Read Tobelo O EFESUS 1 Bible Online

O EFESUS 1 - Tobelo bible

O EFESUS 1

¹ Ma Jou Madutu ai umati o Efesus ma bereraoka, niso setia o Kristus Yesusika!

²Ngohi, o Paulus, o Kristus Yesus ai rasul mangale de ma Jou Madutu ai mau, tonganono tanu tongone nanga Ama ma Jou Madutu deʼ o Jou Yesus Kristus winihidöaka o barakati de o lolä nginika.

³O higiriri ma Jou Madutu, tongone nanga Jou Yesus Kristus ai Ama! Unanga wonahi barakati ngone de hagala o barakati o rohani mabarakati o horoga magoronaka, karana ngone horimoi de o Kristus.

⁴O dunia nënanga wohidadi uwahi, ma Jou Madutu wo na irikoka ngone itilakuru o Kristus de madungutu hupaya ngone hodadi to Unanga madutu woma dinga-dingakoka deʼ makuranga koiwa Ai himangoka. Karana ma Jou Madutu ai dora,

⁵Unanga wohi tantuoka iholoi ihira itilakuru o Yesus Kristus, aha Unanga wonä goraka ngone hodadi Ai ngoha-ngohaka mahirete. Deʼ igoungu woigo wadiai gënanga.

⁶O higiriri ma Jou Madutu womomulia, karana itilakuru Ai Ngohaka wi igo-igo Unanga duru wona dora ngone.

⁷ Hababu, de o Kristus ai honenge, ma Jou Madutu wonahi lapahioka ngone, mamangarati Unanga wonahi apongoka tongone nanga baradoha.

⁸Unanga wodiai gënanga karana Unanga duru wona dora ngone, deʼ Ai dora gënanga de maboloioka ngoneino de i tötotomo Ai barija deʼ Ai mangarati.

⁹Imoteke Ai mau mahirete, ma Jou Madutu wohi ngahuoka ngoneino Ai datoro ma rahasia; Unanga waputuhoka Ai datoro gënanga aha wohitiai itilakuru o Kristus.

¹⁰O datoro gënanga ganga hupaya hagala moi-moi, yaoa o duniaka yaoa o horogaka idadi kamoi de o Kristus hokä wohi häeke. Deʼ o hali gënanga ma Jou Madutu aha wohi tiai nako maöraha yadonoka.

¹¹Ma Jou Madutu womanarama hagala moi-moi imoteke Ai ngigo deʼ Ai putuhu mahirete. Kamahirahi Unanga wona irikoka ngone hababu Unanga woigo hupaya ngone hodadi Ai umati karana horimoi de o Kristus.

¹²Mal̄aika ngone, madodihiraka hïnganono o Kristusika, higiriri ma Jou Madutu karana Ai mulia!

¹³Nginiö nidadioka ma Jou Madutu ai umati maöraha ngini ni ihene ma Jou Madutu ai behehongo, enagënanga o Abari ma Oa inihidöaka o halamati nginiika. Ngini ningaku o Yesus Kristusika, karana gënanga ma Jou Madutu wohidöaka o nonako nginika to Unanga madutu, enagënanga ai Womaha wohi jäjajika.

¹⁴O Womaha gënanga ina tagongo, ngone aha hatarima okia ma Jou Madutu wohi jäjajioka Ai umatika. Nënanga ihidöaka o ngongaku ngoneino ma Jou Madutu aha wonahilapahi Ai umati. O higiriri ma Jou Madutuika karana Ai mulia!

¹⁵Hababu gënanga, maöraha ngohi toihene ngini niwi ngaku ma Jou Yesusika, deʼ ngini nia hininga ma Jou Madutu ai umati mata-mata,

¹⁶itoa-toakua ngohi totarima kasi ma Jou Madutuika mangale ngini. Salalu ngohi tahëtongo nia römanga maöraha ngohi tomä niata.

¹⁷Ngohi togahoko laʼ nanga Jou Madutu tongone nanga Jou Yesus Kristus, o Ama womomulia, winihidöaka ai Womaha nginika. O Womaha gënanga aha ngini ini diai nibarija, deʼ aha ihi matoko ma Jou Madutu nginika hiädono ngini niwi näko Unanga.

¹⁸Ngohi togahoko hupaya ma Jou Madutu wahelenga nia dibanga hiädono idadi itararono; la ngini nimangarati okia ngini yakunu nio nganono ma Jou Madutuino ngini wini ahoko. Hoko genangö la ngini nihi öriki hokokia de maboloioka o barakati-o barakati ihohailoa ma Jou Madutu wohidiai ukuoka mangale Ai umati;

¹⁹deʼ hokokia magiria ma Jou Madutu womanarama de Ai kuaha itötomo ngoneoka hongaku-ngaku. Ma Jou Madutu ai kuaha gënanga hokä imatero o kuaha kabiahaua,

²⁰ wa päke-päke maöraha wihiwango okali o Kristus o honengino deʼ wihi döaka Unangika ai pangkati magö gurutil̄e imaki nïki de ma Jou Madutu o horogaka.

²¹O Kristus ai pangkati gënanga iholoi ikurutil̄e de hagala o popareta manga pangkati, hagala yokokuaha, hagala o tutuda, hagala o tua-tuanga deʼ o nagonaö dika yahi döaka o pangkati magögurutil̄e; yaoa yowango öraha nënanga, yaoa yowango öraha aha iböa.

²² Ma Jou Madutu wapareta mata-mata o Kristus ai kuaha matimioka, deʼ wahidöaka o Kristus o jemaatika hokä wohi häeke hagala moi-moi.

²³O jemaat ganga o Kristus ai röehe, wohi totomoka mangale Unanga hagala moi-moi kiaka ö dika.