Read Tobelo O KORINTUS MAHINOTOKA 4 Bible Online

O KORINTUS MAHINOTOKA 4 - Tobelo bible

O KORINTUS MAHINOTOKA 4

¹Ngomi miadiai o manarama nënanga karana ma Jou Madutu aihininga madora. Hababu gënanga ngomi mianganono itoakua.

²Ngomi miapäkeua madodagi ihohuhutu inahidadi mal̄eke. Ngomi mïoluku mimanarama de miasawaro mitipu ekola miatakaidulu ma Jou Madutu aidemo. Ngomi miwïleleani ma Jou Madutu de miahininga itebi-tebini imoteke aimau. Hababu gënanga, ngomi minganono o nyawa mata-mata imitakihiri ngomi kayaoa-oa manga hininga doka magoronaka.

³Nako o Abari ma Oa ngomi mihingahu-ngahu gënanga kaimangaratiuahi dika, duga-duga o nyawa magogiria mangameta o binaha dika la imangaratiua.

⁴O gikiri madorou yakokuaha o dunia nënanga yatamunu manga dibanga o nyawa yongaku-ngakua gënanga. Enanga yätätatoko önanga la önanga uha yamäke o Abari ma Oa ino madararono gënanga mangale o Kristus aimulia, marupa ma Jou Madutu aidulada.

⁵O abari ngomi mihingahu-ngahu gënanga igoungua mangale ngomi mahirete. O abari gënanga ganga o abari mangale o Yesus Kristus; Unanga ganga o Jou; deʼ ngomi nänga niagogilaongo karana Unanga.

⁶ Ma Jou Madutu wotemo, ”Kokiani o huhutu magoronaino ipuda o dararono,” ma Jou Madutu genangala wohipudaö o dararono gënanga tongone nanga hininga magoronaka, hupaya tongone nanga dibanga idadi tararono mangale homangarati ma Jou Madutu aimulia yatararono o Kristus aibionika.

⁷Mä o rohani ma arata ihohailoa gënanga ngomi miao tongomi miadirioka ibobaragunaua nënanga yadodiai o tonakino. De hokogënanga inyata o mulia de o kuaha ikelenga ma Jou Madutuoka deʼ igoungua ngomioka.

⁸Ngomi imi parangi hagala o ngïino, mä ngomi imihidobilatua. Ngomi mimahiörikokaua, mä hiädono mianganono itoakua.

⁹Ngomi mangangöe imihaturu, mä komaiwahi imimal̄aika o nyawa o diri mimatëngoka. Deʼ ngaroka mamoi-mamoi ngomi imigohara hiädono miruba, mä ngomi mihonengua.

¹⁰Hokogenangika ngomi miamäo o Yesus aihonenge tongomi miaröehoka, la aiwowango ö idadi inyata tongomi miaröehika.

¹¹Tongomi miangango madekana, hokogenangika ngomi imitapal̄u o honenge karana o Yesus, hupaya de hokogënanga o Yesus aiwowango yakunu ihimatoko tongomi miaröehino ihohïhihanga nënanga.

¹²Nënanga mamangarati tongomi miadiri magoronaka o honenge hokogënanga magiria ihidagi makuaha, mä ngomi mimörene o wowango magogiria imanarama niadiri magoronaka.

¹³ Ma Jou Ai Demo ma Buku magoronaka hamäke o demo nënanga, ”Ngohi tongaku, hababu gënanga ngohi totemo.” Aa, de o ngongaku makuata hokä hokogenangö, ngomi mitemo hababu ngomi mingaku.

¹⁴Ngomi mingaku ma Jou Madutu wihiwangookali o Jou Yesus, aha womihi wango ngomiö de o Yesus, deʼ inaao ngini de ngomi Ai himangika.

¹⁵Mata-mata gënanga, ganga mangale tingini niaparalu. Hababu iholoi yowöe o nyawa yatarima ma Jou Madutu aidora, iholoi iwöeoli o niata o sukur ihiädono ma Jou Madutuika; de hokogënanga ma Jou Madutu iwihimulia.

¹⁶Hababu gënanga ngomi mianganono itoakua. Ngaroka ngomi hamö mäke-mäke iholoi idogo itorou, mä hamomäke-mäkeua ngomi imihidadi mahungi o wange ihigetongo.

¹⁷Deʼ o huha hokokiaua nënanga, kiaka ngomi miamäo itedekanua aha mahasili ngomino o utumu moi kabiahaua deʼ ikakali. O utumu gënanga iholoi ikurutika ilamoko nako hohitotero de o huha gënanga mahirete.

¹⁸Hababu ngomi duru miohiningaua o hali-o hali hamo mäke-mäke, mä duga-duga hamo mäke-mäkeua. Hamo mäke-mäke itäna duga-duga öraha mahuhutulu, mä hamäke-mäkeua gënanga ikakali kahiado-adonika.