Read Tobelo O GALATIA 5 Bible Online

O GALATIA 5 - Tobelo bible

O GALATIA 5

¹Ngone öraha nanga holapahi, hababu o Kristus wona hilapahioka ngone! Hababu gënanga nia sosö nialolapahi, deʼ uha nimau inï gilaongoli.

²Nio hohininga, nako yogahoko ngini ini huna, gënanga mamangarati o Kristus ai faidä koiwa nginika. Yahëto-hëtongo nënanga ganga ngohi mahirete, o Paulus.

³Mamoiohi ngohi tohidöaka o hohininga o nyawa yogaho-gahokika yähuna, önanga ipatutu yadiai mata-mata o agama matita!

⁴Nako ngini nimahi dailako nima teke oa-oa de ma Jou Madutu de madodagi o agama matita, gënanga mamangarati nia hidohanga de o Kristus itöakoka. De hoko gënanga ngini niwango ma Jou Madutu ai hayanga de Ai dora madaera maporetoka.

⁵Mä mangale ngomi, ngomi mimahi nganono de ma Jou Madutu ai Womaha maroriwo deʼ de matiti mia ngongaku o Kristusika, ma Jou Madutu womihi akunu ngomi mima teke oa-oa dede Unanga.

⁶Hababu nako ngone horimoioka de o Kristus Yesus, o hali hamoteke ekola hamotekua o huna madatoro idadiokaua o lolehali. Kahohi amoko duga-duga hongaku o Kristusika, deʼ genanga inyata nanga dora magoronaka o nyawa mahomoaika.

⁷Mahira ngini nirorebe kayaoa! Oraha nanga yadodoa ho ngini nihi ngounokauali ma Jou Madutu ai mauika? Onagona inï bajaka ngini?

⁸Marai yadodiai gënanga ma Jou Madutua winï aho-ahokoka ngini!

⁹ ”O ragi mahuhutulu aha yahëro mata-mata o tarigu yapëha-pëhakoka,” o nyawa yato.

¹⁰Ngarokö hoko gënanga ngohi kato ngakuohi ngini aha nia motekua o damäke okianaga mahomoa, hababu ngone horimoioka de o Kristus. Deʼ ngohi tohi goungu o nagona dika yaruae nia dibanga aha ma Jou Madutu wähukumu.

¹¹Mangale ngohi, Roriadodoto yadodoa ho ngohi hoko genangika dika ihi haturü nako ngohi katohi ngahuohi o huna madatoro gënanga iparalu? Nako ngohi igoungu tohi ngahu hoko gënanga, done tohi ngahu-ngahu mangale o Kristus ai salib yapudaua o loleha.

¹²Iholoi yaoa hagala o nyawa yaroruae nia dibanga gënanga gila-gila dika yohupu kamamoi o jemaatoka!

¹³Riadodoto ngona ini ahokoka la nodadi o nyawa yololapahi. Mä uhali nia päke nia lapahi madodagi gënanga la kahoko genangika niadiai okia dika ngini nionö nahihu niadiai. Iidulu yaino, ngini kokiani nimakodora deʼ nima teke leleani.

¹⁴ Mata-mata o agama matita yatipokoino o tita moi nënanga magoronaka, ”Kokiani ngona nädora ani dodiawo o nyawa hokä ngona nödora ani diri mahirete.”

¹⁵Mä nako ngini nima kokoroputu, nimahidodiai, done ngini kamamoi niwedere.

¹⁶Ngohi ahi dungutu hoko nena: Mal̄aikala ma Jou Madutu ai Womaha inï tuda ngini deʼ uhali niwango imoteke o nyawa nanga biaha manahihu.

¹⁷ Hababu o nyawa nanga nahihu ima roributu de ma Jou Madutu ai Womaha mangigo, deʼ ma Jou Madutu ai Womaha mangigo ima roributu de o nyawa nanga nahihu. Hinotö ima roributu, hiädono ngini niakunua niadiai okia ngini nio igo-igo.

¹⁸Mä nako ma Jou Madutu ai Womaha inïtuda ngini, done ngini ini kuahaua o agama matita.

¹⁹O nyawa nanga biaha manahihu inyata o manarama isösafarune magoronaka, ipese-peseke, deʼ ipatutua;

²⁰o gomanga yahuba-huba magoronaka, o guna-guna; imateke höhaturü magoronaka, imakoka ngamo, imaka ngakua, itaiti yätohata, deʼ ihi akunu manga diri mahirete; o gitingaka, de imakokafara,

²¹o hininga imä kogogono, kayä dalu-dalukika, kayo rame-rame deʼ mangöeohi mahomoa. Gënanga dau honangika mata-mata öraha nanga ngohi tinihi döaka o hohininga nginika hoka sarakia mahiraö ngohi tinihidöaka o hohininga nginika, hagala o nyawa yododiai o hali-hali hokä hoko gënanga aha yodadiua o gegëtongo ma Jou Madutu ai umati.

²²I idulu yaino, nako o nyawa yätuda-tuda ma Jou Madutu ai Womaha, mahasili genangala: Onanga imäkodora, önanga yogarago, önanga manga hininga irïdi, önanga yosabari deʼ manga hininga ihailoa, önanga yaoa o nyawa mahomoaika, önanga yosetia,

²³önanga manga hininga itipokouku, deʼ salalu yakunu yakuaha manga diri. Koiwa naga o agama matita yöduhunu o hali-hali hokä hoko gënanga.

²⁴Hagala o nyawa yodädadioka to Kristus Yesus, o nyawa geönanga yahohonengoka o nyawa mabiaha de hagala o hininga i totorou deʼ toëna manahihu.

²⁵Ma Jou Madutu ai Womaha inahi döakoka ngoneino o wowango mahungi; mangale hababu gënanga enangö kokiani yakuaha nanga wowango.

²⁶Yakunua ngone hodadi nanga hininga ikurutil̄e, deʼ manga hininga hahiri, de o hininga homako gogono moi de moi.