Read Tobelo O GALATIA 2 Bible Online

O GALATIA 2 - Tobelo bible

O GALATIA 2

¹ O taongo ngimoi de iata ipahaika, ngohi toma idulu o Yerusalemika mima nïki de o Barnabas, de o Tituso ma tiao.

²Ngohi toiki o Yerusalemika hababu ma Jou Madutu wohi nyataka ngohino, ngohi kokiani toiki. Deʼ moi o gamäke biahaua magoronaka de o tutuda-tutuda dokengoka, ngohi tohi ade-ade de tohitararono o Abari ma Oa ngohi tohi ngahu-ngahu hagala o Yahudi manyawa ikaua. Hababu ngohi toluku ahi hidailako mahira, kayaoa öraha nanga, duga-duga parahaja.

³O Titus, wohi dödodiawo ngohi, ganga o Yunani manyawa mä unanga miwi pakisaua wamoteke o huna madatoro,

⁴ngarokö naga o nyawa iwihi gëgoto o hali gënanga. Onanga ganga o nyawa imahö huru-huruku nanga doomu ma goronaino, deʼ manga diri imahirupa hokä o riadodoto. Onanga mademo koiwa de kayowohama la yatailako ngone hogilaongokaua karana ngone horimoi de o Kristus Yesus. Onanga yomau ina higilio ngone okianaga mahiraika hokä o gilaongo,

⁵mä ngomi kamahuhutulö de mima ikeua onangika, karana ngomi mimau mio göana hupaya o Abari ma Oa gënanga kahirahi itebini mangale ngini.

⁶ Ma hokogënanga hagala o nyawa, yädododato o nyawa koiwanaga o hali mahungi ihï gahoko ngohino — mangale ngohi koiwa naga mahowono, nako önanga o nyawa yädo dodato ekola kowali, hababu ma Jou Madutu woirikua o biono.

⁷I idulu yaino hagala o nyawa yäpulono o nyawa yädododato gënanga ihi goungu ma Jou Madutu wohihi manaramoka ngohi mangale tohi ngahu o Abari ma Oa gënanga o Yahudi manyawa ikaua, hokä imatero ünanga wihimanaramoka o Petrus mangale wohi ngahu o Abari ma Oa gënanga o Yahudioka manyawaika.

⁸Hababu ma Jou Madutu wihi döaka o dagakunu o Petrusika la wodadi o Yahudi manyawa manga rasul, wohi döakö ngohino o dagakunu la todadi o Yahudi okaua manga rasul.

⁹O Yakobus, o Petrus, deʼ o Yohanis, yämäke yodadi o jemaat-jemaat manga tutuda, ihi goungu ma Jou Madutu wohidöakoka ngohino o manarama biahaua nënanga. De önanga manga giama imako sö de o Barnabas deʼ ngohi hokä manonako mimateke rimoi. Daha önanga de ngomi mima teke fakati ngomi aha mimanarama o Yahudi okaua manga hidogoronaka, deʼ onanga o Yahudioka manga hidogoronaka.

¹⁰Duga-duga nanga moi manga gogahoko ganga hupaya ngomi mia hidailako o mihikini manyawa. Deʼ ngohi ahi hininga yadäene tadiai o hali gënanga.

¹¹Maöraha o Petrus woböa o Antiokhia mabereraino, ngohi tïlawani ünanga tihi totiaika, hababu okia wadodiai ihowono.

¹²Madodihiraka ünanga wol̄omo wogogere kamamoi de o roriadodoto o Yahudi okaua. Mä de o Yakobus ai nyawa wähulo-huloko imahi adonino, ünanga ai diri wohitingaka de o roriadodoto o Yahudi okaua deʼ wolukoka wol̄omo dede önanga, hababu wämodongo o nyawa yomau-mauika la yähuna, mata-mata.

¹³Roriadodoto o Yahudioka mahomoaö imahi moteke yoelu-eluku hokä o Petrus, hiädono o Barnabas ma iwïhora womadiai hokä önanga.

¹⁴Hoko gënanga ngohi tämäke önanga manga düku imateroua de o Abari ma Oa madiai, ngohi tïtemo o Petrusika o nyawa yoböa-böaino genangoka dau manga himangoka, ”Nako Riadodoto hokä o Yahudi manyawa, nowangoka hokä o Yahudi manyawaua, yadodoa ho Riadodoto öraha nanga nomau näpakisa o nyawa mahomoa yowango hokä o Yahudi manyawa?”

¹⁵Igoungu imoteke o ahali, ngomi nanga o Yahudi manyawa, deʼ igoungua ö Yahudi manyawaua yoböbaradoha”.

¹⁶ Ngaro hoko gënanga ngomi mihi öriki o nyawa homa teke oa-oaoli de ma Jou Madutu duga-duga karana hïngaku o Yesus Kristusika, deʼ igoungua karana hadiai o agama matita. Ngomi ö mahirete mingaku o Yesus Kristusika, hupaya ngomi mima teke oa-oa de ma Jou Madutu de madodagi tongomi mia ngongaku gënanga, koigoungua karana ngomi miadiai o agama matita. Hababu de hodiai o agama matita moiua o nyawa yakunu ima teke oa-oali de ma Jou Madutu.

¹⁷Ngomi mihidailako mima teke oa-oali de ma Jou Madutu de madodagi miwango mirimoi de o Kristus. Mä nako i böto mi diai gënanga, inyata ngomi ka ö nyawa yoböbaradohaohi” inoli hokä o nyawa o Yahudi okaua, boteka nënanga mamangarati o Kristus wodadi o hababu ngomi mibaradoha? Maraioka dika kowali!

¹⁸Nako ngohi tomuläenge tohi gokoli o agama matita mapahitaka ngohi takokiliangoka, done ngohi tohi dumutu ngohi nënanga o tita tatotilakuru.

¹⁹Mä ngohi tohonengoka o agama matitaika — o tita gënanga mahirete ihi hohonenge — hupaya ngohi yakunu towango mangale ma Jou Madutu. Ngohi ihi saliboka de o Kristus.

²⁰Oraha nanga ngohi okaua towango, mä o Kristus wowango ahi diri magoronaka. O wowango ngohi tamäo-mäo öraha nanga ganga o wowango mangale o ngongaku ma Jou Madutu ai Ngohakika wohi dora-dora ngohi deʼ wohihubaka Ai diri mangale ngohi.

²¹Ngohi tohikaukua ma Jou Madutu ai hayangi de Ai dora. Nako o nyawa manga dodohanga de ma Jou Madutu idadi yaoaoli karana yadiai o agama matita, gënanga mamangarati o Kristus ai honenge koiwa mafaidä!