Read Tobelo O TESALONIKA MADODIHIRAKA 3 Bible Online

O TESALONIKA MADODIHIRAKA 3 - Tobelo bible

O TESALONIKA MADODIHIRAKA 3

¹ Mabobaha tongomi mia ngigo de mia nganono miatumungu miakunokaua. Hababu gënanga ngomi mima pikiri iholoi yaoa ngomi imï mal̄aika mima tëngoka o Atena mabereraka,

²mihi jai-jai ngomi miwi huloko nanga riadodoto o Timotius. Unanga o nyawa moi wilö leleani ma Jou Madutu womanarama mima kokomoteke dede ngomi mangale mihi ngahu o Abari ma Oa mangale o Kristus. Ngomi miwi huloko o Timotius nginika hupaya ünanga winihi kuata ngini de winihi titila ngini la iholoi niwi ngaku o Kristusika.

³De hoko gënanga kamoiö de moiua nginino nima dohuku karana nanga huha de nanga hangihara nënanga. Ngini mahirete nihi öriki o huha de o hangihara gënanga iwohama ma Jou Madutu ai datoro magoronaka mangale ngone.

⁴Maöraha ngomi ka dede nginiohi, ihiraka ngomi minihi ngahuoka nginika ngone aha hatagongo o huha de o hangihara. Deʼ itiai gënanga i gou-goungu idadioka; ngini mahirete nihi orikoka.

⁵Mahababu gënanga ngohi tïhuloko o Timotius, karana ngohi töigo duru tohi öriki sarakia nia dodagi mahimangika mangale nia ngongaku magoronaka o Kristusika. Ngohi tohawatere o Ibilihi i hasili inï baja ngini hi ädono mata-mata tongomi mia kangela idadi kaparahaja.

⁶ Oraha nanga o Timotius womakilioroka deʼ wohi ngahuoka ngomino o mörene ma abari mangale sarakia ngini niwi ngaku o Kristusika deʼ nimä kodora moi de moi. Unanga wohi ngahu ngomino ngini salalu de nia hohininga maoa-oa nia hiningaka mangale ngomi. Deʼ ngini nio nahihu homakamäke dede ngomi, imatero hokä ngomiö mio nahihu homakamäke dede ngini.

⁷Mahababu gënanga, Roriadodoto, hagala tongomi mia huha de mia hangihara magoronaka, ngomi imï laru de o abari mangale ngini. Nia ngongaku o Kristusika ya amoko tongomi mia hininga,

⁸hiädono öraha nanga ngomi mia mäo igou-goungu miwango, itiyakunu ngini nitatapu nima okoino nibitumu, ni rimoi de ma Jou.

⁹Hoko kia ma amoko o ma mäo to ngomi mia tarima kasi ma Jou Madutuika mangale o mörene mata-mata mia mäke-mäke ai himangoka karana ngini.

¹⁰O hutu de o wange ngomi migahoko Unangika de mia hininga magahumu, hupaya ngomi miakunu homakamäke dede ngini mahirete la mia ngodumu okia ngini nipö paralu, mangale nia ngongaku o Kristusika hokä sarakia kokiani.

¹¹Tanu ma Jou Madutu tongone nanga Ama mahirete, de tongone nanga Jou Yesus wohidiai o ngëkomo mangale ngomi la homakamäke dede ngini!

¹²Tanu ma Jou wadiai ngini idogo-dogo nimä kodora moi de moi, de idogo-dogo niä dora o nyawa mata-mata hiädono nia dora gënanga kai dogo-dogo, imatero hokä tongomi mia dora nginika.

¹³De hoko gënanga ma Jou aha wohikuata nia hininga, hiädono ngini nitebini deʼ koiwa nia howono ma Jou Madutu tongone nanga Ama ai himangoka maorahoka tongone nanga Jou Yesus woböa imakomoteke de o nyawa mata-mata yodä dadi touna Ai nyawa.