Read Tobelo O KORINTUS MAHINOTOKA 5 Bible Online

O KORINTUS MAHINOTOKA 5 - Tobelo bible

O KORINTUS MAHINOTOKA 5

¹Hababu ngomi mihiöriki nako o tau — enagënanga o röehe — ngone högögogere o duniaka nënanga ikilianga, ma Jou Madutu aha wasadia otau moi mangale ngone o horogaka, ma Jou Madutu mahirete wadodiai deʼ itäna kahiado-adonika.

²O tau öraha nënanga magoronaka, ngone hotaiana hababu ngone duru hönahihu högogere tongone nanga tau magoronaka o horogaka gënanga.

³O tau gënanga tongone nanga röehe mahungi.

⁴Hokokia madekana ngone hogogere o tau magoronaka o duniaino nënanga, ngone hotaiana karana tongone nanga momoku itubuho. Koigoungua karana ngone honahihu homahuputu nanga röehino o duniaino nënanga, mä karana ngone honahihu homahinoa o röehe o horogaino gënanga, la tongone nanga röehe yakunu ihone-honenge nënanga yakuaha o ngango.

⁵Inahidiai ngone mangale gënanga, ganga ma Jou Madutu mahirete, deʼ hokä wonatagongo Unanga wonahi döaka ai Womaha ngoneino.

⁶Karana gënanga tongomi miahininga kahokogenangika miamäo ikuata. Ngomi mihiöriki hokokia madekana ngomi miogogerohi tongomi miaröehe magoronaka nënanga, ngomi mikurutika de o tau ngomi aha miogogogere de ma Jou.

⁷Hababu ngomi miwango imoteke miangongaku o Kristusika, imotekua okia miamäke-mäke,

⁸hababu gënanga tongomi miahininga itatapu ikuata. Ngomi iholoi mioigo mimatingaka de tongomi miaröehe nënanga, hupaya yakunu migogere de ma Jou.

⁹Karana gënanga ngomi mihidailako miagou-goungu mangale Ai hininga miadäene, yaoa maöraha ngomi kä nagahi tongomi miatauoka nenangoka ekola dokengoka.

¹⁰ Hababu de madiai ngone mata-mata aha inaao inahihimanga o Kristus wohihaki-hakimika, deʼ moi-moi aha hamäke mabalahi imamoteke de nanga manarama o duniaka nënanga — manarama yaoa ekola itorou.

¹¹Ngomi mihiöriki mamangarati okia, o modongo ma Jou Madutuika; hababu gënanga ngomi mihidailako o nyawa yangaku mangale tongomi miadiri. Ma Jou Madutu wominäko ngomi kohalukuku, deʼ ngohi tonganono nginiö niminäko ngomi niahininga magoronaka.

¹²De nënanga ngomi migahokua hupaya ngini nimihigiriri tongomi miadiri. Ngomi duga-duga mimau mihidöaka o hohol̄e moi maoa-oa nginika mangale idadi niahininga ilamoko ngomino, la ngini nihiöriki sarakia ngini kiani niahaluhu o nyawa ihilamoko o nyawa mangarupa deʼ koigoungua mangabiaha.

¹³Nako igoungu ngomi nimimäke imitogohangoka, ganga gënanga doka mangale ma Jou Madutu aiparalu. Deʼ nako ngomi nimimäke miahininga itotumuloa, gënanga mangale tingini niaparalu.

¹⁴O Kristus aidora imikuaha ngomi; deʼ ngomi mihiöriki nako o nyawa womatëngo wohonengoka mangale o nyawa mata-mata, gënanga mamangarati o nyawa mata-mata yohonengoka.

¹⁵O Kristus wohonenge mangale o nyawa mata-mata, hupaya o nyawa yowango-wango, yowangokaua mangale manga diri mahirete, mä mangale o Kristus wohonengoka deʼ iwihiwangokali mangale toönanga manga paralu.

¹⁶Karana gënanga, ngomi miätakihiriokaua o nyawa, imoteke o nyawa maduduga. Igoungu ngomi miwi takihirioka o Kristus de o nyawaino malolega, mä orahanënanga kowalioka.

¹⁷O nyawa yorimoioka de o Kristus, yodadi mata-mata o nyawa mahungi. Ihira-hira koiwaka — mata-mata idadioka mahungi.

¹⁸Mata-mata gënanga ma Jou Madutu wamanarama. Madodagi de o Kristus ma Jou Madutu wona diai ngone homateke oa-oakali dede Unanga, daha womihuloko ngomi la o nyawa mahomoaö yakunu imateke oa-oa de ma Jou Madutu.

¹⁹Ngomi mihingahu de miadodohanga o Kristus, ma Jou Madutu wodiai o nyawa imateke oa-oaokali de Ai diri. Ma Jou Madutu womanarama gënanga watuntutua o howono-o howono, o nyawa yamomanaramoko manga dirika. Deʼ ngomi ma Jou Madutu womihulokoka mangale mihingahu o abari gënanga.

²⁰Hoʼ ngomi ganga o Kristus aihuhuloko-huhuloko. Madodagi de ngomi ma Jou Madutu mahirete wohingahu Ai behehongo. De o Kristus airomanga, de magiria ngomi migahoko, niatarima ma Jou Madutu ai giama mangongike i yakunu ngini nima teke oa-oa dede Unanga.

²¹O Kristus wobaradohaua, mä ma Jou Madutu widiai Unanga wihitagongo tongone nanga baradoha, la ngone homa teke oa-oa okali de ma Jou Madutu karana kamoi de o Kristus.