Read Tobelo O EFESUS 2 Bible Online

O EFESUS 2 - Tobelo bible

O EFESUS 2

¹ Ngini mahira nihonenge hokä rohani, karana ngini nibaradoha de nia tilakuru ma Jou Madutu ai pareta-pareta.

²Oraha gënanga ngini nianïki o dunia nënanga mabiaha; mamangarati ngini nihingounu o gitawa ma amo-amoko makuahaika, enagënanga o womaha öraha nënanga yakuaha o nyawa manga hininga iwihi ngou-ngounua ma Jou Madutuika.

³Ngone ma hira mata-mata kaho make tero dika dede önanga; ngone howango hamoteke tongone o nyawa nanga biaha deʼ hadiai okia yasanangi nanga röehe deʼ nanga dibanga. Oraha gënanga ngone ganga manyawa ina korona ma Jou Madutu ai dohata, hokä imatero o nyawa mahomoa.

⁴Mä hokokia ma amoko ma Jou Madutu ai hininga maoa! Hoko gënanga Unanga wonahininga ngone,

⁵hiädono maöraha ngone kaho honengohi de madodagi o rohani karana nanga dodilakuru ngone, Unanga wonahi wango okali ngone homa kinïki de o Kristus. Ho, duga-duga karana ma Jou Madutu ai hininga maoa de gënanga ngini inihi hälamatoka.

⁶Karana ngone horimoi de o Kristus Yesus, ma Jou Madutu wonahi wango okali ngone homakinïki dede Unanga, hupaya ngoneö hopareta homakinïki dede Unanga o horoga magoronaka.

⁷Ma Jou Madutu wodiai gënanga hupaya maöraha aha iböa, o nyawa yakunu yamäke, hokokia ma amoko ma Jou Madutu ai dora. O dora gënanga ma Jou Madutu wohimatoko itilakuru Ai hininga maoa ngoneino, de madodagi o Kristus Yesus.

⁸Ma Jou Madutu wini hininga ngini, hababu gënanga Unanga wini hihalamati ngini karana ngini niwi ngaku o Yesusika. Nia halamati gënanga nia manaramua mahirete mahohoko. Enagënanga ma Jou Madutu ai ngongike. Ho, o nyawa moiuaö de koiwa yakunu ima hil̄e manga diri mangale o hali gënanga.

¹⁰Ngone nënanga ma Jou Madutu ai dodadi, deʼ itilakuru o Kristus Yesus, ma Jou Madutu wonatiai ngone hupaya ngone hadiai o hali maoa-oa watiai ukuoka mangale ngone.

¹¹Roriadodoto o Yahudi okaua manyawa! Nio hininga nia wowango öraha mahira: Ngini inï hetongo ö nyawa ima hunaua”, o Yahudioka manyawa ima ngaku manga diri ima huna (madungutu önanga yamäkeoka o nonako o nyawa yadodiai manga röehoka önanga).

¹²Maöraha gënanga ngini nirimoiua de o Kristus, ngini ganga o nyawa maporetino iwohamua umati ma Jou Madutu ai ngongiriki. Ngini iwohamua o jaji maliliko magoronaka ma Jou Madutu wadodiai de Ai umati. Ngini niwango o dunia magoronaka nënanga nia nganono koiwa, nia Jou Madutu makoiwa.

¹³Mä oraha nënanga, karana ngini nirimoioka de o Kristus Yesus, ngini mahira nikurutika, mangale o Kristus ai honenge inihi tigioka.

¹⁴Hababu o Kristus mahirete ganga wonahidö dame-dame ngone. Unanga wahirimoioka o Yahudioka manyawa deʼ Yahudi okaua manyawa yodadi o hoana moi. O bebeno yahi kokitingaka toönanga manga hidogoronaka, enagënanga ima teke haturu, o Kristus wawederoka de Ai diri mahirete wohihuba.

¹⁵ O Yahudioka manga agama matita de mapareta-pareta de madatoro-madatoro waeheoka o Kristus hupaya o hoana hinoto gënanga yodadi o nyawa kao hoana moi o nyawa mahungi, kamoi dede Unanga. De madodagi gënanga o Kristus wodiaioka o dame.

¹⁶ Mangale Ai honenge o saliboka, o Kristus wahirimoioka o hoana hinoto gënanga, deʼ wahika dameoka önanga de ma Jou Madutu, hiädono o haturu gënanga ihihangoka.

¹⁷ Hababu gënanga o Kristus woböa mangale wohi ngahu o Abari ma Oa mangale o dame gënanga nginika; ya oa nginika o Yahudi okaua manyawa, kahuruono nikurutika de ma Jou Madutu, yaoa o Yahudi manyawa yotigi ma Jou Madutuika.

¹⁸De madodagi o Kristus, ngone mata-mata — yaoa o Yahudi manyawa ya oa o Yahudiua manyawa — mangale ma Jou Madutu ai Womaha kamoi, yakunu hitigika o Ama womomulia.

¹⁹Hababu gënanga, ngini iwohamoka uaoli o nyawa o berera madutua ekola o nyawa maporetino. Oraha nënanga ngini ganga ma Jou Madutu ai umati manyawa mata-mata. Ngini ganga ma Jou Madutu ai tau madol̄a manyawa.

²⁰Nginiö ihi gokoka o hohol̄e mal̄okuoka yakelengaka o rasul-rasul deʼ o nabi-nabi, de o Kristus Yesus hokä o helewo duru mal̄okuoka.

²¹Unanga watatoro wohi goko mata-mata gënanga, idadi ma Jou Madutu ai Tau watinga-tingakoka mangale o Jou.

²²Karana o ngango irimoi de o Kristus, nginiö inihi goko magogiria nimakinïki de o nyawa mahomoa nidadi o tau moi mangale ma Jou Madutu; genangoko ma Jou Madutu wogogere de Ai Womaha.