Read Tobelo O KOLOSE 2 Bible Online

O KOLOSE 2 - Tobelo bible

O KOLOSE 2

¹Ngohi toigo ngini nihi öriki sarakia magiria ngohi tomanarama tagou-goungu mangale ngini deʼ mangale önanga o Laodikiaka de mata-mata ihi näko-näkoua tongohi ahi diri.

²Ngohi tadiai mata-mata nënanga la toönanga manga hininga idadi i kuata deʼ onanga imateke hininga hiädono önanga manga rimoi i kekete. De hoko gënanga önanga igou-goungu imangarati deʼ yongaku de yanako ma Jou Madutu ai rahasia, enagënanga o Kristus mahirete.

³O Kristus wahelengaka hagala ma Jou Madutu ai barija, deʼ ai sawaro ma hira i iu-iunu.

⁴Ngohi tinihi ngahu nënanga la uha ngini ini baja o nagona ö dika de manga uru mamutiti nginika.

⁵Karana ngaroka ngohitokurutika de ngini, nia pulono ngohi naga nia hidogoronaka ngini. Deʼ ngohi tomörene tini mäke ngini nihininga moi deʼ nia ngongaku i bitumu o Kristusika.

⁶Roriadodoto niwi totarimaka o Kristus Yesus hokä o Jou. Hababu gënanga kiani ngini niwango nirimoi dede Unanga,

⁷deʼ nimahi ngutuku Unangoka. Kiani ngini nima hikomomiki nia wowango de o Kristus hokä mahohol̄e. Kiani ngini duru ningaku o Kristusika, imoteke okia ini dotokoka nginika. Deʼ kiani nia hininga i hebu-hebulu de mademo tarima kasi.

⁸Kiani ngini nimahi dodiai, uha hiädono naga ini liko ngini de o nyawa masawaro iluku-luku koiwa mabaraguna, mä duga-duga inihirehene. Manga sawaro i luku-luku gënanga o Kristus inoua, mä o nyawaino dika manga damäke deʼ o womahino o dunia yakokokuaha.

⁹Hababu ma Jou Madutu ai rupa i ngodumu i gogere o Kristusoka, enagënanga o hidoku o nyawaka.

¹⁰Deʼ karana o ngango kamoi de o Kristus, nginiö inihidöaka o ngango i ngodu-ngodumu. Hababu o Kristus ganga wohihäeke mangale moi-moi o womaha i kokuaha deʼ ipopareta.

¹¹Karana kamoi de o Kristus, ngini ini hunaka, de o huna o nyawaua yadodiai, mä de o huna o Kristus wadodiai, inihi lapahioka ngini o biaha makuaha i bobaradohaino.

¹² Hababu maöraha ngini ini ohiki de o gohiki madebi-debini ngini ini hidulungunoka de o Kristus; deʼ o gohiki madebi-debini dika gënanga, nginiö inihi wangokali nima kinïki de o Kristus karana ngini ningaku ma Jou Madutu ai kuaha iwihi wangoka o Kristus o honengino.

¹³ Mahira, ngini nihonengoka hokä o rohani karana ngini nibaradoha, deʼ karana ngini ini hunaua hokä o röehe mahidoku. Mä oraha nënanga ma Jou Madutu winihi wangoka ngini nimakinïki de o Kristus. Ma Jou Madutu wonahi apongoka hagala tongone nanga baradoha,

¹⁴ deʼ nanga nagimi mahurata ngoneino wahihangoka, de madodagi-madodagi itotubuho ina tapal̄u ngone. De wasaliboka o hurata gënanga o salib magotaka, ma Jou Madutu wahihangoka mata-mata inakokalaki ngoneino.

¹⁵O saliboka o Kristus wadiai hagala o womaha-womaha i popareta, deʼ i kokuaha i dadi i mangakunoka uaoli. Onanga yädiai o kumedi o nyawa yowöe-wöe manga himangoka maöraha o Kristus wäliliara önanga hokä o dagokino wahiduono Ai gutumu magoronaka.

¹⁶ Hababu gënanga uha nia mal̄aika o nyawa inihihowono ngini mangale o ngol̄omo de o ngokere, ekola mangale o agama mawange ma ago-agomo, ekola o mede magil̄au marameanga, ekola imakorona o Yahudioka manga Puji mawange.

¹⁷Mata-mata gënanga duga-duga magurumini dika o hali-o hali aha ibo böa-böa, mä manyonyata o hali-o hali gënanga ganga o Kristus!

¹⁸Uha nihi gumal̄aika tingini nia diri i hi rugi o nyawa poparahaja ima hitipokouku manga diri deʼ yahuba-huba o malaekat. O nyawa gënanga yoëdenge de yatiba-tibanga o dunia deʼ ihi lamo-amoko manga lolega-lolega mahirete,

¹⁹ hiädono i ma hi jojö oka ua oli o Kristus ika wo dadi wo hi häeke. O Kristus ai tutuda matimioka, o röehe i ahumu yapaliara deʼ ihirimoi mangale madonga-donga, de ihero imoteke ma Jou Madutu ai mau.

²⁰Ngini nihonengoka nimakinïki de o Kristus, deʼ winihilapahioka o womaha-o womahaino yakokuaha o alami nënanga. Aa, yadodoa ngini niwango hokä o nyawa kaya kuahahi o dunia nënanga? Yadodoa ngini nihimoteke o datoro-o datoro hokä hoko nënanga,

²¹”Uha nia sö nënanga”, ”Uha nia taili gënanga”, ”Uha nia tigi nënanga”?

²²O datoro mata-mata gënanga ganga imakorona o hali-o hali yapäke hoko gënanga koiwaka mabaraguna. Gënanga duga-duga o datoro-o datoro deʼ o dodötoko-o dodötoko mangale o nyawa yadodiai.

²³I goungu hapulo-pulono o hali gënanga i sawaro de mahigaro la o nyawa yahuba o malaekat, ima hitipokouku manga diri deʼ manga diri yahangihara; mä mata-mata gënanga koiwa mabaraguna mangale yatumungu o nyawa manahihu.