Read Tobelo O KORINTUS MAHINOTOKA 3 Bible Online

O KORINTUS MAHINOTOKA 3 - Tobelo bible

O KORINTUS MAHINOTOKA 3

¹Bote nënanga niapulono matero-tero ngomi mihigogiririoli tongomi miadiri? Ekola mudukua ngomi mioparalu o higiriri mahurata mangale ngini, ekola nginino, hokä o nyawa mahomoa yoparalu?

²Riadodoto mahirete tongomi miahigiriri mahurata, itulihi tongomi miahininga magoronaka deʼ o nyawa moi-moi yakunu ihiöriki de yabasa.

³ Onanga mahirete yakunu yamäke Riadodoto matero-tero o hurata o Kristus watulihi, wohidingoto ngomi miao. O hurata gënanga itulihua de o tinta, mä de ma Jou Madutu ai Womaha iwango-wango; koigounguaö o karatahi malokuoka, mä o nyawa manga hiningaka.

⁴Ngomi mitemo hokogënanga karana ngomi mingaku ma Jou Madutuika mangale de o Kristus.

⁵O hohol̄e kamoiö de koiwa ngomioka mangale mihimatoko ngomi miakunu miadiai o manarama nënanga, mä ma Jou Madutu womihidöaka o kuata gënanga ngomino.

⁶ Unanga womidiai ngomi mia akunu midadi o leleani mangale o jaji moi mahungi; o jaji imahigagao ma Jou Madutu ai Womahika, i goungua o tita ituli-tulihika. Hababu itotuli-tulihi gënanga iao o honenge, mä ma Jou Madutu ai Womaha gënanga ihidöaka o ngango.

⁷ Maöraha o jaji iao o honenge gënanga idiai de garade o helewoika, ma Jou Madutu aicahaya maletongo yodararono o Musa aibionika. Ma cahaya hokogënanga maletongo hiädono o Israeloka manyawa yakunua yölega o Musa aibiono, ngaroka ma cahaya aibionoka gënanga mulaengoka ihihanga öraha gënanga. Aa, nako o jaji ma manarama iao o honenge gënanga ihitatapuoka hokogënanga ma amoko mamulia,

⁸marai o jaji yadodiai ihidöa-döaka ma Jou Madutu ai Womaha, ihitatapu de iholoioli mamulia.

⁹Nako o jaji inagogelenga o hukumanga o nyawa gënanga, hokogënanga mamulia, marai iholoioli mamulia, o jaji yakunu inahigumal̄a o nyawa homateke oa-oa de ma Jou Madutu.

¹⁰Hotemo hakunu okia mahira imulia, i muliaokauaoli karana de mamulia öraha nënanga.

¹¹Nako okianaga moi itäna duga-duga öraha mahuhutulu, hoko gënanga mamulia, marai iholoioli imulia okianaga moi ikokakali.

¹²Karana tongomi miangonganono hokogënanga, ngomi mitemo mibarani hokogënanga.

¹³ Ngomi hokä o Musaua watamunu aibiono de o kukudu la o Israeloka manyawa yakunua yamäke ma Jou aicahaya magogiria i tararonokaua de ihihanga aibionoka.

¹⁴Toönanga manga dibanga itamunoka. Deʼ hiädono mawange nenangö toönanga manga dibanga kaitamunohi de o kukudu maöraha önanga yobasa o buku-buku mangale o jaji mahira gënanga. O kukudu gënanga duga-duga yakunu ipaä nako o nyawa kamoi de o Kristus.

¹⁵Orahanenangö, nako önanga yobasa o Musa aibuku-buku, o kukudu gënanga kaya tamunukuohi toönanga manga dibanga.

¹⁶Mä nako o nyawa moi-moi yoböa iwihimanga ma Jou, o kukudu genangö yahelenga o nyawa manga bionoka gënanga.

¹⁷Aa, ma Jou aidungutu nenangoka ganga o Womaha. Deʼ kiaka naga ma Jou ai Womaha, genangokaö naga o lapahi.

¹⁸Orahanënanga tongone nanga biono mata-mata itamunua de o kukudu, deʼ ngone homahi kahinä de ma Jou Yesus aimulia. Deʼ hababu gënanga ngone i togu-togumua inangali hodadi hokä Unanga; iholoi itedekana ngone hodadi iholoi homulia. O mulia gënanga o Womahino, deʼ o Womaha gënanga ganga ma Jou.