Read Tobelo O EFESUS 4 Bible Online

O EFESUS 4 - Tobelo bible

O EFESUS 4

¹Hababu gënanga ngohi — o bui manyawa moi, ihi bui karana tileleani o Jou — kohagiria togahoko nginika: niwango imamoteke nia pangkati hokä o nyawa ma Jou Madutu wini aho-ahokoka.

² Kokiani ngini hoko genangika nia hininga itipokouku, nia hininga yabole, deʼ nisabari. Nihidumutu nia dora de nima kiriwo moi de moi.

³Nihidailako nia gou-goungu mangale niwango de o dame hupaya nia rimoi ma Jou Madutu ai Womaha yadodiai tatapu ipaliara.

⁴Duga-duga naga o röehe moi, deʼ o Womaha moi. Hoko genangö ngini ini ahoko mangale kao ngonganono moi.

⁵Duga-duga naga o Jou moi, o ngongaku moi, o gohiki madebi-debini moi,

⁶deʼ ma Jou Madutu moi wodadi o nyawa mata-mata manga Ama. Unanga o Jou o dunia magilolitino, womanarama itilakuru mata-mata, deʼ wakuaha magoronaka mata-mata.

⁷Ngone moi-moi hatarima o ngongike moi imoteke okia o Kristus wohidöaka.

⁸ Ma Jou Ai Demo ma Buku magoronaka itulihi, ”Maöraha Unanga wodoa o ngï magögurutil̄e, Unanga wä ao manga ngöe yobui-buika; deʼ Unanga wahidöaka o ngongike-ngongike o nyawaika.”

⁹Aa, nako mademo ”Unanga wodoa” mamangarati Unanga madodihiraka woutioka hiädono o ngï duru koha dipokouku o duniaka nënanga.

¹⁰Deʼ Unanga wouti-utioka gënanga, Unangö wodöaka hiädono o ngï duru koha gurutil̄e de hagala o dihanga hiädono o dunia magilolitino mata-mata yödol̄a genangoka dede Unanga.

¹¹Unanga ”wohidöaka o ngongike-ngongike o nyawaika”; utu yägoraka yodadi o rasul, mahomoa yodadi o nabi; mahomoali yodadi ihi ngahu-ngahu o Abari ma Oa gënanga, deʼ ma homoali yägoraka yodadi o guru-guru deʼ yopopaliara o jemaat.

¹²Wadiai nënanga hupaya ma Jou Madutu ai umati yahidiai ingodumu hupaya yakunu iwi leleani ma Jou deʼ ihi goko o Kristus ai röehe.

¹³De hoko gënanga ngone mata-mata hodadi kamoi mangale o ngongaku kaimadäene deʼ o mangarati kaimadäene mangale ma Jou Madutu ai Ngohaka. Deʼ ngone hodadi o nyawa o baluhu iholoi itedekana iholoi idogo itiai hokä o Kristus.

¹⁴Ma ngone hodadiokaua o ngoha-ngohakohi, kahopuda-puda deʼ ina ao yakaika yakaino mangale o dodötoko mabauhu irupa-rupa o nyawaino iwöe-wöe manga akali madorou. Onanga yahirehene o nyawa de manga akali madorou.

¹⁵Kowali! Ikilioro yaino ngone kiani hohimatoko o hali-o hali madiai de nanga hininga iomanga o dora, hiädono hagala o hali magoronaka ngone iholoi itedekana iholoi idadi hotiai hokä o Kristus, wodadi wonahi häeke ngone.

¹⁶ Ai tutuda matimioka, o röehe mahidoku gënanga mata-mata itatoro irahai, deʼ ihi kokodohanga mangale o kobongo mangafoko moi-moi. Deʼ nako o röehe mahidoku moi-moi gënanga imanarama hokä hoko kiani, done o röehe ingodumu gënanga aha ihero idadi ibaluhu deʼ ikuata yatilakuru o dora.

¹⁷Hababu gënanga de o Jou ai romanga, nënanga ngohi aha totemo de tohi totiaika: uhali niwango hokä o nyawa iwi näko-näkoua ma Jou Madutu, deʼ yatibanga ipoparahaja.

¹⁸To önanga manga dibanga ihuhutuoka. Onanga yanakoua o wowango ma Jou Madutu wahi döa-döaka, hababu önanga kautuö de koiwa okia toönanga manga ganäko mangale ma Jou Madutu. Hoko gënanga önanga, karana manga häeke itogowini.

¹⁹To önanga manga mal̄ekö makoiwa, hiädono önanga yamoteke hagala manga nahihu madorou, de yowango howono de manga hininga mahuka.

²⁰Mä o Kristus Yesus ngini niwi näko-näko hoko genangua!

²¹Ngini ni ihenoka mangale Unanga! Deʼ hokä niwininïki, ngini ini dotokokaö mangale ma Jou Madutu Unangoka naga Ai biaha!

²² Hababu gënanga nia mal̄a o nyawa ihira-hira de o wowango madulada ihira-hira magogiria yadadi dorou mangale o nahihu-o nahihu inihi rehene.

²³Kokiani nia hininga deʼ nia dibanga nia hungi mata-mata.

²⁴ Kokiani ngini niwango hokä o nyawa mahungi nihïdadioka imoteke ma Jou Madutu ai dulada; enagënanga de nia biaha madiai, irikoto deʼ itebini.

²⁵ Karana gënanga Roriadodoto mata-mata, uhali nieluku. Nidiai nia hininga irikoto moi de moika, hababu ngone mata-mata ganga o Kristus ai röehe mahidoku mata-mata.

²⁶ Nako ngini ningamo, uha nia mal̄aika nia gangamo gënanga, ngini inidiai hababu nibaradoha. Uha ningamo o wange moi iahumu,

²⁷hupaya o Ibilihi ima mäkeua o öraha.

²⁸O nyawa manga biaha yotohi-tohiki kiani imatogumu yotohiki. I idulu yaino önanga yomanarama hupaya yamäke manga inomo o wangeil̄e de manga hininga iriko-rikoto deʼ yakunu yäriwo o nyawa yokura-kuranga.

²⁹Nako ngini nitemo-temo uha nihi demo, o demo ipese-peseke. Nia päke dika o demo-demo yahimomiki deʼ yahidöaka o roriwo o nyawa mahomoaika. O demo-demo hoko gënanga aha yägao o oa o nyawa yoihe-ihenika.

³⁰Uha nia huha ma Jou Madutu ai Womaha mahininga. Ngini ini sapuoka de o Womaha, nidadi to Jou Madutu. O Womaha genangö hokä o roriwo o Lapahi ma Wange aha iböa nginika.

³¹Nia hihanga hagala o mamäo o hininga mahiri, nima kogogono o hininga madohata deʼ o gangamo. Uhali nima pöa-pöaka deʼ nidoa-doana. Uhali naga o mamäo o dohata ekola o mamäo mahomoa marupa hoko gënanga.

³² I idulu yaino, ngini kiani nia hininga maoa, deʼ nimakodora moi de moika, de nimahika apongo hokä ma Jou Madutuö winihi apongo ngini itilakuru o Kristus.