Read Tobelo O GALATIA 6 Bible Online

O GALATIA 6 - Tobelo bible

O GALATIA 6

¹Roriadodoto! Nako o nyawa womatëngo niwi mäke o baradoha moi wodiai, kokiani niwö wango-wango niamoteke ma Jou Madutu ai Womaha, niwituda o nyawa gënanga womakilioro o ngëkomo madiai ika. Mä kokiani ngini niadiai gënanga niwi bole-bole, deʼ nimä göana uha hiädono ngini mahirete inï däene o bobaja.

²Kokiani ngini nima kokabatumu nia tagongo o nyawa manga gina, hupaya de hoko gënanga ngini nia motekoka o Kristus ai pareta.

³Nako o nyawa womatëngo watobote ai diri duru i baraguna, ena hioko kowali, o nyawa gënanga waeluku ai diri mahirete.

⁴O nyawa amomoi kokiani yatailako manga diri boteka ai kalakuanga yaoa ekola kowali. Nako yaoa, ünanga yakunu wamäo ai hininga ilamoko de o hali gënanga. Mä ngaro uha ünanga wohi tero-tero de okia o nyawa mahomoa yadodiai.

⁵Hababu moi-moi o nyawa kokiani yamoku mahirete imahi tagongo mabobaluhu.

⁶O nyawa yatotarima o Kristus ai dodötoko, kokiani imahidoku de ai guru okia naga unangoka maoa-oa, mata-mata.

⁷Uha inï tipu. Ma Jou Madutu idadiua imahi gogule! Okia yadatomo, genangala yautuku.

⁸Nako o nyawa yodatomo imoteke o nyawa mabiaha, ünanga aha wautuku o honenge mabiahaino gënanga. Mä nako ünanga wodatomo imoteke ma Jou Madutu ai Womaha matutuda, ünanga aha wautuku o ngango madutu deʼ ikakali ma Jou Madutu ai Womahino.

⁹Hababu gënanga, uha ngone högihounu hodiai o hali maoa-oa; hababu nako ngone homatogumua hodiai o hali gënanga mamoiuku ngone ahaö hautuku mahasili.

¹⁰Hoʼ madëkana de magurutu naga o öraha ngoneoka, kokiani ngone hodiai o oa-oa o nyawa mata-mataika, maboboloi nanga roriadodotika homa teke o ngongaku moi.

¹¹Nia tailako nihidodiai o hidoku nënanga ngohi mahirete totulihi de madulihi mapako-pako.

¹²Hagala o nyawa yomau-mau ihi hohihira manga diri de o hali hamö mäke-mäke, geönanga ihidödailako inï pakisa ngini nia moteke o huna madatoro. Mä onanga yadiai gënanga duga-duga hupaya önanga yä aniayaua o Yahudi manyawa mangale karana o Kristus ai salib.

¹³Hagala o nyawa yanö ninïki o huna madatorö ma ihi dagiua o agama matita. Mä onanga yomau ngini inï huna, hupaya önanga yakunu imahi amoko bari ngini nia moteke o datoro gënanga.

¹⁴Mä ngohi mahomoa de tongone nanga Jou Yesus Kristus wohone-honengoka o saliboka, hakali-kali kaokianaga moiö de toluku tohi amoko. Hababu itiai karana Unanga wohonengoka o saliboka, ho o dunia okiakaua mamangarati ngohino. Deʼ o duniaika nënanga, ngohiö ma hokä tohonengoka.

¹⁵Ima huna ekola ima hunaua, gënanga hohi amokua. Hohi amo-amoko genangala hodadi o nyawa mahungi.

¹⁶Hagala o nyawaika yowö wango-wango de manga da mäke gënanga deʼ hoko genangoli mata-mata ma Jou Madutu ai umatika, ngohi tonganono ma Jou Madutu aha wahidöaka o lolä deʼ Ai hayangi de ai dora.

¹⁷De ikali, ka o nyawa moiö de uhali o huha nihidiaioli, hababu tongohi ahi röehoka naga manyonyata igoungu ngohi o Yesus tinö ninïki.

¹⁸Tanu o Yesus Kristus tongone nanga Jou salalu winihi barakati Roriadodoto. Amin. Tongomi mia horomati, o Paulus