Read Tobelo O KORINTUS MAHINOTOKA 9 Bible Online

O KORINTUS MAHINOTOKA 9 - Tobelo bible

O KORINTUS MAHINOTOKA 9

¹De madiai iparalu okauaoli ngohi tinihurata nginika, mangale niaroriwo magogiria nihidingoto ma Jou Madutu aiumatika o Yudeaka.

²Ngohi tohiöriki ngini nioigo niariwo, deʼ ngohi ahihininga ilamoko mangale ngini o Makedonia manyawaika. Ngohi totemoka onangika, ka o taongo ipaha-pahahi roriadodoto o Akhayaka imahidiaioka mangale ihidöaka o roriwo. Deʼ niamörene yahaukokaö manga mörene o hidoku moi ma amo-amoko onangino.

³Orahanënanga ngohi tihuloko o Titus deʼ o riadodoto yahinoto gënanga nginika, hupaya okia ngomi miahininga ilamoko mangale ngini uha marupa ka o demo mahomoa mata-mata. Hoʼ, ngini kiani nimahidiaioka, hababu ngohi tohingahuoka onangika ngini nima hidiaioka mangale gënanga.

⁴Ngohi tohawatere nako naga o Makedonia manyawa yonïki dede ngohi, damä maöraha ngohi toiki nginika. Deʼ nako önanga inimäke nimahidiaiuahi, uwee, kao goguleua ngomi miamal̄eke, karana ngomi miahetongoka ngomi duru miningaku nginika! Deʼ ngini mahireteö aha inimal̄ekoli.

⁵Hababu gënanga ngohi tamäo iparalu iholoi ihira tähuloko önanga gënanga nginika, mangale ihidailako tingini niangongike nihijäjajioka gënanga. Ngohi todiai gënanga hupaya damä nako ngohi toböa, niangongike ngini gënanga ingodumoka. De hokogënanga, inyata niangongike gënanga nihidöaka de niahininga imore-morene, deʼ karana kadema pakisaua.

⁶Niohininga! O nyawa yodatomo o gihihi yahutu-hutulu, aha yautuku mahohoko mahuhutuloli. Mä o nyawa yodatomo o gihihi ya amo-amoko, aha yautuku mahohoko koha amokoli.

⁷O nyawa moi-moi kiani ihidöaka imamoteke manga hininga mangigo. Uha önanga ihidöaka yodododato ekola karana ka imapakisa, hababu ma Jou Madutu wahininga o nyawa ihidöaka de manga hininga imore-morene.

⁸Ma Jou Madutu wokokuaha winihidöaka nginika o barakati duru dema boloioka, hupaya hokogenangika nginioka okia ngini nioparalu; de ngini aha de maboloioka mangale nidiai o oa deʼ nimanarama maoa-oa.

⁹ Ma Jou Ai Demo ma Buku magoronaka itulihi hokonënanga mangale ma Jou Madutu, ”Unanga wohigerewoto o mihikini manyawaika; Ai hininga maoa ikakali kahiado-adonika.”

¹⁰ Ma Jou Madutu wasadiaka o gihihi mangale yodato-datomo deʼ o inomo mangale ngone. Unangö aha wasadia de wohiwöe okia ngini nidatomo, hupaya niahininga madora mahohoko idogoli.

¹¹De hokogënanga ngini aha de maenangoka hagala o hali magoronaka hiädono ngini hokogenangika yakunu nihidöaka de niahininga madora. Deʼ niangongike-ngongike ngomi mihikokodokuoka, dadi hababu o nyawa mangangöe yotemo tarimakasi ma Jou Madutuika.

¹²Hababu o manarama maoa-oa ngini niadodiaioka nënanga igoungua duga-duga aha ihitotomo ma Jou Madutu aiumati manga kuranga dika, mä ahao idadi hababu o nyawa yowöe yotarimakasi ma Jou Madutuika.

¹³Deʼ niamanarama maoa-oaino ngini nihimatokoka gënanga, o Haranioka manyawa mangangöe o Yudeaka aha iwihigiriri ma Jou Madutu karana önanga yamäke niasetia o Abari ma Oaika, mangale o Kristus ngini niwininïkoka gënanga. Ikali, önanga iwihigiriri ma Jou Madutu, karana ngini niahininga duru de madora mangale niahikodoku onangika de o nyawa mahomoaika mata-mata okianaga nginioka.

¹⁴Ma önanga aha ininiata ngini de mangamamäo o dora, karana ma Jou Madutu duru aihininga maoa nginika.

¹⁵Kokiani ngone hosukur ma Jou Madutuika mangale aingongike kabiahaua gënanga!