Read Tobelo O GALATIA 4 Bible Online

O GALATIA 4 - Tobelo bible

O GALATIA 4

¹Mä iparalu ngohi tohi ade-ade tohi totiaika; madëkana womatëngo o puhaka majojö kao ngohakohi, naga o nyawa iwï göana ünanga deʼ ihi dailako okia wopö paralu hiädono ünanga ai umuru yadono ai ama wohitötantu. Unanga iwi hidiai hokä o gilaongo womatëngo, ngarokö imoteke madiai mata-mata o arata gënanga ünanga madutu.

³Hoko genangö de ngone: Madëkana de magurutu ngone hobaluhuwahi, hagala o womaha yakokuaha o dunia nënanga imä gilaongo ngone.

⁴Mä maöraha yakokoronauku, ma Jou Madutu wïhuloko ai Ngohaka o duniauku. O ngohaka gënanga o ngoheka momatëngo mihi ngohakuku deʼ wowango o agama matita makuaha matimiuku.

⁵ De hoko gënanga Unanga wahilapahi hagala o nyawa yowango-wango o agama matita matimiuku; hupaya ngone ö yakunu hodadi ma Jou Madutu ai ngoha-ngohaka.

⁶Karana ngini ganga ma Jou Madutu ai ngoha-ngohaka, ma Jou Madutu wïhuloko ai Ngohaka ai Womaha iwohama nia hiningaika Riadodoto deʼ ahi hiningaika, enagënanga o Womaha ihiböaka, ”Ama, ya ahi Ama.”

⁷Hoʼ, ngini o gilaongokaua, duga-duga o ngohaka. Deʼ karana ngini ma Jou Madutu ai ngohaka, ho ma Jou Madutu aha winihidöaka nginika hagala okianaga wasosadia mangale ai ngoha-ngohaka.

⁸Mahira ngini niwi nakoua ma Jou Madutu, mahababu gënanga o kuaha-kuaha nia pulono hokä o gikiri nidadi magilaongo mä imoteke madiai hakali-kali ma Jou Madutua.

⁹Mä oraha nanga ngini niwinako ma Jou Madutu, ekola iholoi yadäene ma Jou Madutu winï näko ngini. Aa, yadodoa ho ngini nimau nima iduloli o dunia nënanga mawomaha madorouika? Yadodoa ho ngini nimau nimahi gilaongoli o womaha madorouika gënanga?

¹⁰Ngini nihi amoko hagala o wange ihi tötantu, o mede-o mede ihi tötantu, deʼ o taongo-o taongo ihi tötantu.

¹¹Ngohi tömodongo, uha-uha la tongohi ahi kangela mangale ngini kaparahaja dika.

¹²Roriadodoto! Ngohi togahoko de magiria hupaya ngini nimadadi hokä ngohi. Karana ngohiö tomadadioka hokä ngini. Ngini okianaga ihowo-howono kamoiö de nidiaiua ngohino.

¹³Marai ngini kanio hiningahi okia idadi o hababu ho ngohi madodihirakahi tohi ngahu o Abari ma Oa gënanga nginika. Mahababu enagënanga karana ngohi topanyakeuku.

¹⁴O öraha gënanga ngini nihi emonua ngohi, ngarokö madodagi tongohi ahi röehe marupa o cocoba ilamo-amoko nginika. Kaidogo ngini nihitarima ngohi hokä nia tarima ma Jou Madutu ai malaekat ekola hokä niwitarima o Kristus Yesus mahirete.

¹⁵Ngini duru niutumu o öraha gënanga. Mä oraha nanga, kiaka yaika niautumu gënanga? Ngohi tohi öriki o öraha gënanga ngini niomodeke nia tubalenge nia lako mahirete la nihihi döaka ngohino, nako gënanga yakunu niadiai.

¹⁶Boteka öraha nanga ngini nihi pulonoka ngohi hokä niahaturü, karana ngohi tohi nyata o diai nginika?

¹⁷Hagala o nyawa mahomoa gënanga de manga garago inïlingiri ngini, mä toönanga manga dungutu itorou. Onanga duga-duga yöigo yatöaka nia hidohanga dede ngomi, hupaya ngini niä nïki önanga de niagarago.

¹⁸Igoungu yaoa mangale de niagarago o hali ma oa-oa magoronaka, itiyakunu salalu hoko gënanga deʼ uha duga-duga nako ngohi naga dede ngini.

¹⁹Ahi ngoha-ngohaka tini haya-hayangi! Ngohi o öraha nënanga tatagongoli o hangihara karana ngini. Ngohi tatagongo o hangihara hokä ayo momatëngo matagongo o hangihara maöraha ami ngohaka imakil̄au. Ngohi aha igila-gila tatagongo o hangihara, nako o Kristus ai wowango mabiaha idatomowahi nia diri oka!

²⁰Ngohi duru tö hininga de tö igo ngohi naga öraha nanga tingini nia hidogoronaka, hupaya ngohi tinï temo nginika de o ilingi hara moioli, karana ngohi tohi orikokaua okiali tomau todiai dede ngini!

²¹Roriadodoto niomau niwango o agama matita-matita makuaha matimiuku, abeika ni ihene ngohino! Ngohi aha tinihi ngahu nginika imoteke madiai okia yatulihi o Musa ai Tita ma Buku magoronaka.

²² Genangoka dau yatulihi o Abraham ai ngohaka yahinoto: Womatëngo ganga ngoi ayo mogilaongo, deʼ womatëngoli ngoi ayo molapahi.

²³O ngohaka ngoi ayo mogogilaongo womakil̄au biaha karana o nyawa manga mau. Mä o ngohaka ngoi ayo mololapahi, womakil̄au karana ma Jou Madutu wihi jäjajioka.

²⁴Nënanga yakunu hapäke hokä o hitotero. O ngoheka yahinoto gënanga ganga hohi totero de o jaji hinoto; moi ma ahali o Sinai ma L̄okuino — genangala o ngo Hagar; ami ngoha-ngohaka ima kil̄au hokä o gilaongo.

²⁵Hoʼ, o ngo Hagar genangala o Sinai ma L̄oku, o Arab mabereraka. Münanga mohinonako o Yerusalem maberera de mata-mata yogögogere genangokadau kiaka o öraha nënanga idadioka o gilaongo.

²⁶Mä o Yerusalem o horogaka gënanga ganga o Yerusalem ilolapahi, deʼ enanga ganga tongone nanga ayo.

²⁷ Hababu Ma Jou Ai Demo ma Buku magoronaka yatulihi, ”Nomörene hei ngoheka nofafätua, de komaiwahi nongohaka! Nomörene deʼ noulili de nohagaga hei ngona komaiwahi namäo nongohaka nohangihara! Hababu o ngoheka manga rokata yämal̄a-mal̄aika aha yamäke o ngohaka iholoi iwöe de o ngoheka yowango-wango de manga rokata.”

²⁸Roriadodoto! Ngini mahirete ganga ma Jou Madutu ai ngoha-ngohaka nimakil̄au karana ma Jou Madutu ai jaji; ngini nima ketero hokä o Ishak.

²⁹ O öraha gënanga o ngohaka woma kokil̄au imoteke o nyawa manga mau, wïaniaya ma ngohaka woma kokil̄au karana ma Jou Madutu ai Womaha mamau. Hoko genangö öraha nanga.

³⁰ Mä okia yatulihi Ma Jou Ai Demo ma Buku magoronaka? Genangokadau yatulihi hoko nënanga: ”Nimiduhu magilaongo o ngoheka gënanga kamamoi de ami ngohaka, hababu magilaongo o ngoheka ami ngohaka gënanga aha wodadiua o puhaka majojö kamamoi de o ngoheka mololapahi ami ngohaka.”

³¹Hoʼ, Roriadodoto, ngone nënanga koigoungua magilaongo o ngoheka ami ngoha-ngohaka; ngone ganga o ngoheka mololapahi ami ngoha-ngohaka.