Read Tobelo O EFESUS 6 Bible Online

O EFESUS 6 - Tobelo bible

O EFESUS 6

¹ Ngoha-ngohaka! Hokä iwininïki o Kristus, nia hingounu nia dimono karana gënanga ipatutu niadiai.

² ”Nia horomati nia ayo deʼ nia ama” ganga o pareta madodihiraka dema jaji ma Jou Madutuino,

³enagënanga: ”Hupaya ngona noutumu deʼ ani umuru ikurutu o duniaka nënanga.”

⁴ Roriadodoto nidadadi o ama! Uha niadiai hoko gënanga marupa nia ngoha-ngohakika, hiädono idadi önanga yongamo. Ma kokiani, nia hidalamoko önanga de o datoro maoa-oa deʼ o Jou ai dodötoko.

⁵ Roriadodoto nidadi o gilaongo! Nia moteke nia tuanga ai pareta o duniaka nënanga. Niadiai gënanga de nia mamäo dema horomati deʼ nia hingounu de magou-goungu, matero-tero ngini niadiai o Kristusika mahirete.

⁶Uha nidiai hoko gënanga duga-duga maöraha ngini ini göana, duga-duga mangale nia mäke o nyawa mahigiriri. Mä kokiani ngini niadiai hokä o Kristus ai gilaongo magogiria nia moteke ma Jou Madutu ai mau, de nia hininga itototomo.

⁷O manarama ngini nia dodiai hokä o gilaongo gënanga, kiani ngini nimanarama de nia hininga imore-morene, matero-tero ngini niwi leleani o Jou deʼ duga-duga o nyawaikaua.

⁸Nio hininga o nyawa moi-moi, yaoa o gilaongo yaoa o gilaongua, aha yatarima mabalahi o Jouino mangale o hali maoa-oa yadodiai.

⁹ Roriadodoto nidadi o tuanga! Kokiani ngini nidiai hoko genangoli nia gogilaongika. Ibötohi niadiai o huha. Nio hininga ngini deʼ nia gogilaongo gënanga mata-mata kania tuanga womatëngo, enagënanga o Jou o horogaka. Unanga wapulonua o biono.

¹⁰Mabaha, kiani ngini nidadi nikuata de o kuata ngini nia mäke o Jou ai kuahaino, karana ngini nirimoi de Unanga.

¹¹Nia päke o kudoti madaë ingodu-ngodumu winihi döakoka ma Jou Madutu nginika, hupaya ngini niyakunu nima tumungu nia lawani ma akali madodagi isosawaro o Ibilihino.

¹²Hababu ngone hakudoti o nyawaua halawani, mä halawani hagala hetanga makuata yakuaha öraha itotorou nënanga. Ngone halawani o womaha madorou makuata yakuaha o gitawaino.

¹³Hababu gënanga, öraha nënanga nia päke ingodumu ma Jou Madutu ai kudoti madaë, hupaya ma wange itotorou ngini niyakunu nia lawani nia haturu makudoti. Deʼ hupaya tingini nia kudoti hiädono mabaha ipaha, ngini kani kua-kuatohi.

¹⁴ Kiani ngini nimahidodiai nima göana. Nia päke o setia ma Jou Madutuika hokä o gorona maninikutu, deʼ nia hininga madebi-debini hokä nia baju o behi.

¹⁵ Kiani de nia igomangale nihingahu o Abari ma Oa iyao o lolä, idadi nia hapato.

¹⁶Oraha mahigetongo nia päke o ngongaku ma Jouika hokä o dadatoko; de o ngongaku gënanga ngini yakunu nia honenge mata-mata o toimi madoto o uku iwi totorouino.

¹⁷ Nia l̄ë o halamati hokä sapeo o waja, de ma Jou Madutu ai demo hokä o oworo ma Jou Madutu ai Womahino.

¹⁸Nia diai mata-mata gënanga de nimä niata mangale nigahoko o roriwo ma Jou Madutuino. Oraha mahigetongo, nimaniata hokä sarakia ma Jou Madutu ai Womaha inituda ngini. Kiani hoko genangika ngini nimagöana deʼ uha nimaike. Hoko genangika nima niata mangale mata-mata ma Jou Madutu ai umati.

¹⁹Deʼ nima niatö mangale ngohi, hupaya maöraha ngohi totemo-temo, ma Jou Madutu wohihi döaka ngohino o demo-demo madiai. Deʼ hupaya ngohi de ahi barani takunu tohi ngahu o Abari ma Oa marahasia gënanga.

²⁰Karana o Abari ma Oa gënanga, ngohi todadi o huhuloko, deʼ oraha nënanga naga o bui magoronaka. Nima niata hupaya ngohi tobarani totemo-temo mangale o Abari ma Oa gënanga, hokä sarakia kokiani ngohi totemo-temo.

²¹ O Tikhikus, tongone nanga riadodoto deʼ woleleani wososetia o Jou ai manarama magoronaka, aha winihi ngahu nginika hagala moi-moi mangale ngohi, hupaya ngini nihi öriki tongohi ahi wowango deʼ tongohi ahi manarama.

²²Hababu gënanga ngohi tihuloko ünanga nginika mangale winihi ngahu nginika mangale tongomi mia wowango mata-mata, hupaya nihikuata nia hininga.

²³Tanu o Ama ma Jou Madutu, deʼ o Jou Yesus Kristus wohigumal̄a o jemaat yongodumu mangale yorimoi deʼ ima teke hininga inoli itatapu iwi ngaku o Kristusika.

²⁴Tanu ma Jou Madutu winihibarakati Riadodoto mata-mata niwi hohininga tongone nanga Jou Yesus Kristus de o dora ihone-honengua. Tongomi mia horomati, o Paulus