Read Tobelo O KOLOSE 1 Bible Online

O KOLOSE 1 - Tobelo bible

O KOLOSE 1

¹O Roriadodoto ma Jou Madutu ai umati o Koloseoka nisetia nirimoi de o Kristus! Hokä o Kristus Yesus ai rasul, — mangale ma Jou Madutu wohigoraka — ngohi, o Paulus mima kinïki de tongone nanga riadodoto o Timotius, minganono tanu ma Jou Madutu tongone nanga Ama winihi döaka o barakati de o lolä nginika.

³Ngomi mi ihenoka ngini niwi ngaku o Yesus Kristusika de ngini niahininga ma Jou Madutu ai umati mata-mata. Hababu gënanga maöraha ngomi mima niata mangale ngini, hoko genangika ngomi mitemo tarima kasi ma Jou Madutuika, tongone nanga Jou Yesus Kristus ai Ama.

⁵Ngini niwi ngaku deʼ ngini niwihininga, hababu ngini nionganono ma Jou Madutu okia aha wasadia o horogaka mangale ngini. Ngini ni ihenoka mangale o hali gënanga maöraha o Abari ma Oa madiai ihi ädono nginika.

⁶O abari ma Jou Madutuino gënanga yodogerewoto o dunia ingodumu, deʼ o nyawa manga ngango gila-gila yahibarakati de o abari gënanga, hokä imatero nia ngango ihi barakati kadeni ihene ngini mangale ma Jou Madutu ai hayanga de Ai dora igou-goungu nia ngaku.

⁷ O hali gënanga wohi adonoka Riadodotika o Epafras, mia dodiawo ngomi miwi höhininga. Unanga ganga o Kristus wimo mänarama wosetia womanarama mangale tongone nanga oa.

⁸Unangino ngomi mi ihene de ma Jou Madutuino ai Womaha makuaha ngini yakunu nimateke hininga.

⁹Hababu gënanga ngomi hoko genangika mima niata mangale ngini, ngomi kademi ihene mangale ngini. Ngomi migahoko ma Jou Madutuika la ma Jou Madutu ai Womaha winihi döaka nginika o barija deʼ o mangarati, hiädono ngini nihi öriki de madiai okia ma Jou Madutu ai mau.

¹⁰De gënanga ngini yakunu niwango imamoteke ma Jou Madutu ai mau, deʼ hoko genangika ai hininga nia sanangi, hiädono hagala moi-moi magoronaka ngini yakunu nihihupu o hali maoa-oa. Deʼ tingini nia ganäko mangale ma Jou Madutuö aha idogoli.

¹¹Tanu de ma Jou Madutuino ai kuaha i momulia, inihi kuata ngini hiädono ngini yakunu nia tagongo o hali moi-moi de nia sabari deʼ nia hininga i sosanangi,

¹²deʼ mia demo tarima kasi o Amaika. Hababu o Ama gënanga winidiai ngini ibaraguna nia tarima okia wasadiaka ma Jou Madutu mangale Ai umati, ai pareta i totararono magoronaka.

¹³Unanga wona hilapahioka ngone o huhutu ma kuahaino, deʼ wonatururuoka ngone ai Ngohaka wihohininga ai pareta magoronaika.

¹⁴ Mangale ai Ngohaka gënanga ngone inahilapahioka; mamangarati tongone nanga baradoha i apongoka.

¹⁵O Kristus ganga ma Jou Madutu ai diri ino madulada manyata hamo mäke-mäkeua; o Kristus ganga o ngohaka o riaka, iholoi mal̄okuoka de hagala idadadioka.

¹⁶Hababu itilakuru Unanga ma Jou Madutu wohidadioka hagala moi-moi o horogaka deʼ o dunia mal̄okuoka, hagala moi-moi hamäke-mäke deʼ hamäke-mäkeua, yongohamö hagala o womaha ikukuaha deʼ ipareta. O dunia nënanga ingodumu wohidadi itilakuru o Kristus deʼ mangale o Kristus.

¹⁷Hagala moi-moi koiwahi, o Kristus iholoi ihira nagaka. Deʼ karana Unanga dika hagala mata-mata naga mangïoka moi-moi.

¹⁸ Unanga ai röehe mahäeke, enagënanga o jemaat, karana Unanga gënanga o jemaat mawowango matiti. Unanga o ngohaka o riaka, madodihiraka iwihiwangokali o honengino, hupaya Unanga mahirete dika wodadi duru mal̄okuoka de ngaro hagala mata-mata.

¹⁹Ma Jou Madutu mahirete womau hupaya hagala mata-mata hamäke-mäke ma Jou Madutu ai dirioka, hamäkeö de mangodumu ai Ngohaka ai dirioka.

²⁰ Deʼ itilakuru o Ngohakö gënanga, ma Jou Madutu waputuhoka mangale hagala mata-mata wadiai imateke oa-oakali dede Unanga — yaoa hagala mata-mata o duniaka, yaoa o horogaka ma Jou Madutu wadiai gënanga i tilakuru ai Ngohaka ai honenge o salib magotaka.

²¹Ma hira ngini nikurutika de ma Jou Madutu. Ngini niwi haturu karana nia manarama deʼ nia dibanga itotorou.

²²Mä oraha nënanga, de ai Ngohaka ai honenge, ma Jou Madutu wodiai o dodohanga ngini dede Unanga idadi yaoa okali. De madodagi gënanga yakunu ngini ini ao niwi himanga ma Jou Madutu ai debi-debini magoronaka, itebini de koiwa makuranga.

²³Mä marai ngini kiani tatapu nisetia ningaku deʼ nima oko nibitumu nia ngongakuoka. Uha hiädono ngini nia pidili nia nganono ini hi döa-döakoka nginika maöraha ngini nia tarima o Abari ma Oa ma Jou Madutuino. O abari gënanga ihi ngahuoka o nyawa moi-moika o dunia ingodumu. Deʼ mangale genangö ngohi, o Paulus todadioka yoleleani.

²⁴Oraha nënanga ngohi tosanangi tatagongo o hangihara mangale tingini niaoa. Hababu de tongohi ahi röehe mahangihara, ngohi tangodumu okia kokiani o Kristus watagongo o hangihara mangale Ai jemaat, enagënanga Ai röehe.

²⁵Ma Jou Madutu wohihuloko ngohi todadi Ai jemaat maleleani mangale tingini niaoa. Ngohi tohi ngahu kiani o abari ma Jou Madutuino, ingodu-ngodumu,

²⁶enagënanga o abari o taongo iratu-ratuhu madekana ipahaika, ma Jou Madutu warahasiahi o nyawa mata-mataika, mä oraha nënanga wohimatoko Ai umatika.

²⁷Ma Jou Madutu womau wohimatoko Ai umatika gënanga, hokokia marahai deʼ mamulia Ai rahasia gënanga mangale o umati o nyawa yongodumu. O rahasia ganga gënanga: O Kristus naga nia diri ma goronaka, mamangarati ngini aha nia moteke nia mäo ma Jou Madutu ai mulia.

²⁸O Kristus genangala ngomi mihingahu o nyawa moi-moika. Ngomi mihi döaka o hohininga deʼ miä dotoko önanga mata-mata de hagala o barija. Tongomi mia dungutu enaganga hupaya o nyawa moi-moi yakunu yäao ma Jou Madutuika, hokä o nyawa yobaluhoka o rohani mahali magoronaka, karana yorimoioka deo Kristus.

²⁹Mangale tadono o hali gënanga, ngohi tohauku tomanarama. Ngohi tomanarama tagou-goungu de ahi kuata i ngodumu wohihidöakoka o Kristus ngohino, deʼ womanarama tongohi ahi diri magoronaka i ömanga de o kuaha.