Read Tobelo O PILIPI 1 Bible Online

O PILIPI 1 - Tobelo bible

O PILIPI 1

¹ Roriadodoto ma Jou Madutu ai umati nigö gogogere o Pilipi mabereraka deʼ nirorimoioka de o Kristus Yesus. Inoli Roriadodoto o tutuda de o jemaat maroriwo! Ngohi, o Paulus kamamoi de o Timotius o Kristus Yesus ai gogilaongo,

²minganono tanu ma Jou Madutu tongone nanga Ama, deʼ ma Jou Yesus Kristus winihidöaka Ai barakati deʼ o lolä nginika.

³Mamoi-mamoi ngohi tomahininga nginika, ngohi totemo tarima kasi ma Jou Madutuika.

⁴Deʼ mamoi-mamoi ngohi tinï niata Riadodoto mata-mata, ngohi tomä niata de ahi hininga i sosanangi.

⁵Ngohi totarima kasi ma Jou Madutuika karana kama wange madodihirakahi hiädono öraha nanga, ngini nihibatumoka ngohi nihibarihi o Abari ma Oa ma Jou Madutuino.

⁶Ma Jou Madutu mahirete wamuläenge o manarama maoa-oa gënanga nginioka, deʼ ngohi tönganono de tohigoungu Unanga aha wohi gila-gila o manarama gënanga hiädono iböto ma Wange o Kristus Yesus woböali.

⁷Igoungu to ëna mangï de tongohi ahi mamäo hokä hoko gënanga nginika, hababu Riadodoto mata-mata salalu nitigi ahi hiningaika. Inoli hababu ngini homakomoteke dede ngohi hatarima o ngongike ma Jou Madutu wohihi döa-döaka ngohino; kaya oa o öraha nënanga itai-taitino ngohi o bui magoronaka kaya oali maöraha ngohi naga maporetoka mangale töriwo de törigao o Abari ma Oa gënanga.

⁸Ma Jou Madutu wohihi öriki i goungu ngohi duru tinï hininga de tinï nganono nginika de o mamäo o dora i bitu-bitumu o Kristus Yesusino mahirete.

⁹Nënanga doka tongohi ahi niniata mangale ngini; tanu ngini kai dogo-dogo niwï dora ma Jou Madutu de nia dodiawo o nyawa deʼ i gila-gila idogo iluku o ganako madiai magoronaka deʼ o lolega i sosawaro.

¹⁰De hoko gënanga ngini nihi öriki nimä ngiriki okia duru maoa-oa, deʼ nia wowango aha i tebini de o howono, ekola o galaki okia dika ma wange o Kristus woböali.

¹¹Nia wowango aha dema boboloi de o manarama i gou-goungu maoa kiaka duga-duga yakunu o Yesus Kristus mahirete wohi döaka mahasili; done ma Jou Madutu aha i wihimulia deʼ i wihigogiriri.

¹²Ngohi tomau ngini nihi öriki, hagala o hali i dädadioka ngohioka kai dogo idadi o hababu i holoi yowöe o nyawa yoihene de yongaku o Abari ma Oa gënanga.

¹³ Mabaha, mata-mata o kadato magogöana deʼ o nyawa mahomoahi o bereraka nënanga ihi öriki ngohi ihi bui karana ngohi tïleleani o Kristus.

¹⁴Deʼ ngohi i hi bui idadioka o hababu manga ngöe o Haranioka manyawaino o bereraka nënanga iholoi ihi goungoli mangale ma Jou, hiädono önanga idogo-dogo yobarani i hi abari ma Jou Madutu ai behehongo de yohawa-hawanua.

¹⁵Itiai naga yamuruono toönanga manga higoronaka ihi ngahu o Kristus karana o hininga imä kogogono deʼ yomau imateke ributu, mä mahomoali ihi ngahu o Kristus karana manga dungutu madebi-debini.

¹⁶O nyawa neönanga yodiai karana önanga iwï dora ma Jou Madutu deʼ ngohi, hababu önanga ihi öriki ma Jou Madutu wohi hulokoka ngohi mangale tohidumutu o Abari ma Oa gënanga itiai.

¹⁷Mä mahomoa o nyawa ihi ngahu o Kristus de madungutu itorou; önanga ihi ngahu mangale ima tëngo-tëngo manga paralu. De gënanga önanga yönganono yakunu yadiai ngohi iholoi tohuha o bui magoronaka.

¹⁸Mä yadodoaua! Hababu ngaro sarakia nagali, kayaoa gënanga yodiai de ma dungutu i tebini, kayaoaoli de manga dungutu ihowono, ka o Kristus dika ihi ngahuoli; ho ngohi tosanangi. Deʼ ngohi aha i tatapu tamäo hoko gënanga.

¹⁹Hababu ngohi tohiöriki de hagala tingini nia niniata deʼ de o bobatumu o Yesus Kristus ai Womaha, ngohi aha ihihi lapahi.

²⁰Ngohi duru töigo-igo deʼ töngano-nganono ena genangala uha hakali-kali ngohi tohasilua tongohi ahi manarama magoronaka. I idulu yaino ngohi tönganono hupaya o öraha higëto-gëtongo, maboboloioli öraha nanga, ngohi takunu tomasadia tobarani hiädono de tongohi ahi jiwa de ahi röehe magahumu — kayaoa ngohi towango ekola tohonenge — iti o Kristus iwi himulia.

²¹Karana mangale ngohi, tongohi ahi wowango madumutu duga-duga o Kristus! Deʼ o honenge mamangarati o utumu.

²²Mä nako de o wowango o duniaka nënanga, ngohi takunu tadiai o manarama iholoi ifofaidä, done ngohi tohiorikua kiaka kokiani ngohi tairiki.

²³Ngohi ihi tauru ari hohononga. Ngohi duru töigo tamal̄a o dunia nënanga la toiki togogere de o Kristus, hababu gënanga doka duru yaoa;

²⁴mä mangale tingini nia paralu, ganga iholoi yaoa nako ngohi i tatapu togogere o duniaoka nënanga.

²⁵Ngohi i goungu tongaku mangale o hali gënanga. Mahababu gënanga ngohi tohiöriki ngohi aha i tatapu togogogere dede ngini Riadodoto mata-mata, hupaya takunu tinï riwo ngini idadi iholoi nikuata deʼ i dogo-dogo nisanangi nia ngongaku magoronaka ma Jouika.

²⁶Hababu gënanga, nako ngohi dahaö toma iduloli nginino, ngini nirorimoioka de o Kristus Yesus aha iholoi i wöeoli nia hababu la nima mäo nilamoko de tongohi ahi diri.

²⁷Aa, duru hohiamoko öraha nanga ena genangala ngini niwango imatero de okia i gaho-gahoko o Abari ma Oa mangale o Yesus Kristus gënanga. De hoko gënanga boteka ngohi yakunu homaka mäke dede ngini ekola kowali, ngohi aha toihene ngini ikuata nirimoi deʼ nimateke rorebe nima kokutuono mangale duga-duga o dungutu moi deʼ kamoi nia ngigo; enagënanga mangale o ngongaku imatero de o Abari ma Oa ma Jou Madutuino gënanga.

²⁸Kokiani ngini salalu nibarani; uha niä modongo nia haturü-haturüika. De hoko gënanga ngini nihidumutu maraioka önanga aha yohihanga, deʼ ngini aha niutumu, karana ma Jou Madutu mahirete winihi döaka o utumu nginika.

²⁹Hababu ma Jou Madutu winihi döakoka o ngongike nginika koigoungua duga-duga kaniwi ngaku o Kristusika, mä inoli la nia tagongo o hangihara de o Kristus.

³⁰ Oraha nanga nginiö homakokomoteke dede ngohi o magoronaka; ena genangala ngini nia mäkeoka ngohi mahira to, deʼ kahirahiohi to hiädono öraha nanga, hokä öraha nanga ngini ni ihenoka.