Read Tobelo O KORINTUS MAHINOTOKA 8 Bible Online

O KORINTUS MAHINOTOKA 8 - Tobelo bible

O KORINTUS MAHINOTOKA 8

¹ Roriadodoto, ngomi mioigo nginiö nihiöriki mangale sarakia ma Jou Madutu aioa o jemaat-jemaatika o Makedoniaka.

²Onanga yaujioka de o huha-huha itotubuho. Mä o huha-huha mahidodogoronaka gënanga, önanga kayo more-morene deʼ duru manga hininga mangigo ihidöaka manga ngongike magoronaka mangale yäriwo o nyawa mahomoa, ngaroka önanga duru yomihikini.

³Ngohi yakunu tohitatapu önanga ihidöaka de toönanga manga kuata, de kaiholoi. Moiua yähuloko,

⁴önanga duruhë yogahoko ngomino nako yakunu dede önanga ihidöaka o roriwo ma Jou Madutu ai umatika o Yudea madaeraoka.

⁵Onanga ihi döaka duru iholoi de ngomi miongano-nganono. Madodihiraka önanga imahilapahi manga diri ma Jouika, dahao ngominoö, imamoteke de ma Jou Madutu aimau.

⁶Hababu gënanga ngomi duru miwihihitomo o Titus — womuläenge o manarama nënanga — hupaya ünanga wohigila-gila o manarama maoa-oa nënanga nginiö niahidogoronaka.

⁷Ngini iholoi ikurutil̄e hagala mata-mata magoronaka: Ngini iholoi ikurutil̄e o hali o ngongaku magoronaka, o hali nihimatoko niadamäke magoronaka, o hali niaganäko magoronaka, hagala o hidailako marupa magoronaka, deʼ niadora magoronaka ngomino. Hababu gënanga, kiani nginiö iholoi ikurutil̄e niahidailako ma oa-oa nënanga magoronaka.

⁸Ngohi tinihigaroua gënanga hokä o pareta moi. Mä de o himatoko hokokia manga magawe o nyawa mahomoa yariwo imahi koko önanga, ngohiö toigo tohiöriki hokokia yaika niadora.

⁹Hababu ngini nihiöriki de madiai o Yesus Kristus tongone nanga Jou, duru wonahininga ngone. Unanga wokaya, mä Unanga womadiai Ai diri wodadi womihikini mangale tingini niaparalu, hupaya de Ai mihikini gënanga, ngini nidadi nikaya.

¹⁰Imoteke ahidamäke, mangï iböto ngini nihidiai okia ngini nimulaengoka o taongo ipaha-paha. Hababu nginila madodihiraka niatibangoka deʼ niamuläenge o hidailako nënanga.

¹¹Aa, örahanënanga kokiani ngini nihigila-gila imamoteke niakuata. Kiani ngini de niahininga ilamoko nihitiai o manarama gënanga, hokä sarakia kahuruono nginiö niahininga ilamoko nihidatoroka.

¹²Nako ngini de niaigo nihidöaka, ma Jou Madutu aha watarima niangongike gënanga imoteke okianaga nginioka, igoungua i moteke okia koiwa naga nginioka.

¹³Ngohi kautuö de koiwaahi dungutu mangale tahipidili o nyawa mahomoa manga momoku, deʼ tinihitubuho ngini. Mä karana ngini öraha nënanga magoronaka mata-mata kadema enangoka, iyaoa iböto ngini niahidöaka toönanga manga kuranga magoronaka. Damä nako ngini nikuranga, deʼ önanga naga mata-mata de maenangoka, önanga aha iniriwo ngini. De hokogënanga hohinotoö nimateke leleani.

¹⁵ Ma Jou Ai Demo ma Buku magoronaka itulihi, ”O nyawa manga hasili ilamoko, yoholoiua, deʼ o nyawa manga hasili mahuhutulu, yokurangua.”

¹⁶Hokokia ngomi misukur ma Jou Madutuika hababu ünanga widiaioka o Titus de aimagawe o manarama moi de ngomi mangale winiriwo ngini!

¹⁷Hababu o Titus igoungua dika woigo wohitotomo tongomi mia gogahoko, mä unangö hokogënanga ai magawe womanarama womau winiriwo ngini hiädono imoteke aimau mahirete ünanga waputuhoka mangale woiki nginika.

¹⁸Imakinïki dede ünanga ngomiö miwihidingoto womatëngo o riadodoto duru iwihoromati o jemaat mata-mataika karana aimanarama wohingahu o Abari ma Oa ma Jou Madutuino.

¹⁹Madatekoka gënanga, o nyawa iwiheto-hetongo iwiirikoka de ihitatapuoka o jemaat-jemaat mangale womidodiawo ngomi miadodagi magoronaka. Hababu ngomi aha midiai miadodagi mangale mitotaka o roriwo gënanga, hupaya ma Jou iwihimulia deʼ hupaya ngini niamäke ngomi mioigo miniriwo.

²⁰Ngomi duru mimahidodiai hupaya uha naga o nyawa imihihowono ngomi o hali mitotaka o roriwo ma amo-amoko nënanga magoronaka.

²¹ Ngomi mimau midiai irikoto igoungua duga-duga ma Jou aihimangoka, mä o nyawa ö manga himangoka.

²²Imakinïki de o Titus deʼ o riadodoto gënanga, ngomiö miwihidingoto womatëngo riadodoto mahomoa. Ngomi miwiujioka ünanga mihigali-gali deʼ inyata ünanga hokogenangika woigo winiriwo. Deʼ örahanënanga, ünanga iholoi womau winiriwo ngini hababu ünanga wininganono kohaamoko nginika.

²³Mangale o Titus, ünanga ganga tongohi ahidodiawo, mimanarama dede ngohi mangale miniriwo ngini. Deʼ mangale o riadodoto yahinoto gënanga, yoiki imakinïki de ünanga, önanga ganga o nyawa yahulo-huloko o jemaat deʼ yodadi o nyawa yahiamo-amoko mangale o Kristus.

²⁴Ngomi mininganono ngini nihimatoko niadora onangika, hupaya o jemaat mata-mata ihiöriki ngini niähininga önanga, de okia ngomi mihiamo-amoko mangale ngini ganga itiai.