Read Tobelo O GALATIA 3 Bible Online

O GALATIA 3 - Tobelo bible

O GALATIA 3

¹O Roriadodoto o Galatia manyawa mata-mata! Ngini igoungu nibodo! Boteka ngini inï koronaoka o nagona naga manga bobaja? O Kristus ai honenge o saliboka ngohi tohitararonoka nginika tohi totiaika.

²Beika nihihi ngahu ngohino o hali moi nënanga: Boteka ngini nia tarimaka ma Jou Madutu ai Womaha karana niadiai o agama matita, ekola karana ngini ni ihene o Abari ma Oa ma Jou Madutuino deʼ niwi ngaku o Kristusika?

³Yadodoa ho ngini hoko gënanga nia bodo! Ngini nimulaengoka o wowango mahungi de ma Jou Madutu ai Womaha, sarakia öraha nanga ngini nimau nia mäke itötotomo de tingini nia kuata mahirete?

⁴Parahaja dika mata-mata ngini nia mäo-mäoka gënanga? O nagona yato parahaja!

⁵Ma Jou Madutu wohi döaka ai Womaha nginika deʼ naga idadi o nonako ihëra-hëranga ngini nia hidogoronaka. Boteka ma Jou Madutu wodiai gënanga karana ngini niadiai o agama matita ekola karana ngini ni ihene o Abari ma Oa gënanga deʼ ningaku o Kristusika?

⁶ Gënanga imatero hokä yatuli-tulihi Ma Jou Ai Demo ma Buku magoronaka yakorona o Abraham — hoko nënanga, ”O Abraham wo ngaku ma Jou Madutu ika deʼ karana ai ngongaku gënanga ünanga ma Jou Madutu wïtarima hokä o nyawa yasosanangi ma Jou Madutu ai hininga.”

⁷ Hoʼ kokiani ngini nima mäo igou-goungu o nyawa o Abraham ai difauku ganga o nyawa yongaku-ngaku ma Jou Madutuika.

⁸ Ma Jou Ai Demo ma Buku yamäkeoka ihira ma Jou Madutu wahi gumal̄a hagala o nyawa o Yahudi okaua imateke oa-oaoli de ma Jou Madutu, nako önanga iwi ngaku ma Jou Madutuika. O Abari ma Oa gënanga ihi ngahu ihira o Abrahamika o jaji nënanga magoronaka, ”De mangëkomo ngona, ma Jou Madutu aha wahi barakati mata-mata o hoana de o berera manyawa o dunia mal̄okuoka.”

⁹O Abraham wongaku, ho ünanga iwihi barakati. Hoko genangoli mata-mata o nyawa yongaku-ngaku, aha wahi barakati kamamoi de o Abraham.

¹⁰ Hagala o nyawa imahi gogagao o agama matitaika, mata-mata yowango o lolai matimiuku. Hababu Ma Jou Ai Demo ma Buku magoronaka itulihi, ”O nyawa yososetiaua yadiai mata-mata yatuli-tulihoka o Agama ma Tita ma Buku magoronaka, ma Jou Madutu wahilolai!”

¹¹ Kamoiö de moiua o nyawa imateke oa-oa de ma Jou Madutu de karana yadiai o agama matita. O hali gënanga i hi nyataka Ma Jou Ai Demo ma Buku magoronaka, ”Duga-duga o nyawa yongaku-ngaku ma Jou Madutuika hiädono manga dodohanga de ma Jou Madutu yaoaoli, aha yowango!”

¹² Mä o agama matita ihihol̄eua o ngongaku mal̄okuoka. Ma Jou Ai Demo ma Buku magoronaka yatulihi o nyawa yadodiai o agama matita, aha yowango karana o tita gënanga.

¹³ Mä o Kristus wonahi lapahi ngone de o agama matita malolai. Unanga wodiai gënanga de wohigumal̄a Ai diri yalolai karana ngone. Hababu Ma Jou Ai Demo ma Buku magoronaka itulihi, ”Yädäene o lolai o nyawa yohonenge yonuneuku o liate magotaka.”

¹⁴O Kristus wodiai hoko gënanga hupaya o barakati ma Jou Madutu wihi jäjaji o Abrahamika yahi döakoli hagala o nyawaika o Yahudi manyawaua. De hoko gënanga ngoneö hongaku-ngaku ma Jou Madutuika, yakunu hatarima o Womaha ma Jou Madutu wohi jäjaji gënanga.

¹⁵Roriadodoto! Irahai ngohi tapäke o hitotero o wange higëtongo hadodiai. Nako o nyawa yadiai o jaji moi de o jaji gënanga yaputuhoka, done kao nyawa moiö de yakunua yatöaka o jaji gënanga, ekola yödogo okia naga moi enangika.

¹⁶ Ma Jou Madutu ai jaji-jaji gënanga ma Jou Madutu wodiai mangale o Abraham deʼ mangale o nyawa o Abraham ai difauku. Ma Jou Ai Demo ma Buku magoronaka itulihua ”deʼ mangale hagala o nyawa o Abraham ai difauku”, mamangarati kamanga ngöe. Yatulihi genangokadau ganga ”deʼ mangale o nyawa ani difauku”, ma mangarati womatëngo dika Unanga gënanga o Kristus.

¹⁷ Ngohi tomau tohihihira nenangoka genangala nenanga doka: ma Jou Madutu ai jaji ihira yadiaioka deʼ yaputuhoka. O agama matita ihi döa-döaka o taongo o ratuhu iata de moruange ipahaika, yakunua yatöaka maputuhu de yaehe ma Jou Madutu ai jaji gënanga.

¹⁸ Hababu nako ma Jou Madutu ai ngongike imahigagao o agama matitaika, done gënanga igoungokaua o ngongike wohi jäjaji. Imakorona karana ma Jou Madutu wihijajioka o Abrahamika, ho ma Jou Madutu wihidöaka gënanga unangika.

¹⁹Nako hoko gënanga, mangale okia o agama matita ihidöaka? Mabobaluhu ena genangala o tita gënanga ihidogo la inyata o nyawa nanga dodilakuru. O agama matita gënanga ilaku duga-duga hiädono woböa womatëngo o Abraham ai difauku, kiaka yahëto-hëtongo ma Jou Madutu ai jaji magoronaka o Abrahamika. O agama matita gënanga o malaekat-malaekat ihi ädono de iwi päke womatëngo o nyawa.

²⁰Aa, kokiani naga o regu hinoto, dahao iparalu o huhuloko. Mä ma Jou Madutu woparalua o huhuloko, hababu Unanga mahirete wohijobo.

²¹Boteka gënanga mamangarati o agama matita ima lawani de ma Jou Madutu ai jaji? Maraioka kowali! Hababu nako o agama matita ihi döaka mangale inahidöaka o wowango o nyawaika, done o nyawa yakunu homateke oa-oa de ma Jou Madutu de madodagi o agama matita.

²²Mä Ma Jou Ai Demo ma Buku magoronaka itulihi mata-mata o hoana de o berera manyawa naga o baradoha makuaha matimiuku. Karana gënanga, o ngongike ihi jäjaji de matiti o ngongaku o Yesus Kristus yahidöaka onangika yongö ngaku-ngaku.

²³Ihira de iböa maöraha mangale hïngaku o Kristusika, ngone inagöana o agama matita ihidodiai; ngone hokä ina kurungaino hiädono o ngongaku gënanga ihi nyata.

²⁴De hoko gënanga, o agama matita imadadi hokä tongone nanga gogöana hiädono o Kristus woböa la wona diai ngone homa teke oa-oaoli de ma Jou Madutu karana ngone hïngaku o Kristus.

²⁵Oraha nänga, karana maorahoka o nyawa yakunu hïngaku o Kristusika, ho ngone o agama matita inä göanokaua.

²⁶Karana ngini ningaku o Kristus Yesusika, ho ngini nirimoi dede Unanga; deʼ mangale karana gënanga ngini nidadi ma Jou Madutu ai ngoha-ngohaka.

²⁷Ngini mata-mata inï ohikoka de o gohiki itebi-tebini de o Kristus ai romanga, hoʼ ngini niatarima nia dirioka o Kristus mahirete ai wowango mabiaha.

²⁸O hali nënanga magoronaka koiwaka naga mahowono o Yahudi manyawa deʼ o Yahudi manyawaua, o gilaongo deʼ o gilaongua, o nauru deʼ o ngoheka. Riadodoto mata-mata kamoi karana o Kristus Yesus.

²⁹ Nako ngini tö Kristus, done ngini ganga o Abraham ai difauku. Deʼ ngini aha nia tarima okia ma Jou Madutu wohi jäjaji.