelo O KORINTUS MAHINOTOKA 12 Bible Online

O KORINTUS MAHINOTOKA 12 - Tobelo bible

O KORINTUS MAHINOTOKA 12

¹Igoungu koiwa naga mautumu mangale homahiamoko. Mä ngohiö tomau tomahiamoko o hali-o hali ma Jou Madutu wohihi mato-matokoka ngohino ma Jou aihimatoko magoronaka ekola o lolega magoronaka.

²Ngohi tinäko o Haranioka manyawa womatëngo o taongo ngimoi de iata ipahaika iwigoraka o ngï magögurutil̄e o horogaka. (Ngohi tohi örikua boteka igou-goungu airöehe igoraka ekola gënanga duga-duga o lolega moi — ma Jou Madutu dika wohiöriki.)

³Ngohi togilio tohigalioli: Ngohi tohiöriki o nyawa nënanga iwigoraka wowohama o Firdausika. (Ngohi tohiörikua boteka igou-goungu airöeheigoraka ekola gënanga duga-duga o lolega moi — ma Jou Madutu dika wohiöriki.) Dokengoka o nyawa gënanga woihene ohali-o hali o nyawa yakunua i hidemo deʼ yahigumal̄aua ö o nyawaika mangale ihidemo.

⁵Mangale o nyawa gënanga womau ngohi tihiamoko, igoungua mangale tongohi ahidiri mahirete. Imakorona tongohi ahidiri, duga-duga ihidumutu o hali-o hali gënanga tongohi ahibole-bole, i mau ngohi tohilamoko.

⁶Hohi ade okianaga moi ngohi katoigo dika toma amoko, ngohi toluku todadi kato tetemo de o demo madol̄a koiwa; ngohi aha totemo madiai. Mä ngohi tatumungu ahidiri, hupaya moiua naga o nyawa ihipulono ngohi iholoi de okia ünanga wamäkeoka ngohi tadiai ekola ünanga woihenoka ngohi totemo-temoka.

⁷Mä hupaya uha ngohi kalioli tomahilamoko karana o lolega-o lolega kabiahaua gënanga, ihihidöaka ngohi marupa o panyake ahi röehoko marupa o Ibilihi mapakakaha. O panyake gënanga i hihi döaka la ihigohara ngohi, hupaya ngohi idadiua tomahilamoko.

⁸Hara mahange ngohi tomaniatama Jouika hupaya o panyake gënanga wagoraka ngohioka.

⁹Mä o Jou wohaluhu, ”Ngohi tonidora ngona de mangale ngona gënanga iyaoaka; hababu ahi kuaha duru ikuata nako maöraha ngona nobole magoronaka.” Hababu gënanga ngohi iholoi tosanangi tohiamoko tongohi ahibole-bole, hababu öraha okia ngohi tobole, maöraha genangala ngohi tamäo o Kristus wohihohongino ngohi de aikuata.

¹⁰Hoʼ tomörene de tongohi ahi bole-bole. Ngohiö tomörene nako karana o Kristus ngohi ihidiai o romanga madorou, ngohi taohana o huha, ihi goginïki deʼ ngohi taohana o hangihara. Hababu nako ngohi tobole, maöraha genangala ngohi tokuata.

¹¹Igoungu ngohi toma diaioka hokä o nyawa bodo mä nginila nihidiai ngohi todadi hokogënanga. Demadiai ngini kiani nihihi giriri ngohi. Hababu ngaroka ngohi okia-kiaua ahibaraguna, ngohi kautuö de tokurangaua ö rasul-rasulika” kabiahaua gënanga!

¹²Ihohëra-hëranga deʼ o hali-o hali kabiahaua imanïki o manarama-manarama ilago-agomo tohimatokoka de ahi sabari nginika mangale tohimatoko ngohi o rasul moi.

¹³O hali okia magoronaka ngini niohiningaikaua, hohitotero de o jemaat-jemaat mahomoa? Kemal̄okuoka duga-duga o hali nënanga magoronaka: ngohi tinihi huhaua ngini mangale nihidöaka o tiwi. Nihiapongo ngohi, mangale o howono gënanga!

¹⁴Orahanënanga mangale mahange iböto, ngohi tomahi diai la ngohi tinilega ngini. Deʼ ngohi toluku tinihihuha ngini, hababu ngohi toigo-igo koiwa naga nginioka, mä niadiri. Karana kongohakua kiani ihi lingiri mangale o dimono manga ngol̄omo o wangeil̄e, mä o dimono kiani ihilingiri mangale o ngoha-ngohaka manga ngol̄omo o wangeil̄e.

¹⁵Karana gënanga, de ahihininga i sosanangi ngohi toigo tohi huba okia dika mangale ngini de ahidiri mahireteö. Nako hokogënanga ngohi tinihininga ngini, boteka ipatutu ngini ikuranga nihihininga ngohi?

¹⁶Aa, ngini nihihimoteke ngohi komaiwahi tinihihuha ngini. Mä naga yotemo ngohi nënanga totipu tosawaro; ngohi tamäke o utumu ngohino karana ahitipu.

¹⁷Kiaka de yakunu! Boteka i tilakuru o nyawa ngohi tahulo-huloko nginika gënanga ngohi tol̄ë utumu nginino?

¹⁸Ngohi tihulokoka o Titus woiki winilega ngini, deʼ ngohi tahuloko o riadodoto o Haranioko mahomoa gënanga yoiki imakinïki dede ünanga. Boteka o Titus wol̄ë o utumu nginino? Mä ngomi imihinoto mimanarama de miadungutu imadäene de okianaga midiai de mangëkomo imadäene!

¹⁹Yakunu idadi ngini niatobote ngomi madekana nënanga mihi dailako magogiria mimahi tatoko miadiri nginika? Ngini duru niahowono! Ma Jou Madutu wohiöriki mata-mata ngomi mitemoka gënanga ganga doka imamoteke o Kristus aimau. Deʼ mata-mata miadodiai ngomi, ganga mangale mihimomiki niarohani mawowango.

²⁰Ngohi tohawatere damä maöraha ngohi tinilega ngini, tinimäkeikaua ngini hokä okia ngohi töngano-nganono, deʼ nginiö aha nihi mäkeua ngohi hokä ngini niongano-nganono. Uha-uha damä naga nimakangamo, niahininga isanangiua niadodiawoika, niahininga ihauku, nihiamoko duga-duga niadiri mahirete, nimateke diai o romanga madorou nidodiai o gangamo, niedenge de niroruae.

²¹Ngohi tomodongo damä nako maorahoka ngohi taika ma Jou Madutu aha wohihikauku ngohi tingini niahimangoka deʼ ngohi aha toari karana niangöe niahidogoronaka ngini ihira yobaradoha, yoluku imägali yoluku imatogumu yadiai toönanga manga manarama isosafarune, i peseke deʼ i patu-patutua.