Read Tobelo O KORINTUS MAHINOTOKA 6 Bible Online

O KORINTUS MAHINOTOKA 6 - Tobelo bible

O KORINTUS MAHINOTOKA 6

¹Karana ngomi mimanarama mimakao de ma Jou Madutu, de magiria ngomi migahoko uha ngini nihiparahaja ma Jou Madutu aihininga maoa gënanga.

² Ma Jou Ai Demo ma Buku magoronaka, ma Jou Madutu wotemo, ”Maöraha kainahigumal̄ahi, Ngohi toni gihenoka ngona, deʼ mawange o halamati, Ngohi toni riwooka ngona.” Niohininga nihidodiai, örahanënanga öraha kainahigumal̄ahi gënanga. Orahanenangala o wange mangale inahihalamati!

³Ngomi mioluku tongomi mialeleani nihihowono. Karana gënanga ngomi mihidailako mihidöakua o hohol̄e kao nyawa moikaö mangale yadiai o hali gënanga.

⁴Iidulu yaino, hagala o hali magoronaka, ngomi mihimatoko ngomi nënanga ma Jou Madutu aigogilaongo. Hababu, hagala o huha irupa ngomi miatagongoka de miasabari:

⁵ ngomi imihangihara, imibuika, deʼ imiguruhe; ngomi mimanarama miagoungu, mamoi-mamoi mimäidua de mamoi-mamoiö koiwa miainomo.

⁶De idadi miahininga mariko-rikoto, mibarija, misabari deʼ mia hininga maoa-oa, ngomi mihimatoko ngomi nënanga ma Jou Madutu aigilaongo. De mimahigagao ma Jou Madutu ai Womaha maroriwoika, deʼ miadora itebi-tebini,

⁷mihikinïki de mihingahu o abari ma Jou Madutuino de Ai kuaha ma Jou Madutu, ngomi mihidumutu ngomi nënanga ganga ma Jou Madutu aigogilaongo. Ngomi mimahijojö ma Jou Madutu aimauika, hokä tongomi miadaë mangale miparangi ekola mangale miodatoko miadiri.

⁸Ngomi imihoromati, mä imihikauku dika; imihigiriri, deʼ imidiaiö o romanga madorou. Ngaroka ngomi miahininga irikoto, ngomi imitemo mielu-eluku.

⁹Ngomi imipulono hokä iminäkoua, mä ngomi iminäko o nyawa mata-mata. Yatobote ngomi mihonenge, mä inyata ngomi kami wangohi. Ngaroka ngomi imianiaya, ngomi mihonengua.

¹⁰Ngaroka tongomi miahininga yahuha, mä ngomi kahokogenangika dika mimörene. Ngomi imipulono mimihikini, mä ngomi miadiaioka o nyawa manga ngöe yodadi kaya. Ngomi imipulono komia kia-kiaua, mä de madiai ngomi miaparetaino hagala kia honanga.

¹¹Roriadodoto tinihohininga o Korintus mabereraka! Ngomi mihitotararonika iböto nginika. Tongomi miahininga madol̄a mata-mata ngomi mihingahuoka.

¹²Ngomi miatamunua miahininga mangale ngini, duga-duga ngini niatamunu niahininga ngomino.

¹³Orahanënanga, mal̄aika ngohi totemo hokä tongohi ahi ngoha-ngohakika mahirete. Niahelengaö niahininga ngomino.

¹⁴Uha ngini nimau nidadi nirimoi de o nyawa iwingaku-ngakua o Yesusika; gënanga imadäenua. Kiaka yakunu o oa-oa imaganu idadi kamoi de o dorou! Yakunua o dararono imatoomu kamoi de o huhutu.

¹⁵Yakunua o Kristus imahininga moi de o Ibilihi. Bote kaima däene o Haranioka manyawa de o Haraniokaua manyawa?

¹⁶ Bote imadohanga mahi dogoronaka o Jou ai Tau de o gomanga matau? Ngone nënanga o Jou ai Tau, enagënanga ma Jou Madutu wowango-wango. Ma Jou Madutu mahirete wotemo, ”Ngohi aha togogere to önanga manga hidogoronaka, deʼ towango de de önanga. Ngohi aha todadi to önanga manga Jou Madutu, deʼ onanga aha yodadi Ahi umati.

¹⁷ Hababu gënanga, niamal̄aika o nyawa iwinäko-näkoua ma Jou Madutu gënanga, deʼ nimahi tingaka niadiri dede önanga. Uha hakali-kali nimahi dohanga de i pese-peseke, done Ngohi aha tinitarima ngini.

¹⁸ Ngohi aha todadi nia Ama, deʼ ngini aha nidadi Ahi ngoha-ngohaka, hokogënanga ma Jou woköko Kuaha wotemo.”