Read Tobelo O PILIPI 4 Bible Online

O PILIPI 4 - Tobelo bible

O PILIPI 4

¹Gënanga mahababu, ahi Roriadodoto tinï hohininga, kokiani hoko gënanga ngini niwango nia gou-goungu niwi ngaku ma Jouika. Tongohi ahi hininga tinï hohininga de tinï ngano-nganono nginika! Ngini hö ahihininga tohi lamo-amoko de yadiai ngohi tomörene.

²Ngohi hiranga o ngo Euodia deʼ ngohi hiranga o ngo Sintike! Ngohi togahoko de magiria hupaya ngohi hiranga nima hininga moi hokä o nyawa yongaku-ngaku o ngongaku moi.

³Tongohi ahi dodiawoika yososetia, ngohi togahokoli hupaya Riadodoto niä batumu o ngoheka yahinoto gënanga. Onanga yomanaramoka yakai goungu mima kokinïki dede ngohi, mangale mihi ngahu o Abari ma Oa ma Jou Madutuino; imatero hokä o Klemen deʼ mata-mata o nyawa mahomoahi yomomanarama mima kokinïki dede ngohi. To önanga manga roma-romanga naga o Nyawa yo Wango-wango manga Buku magoronaka.

⁴Tanu ngini salalu nimörene karana ngini niwangoka nirimoi de ma Jou. Mamoiohi ngohi tinï temo: kani more-morene!

⁵Kokiani mata-mata o nyawa yakunu yamäke nia jako o hininga maoa-oa. Hababu i tedekanokaua ma Jou aha woböa.

⁶Mangale okia dika mangarouha ni hawatere. Hagala o hali magoronaka, nimä niata deʼ niao nia gogahoko ma Jou Madutuika. Okia ngini niparalu, salalu nihi ngahu gënanga ma Jou Madutuika de nitemo tarima kasi.

⁷Done o lolä ma Jou Madutuino idädadiua o nyawa yakunu i mangarati, aha yögöana niahininga de niadibanga nirorimoioka de o Kristus Yesus.

⁸Mabobaha, Roriadodoto, nionoa nia dibangika, de o hali dema ija-ijaka, ipatutu ihi gogiriri, enagënanga hagala o hali i totiai, demahoromati, iadi-adili, itebi-tebini, imuti-mutiti, deʼ maoa-oa.

⁹Niadiai okia ngini nimä doto-dotokoka deʼ nia tarimaka ngohino; kayaoa ahi demo-demoka kayaoa tongohi ahi manaramoka. Ma Jou Madutu o lolä matiti, aha winitomoteke ngini.

¹⁰Tongohi ahi wowango o rimoi de ma Jou magoronaka ngohi tamäo duru toutumu, hababu hoko gënanga madëkana ipahaika, öraha nanga ngini niakunoli nio dibanga naga idädadi ngohioka. Ngohi ahi dungutu koigoungua ngini nihi wohangoka ngohi; ngini itiai nihihininga ngohi, mä ngini nia mäkeua o ngëkomo la nihidumutu.

¹¹Ngohi tahëtongo nënanga koigoungua karana ngohi tokuranguku, hababu ngohi tomä dotokoka tamäo yaoaka okia demaënanga naga.

¹²Ngohi tabiahaka towango ihihidukuranguku, deʼ inoli towango dema boboloioka. Ngohi tohi orikoka marahasia mangale töhimanga ngaro sarakiali naga idadi; kayaoa naga ahi hasili iwöe kayaoa naga tomihikini, kayaoa naga de maboloi kayaoa naga tokuranguku.

¹³De o kuaha o Kristus wohihi döa-döaka ngohino, ngohi naga de ahi kuata mangale töhimanga hagala rupa naga idädadi.

¹⁴Mä nako ngini nihiriwoka tongohi ahi huha magoronaka; deʼ okia nia diaioka gënanga itiai yaoa.

¹⁵ Roriadodoto o Pilipi manyawa! Ngini mahirete nihi öriki itiai, maöraha ngohi mahira tamal̄a o Makedonia, maöraha o Abari ma Oa gënanga ngohi tohibarihi madodihiraka, kangini o jemaat nima tëngo-tëngoka nihi batumu ngohi; ngini nimatö tëngo-tëngo nimahi moteke nia mäo marugi de mautumu dede ngohi.

¹⁶ Maöraha ngohi o Tesalonika mabereraka deʼ töparalu o bobatumu, i holoi de mamoi ngini nihidingoto o babatumu ngohino.

¹⁷Gënanga mamangaratiua ngohi duga-duga töigo tatarima o ngongike. Ngohi töigo-igo enagenangala hupaya ngohi yakunu tamäke hagala mahasili yödogo niautumu.

¹⁸ Ngohi tatarimaka mata-mata — inoli kadema boloioli! Nia ngongike mata-mata ngini nihidö dingo-dingoto, ngohi tatarimaka o Epafroditusino. Oraha nanga mata-mata ngohi topöparalu mata-mata tongohi de maënanga. Nia ngongike-ngongike nginioka gënanga ganga hokä o huhuba mabounu mahëmo-hëmoro ihi huba-huba ma Jou Madutuika deʼ watarima ma Jou Madutu de Ai hininga i sosanangi.

¹⁹Ma Jou Madutu ngohi tïhuba-huba, Ai kaya dema boboloi o Kristus Yesusoka, aha wohitotomo hagala nia paralu.

²⁰Iwihi gogiriri ma Jou Madutu tongone nanga Ama kahi ado-adonika! Amin.

²¹Nihi ngahu ahi tabea yongodumu ma Jou Madutu ai umatika yororimoi de o Kristus Yesus. Deʼ nia tarimali o tabea o roriadodotoka naga dede ngohi mima kokinïki nenangokadau.

²²Yongodumu ma Jou Madutu ai umati o kota magoronaka nënanga, maboboloi önanga ma Kaisar ai kadatoka yogögogere, i hi dingoto manga tabea nginika.

²³Tanu ma Jou Yesus Kristus winihi barakati ngini Riadodoto mata-mata. Tongomi mia horomati, o Paulus deʼ o Timotius