Read Tobelo O TESALONIKA MADODIHIRAKA 4 Bible Online

O TESALONIKA MADODIHIRAKA 4 - Tobelo bible

O TESALONIKA MADODIHIRAKA 4

¹Mabobaha Roriadodoto, ngomi mihi döakoka o dulada nginika imakorona de sarakia kokiani ngini niwango la nia sanangi ma Jou Madutu ai hininga. Itiai ngini niwangoka hoko gënanga. Mä oraha nanga de ma Jou Yesus ai kuaha ngomi migahoko de magiria nginika deʼ minï gëgoto hupaya ngini iholoi nimahiahaoli o hali gënanga magoronaka!

²Hababu ngini nihi orikoka o hidumutu-hidumutu ngomi mini hidöa-döakoka nginika de ma Jou Yesus ai kuaha.

³Nënanga doka ma Jou Madutu ai mau: Hupaya ngini niwango nimä dingakika mangale Una, nitebini, nimahi tingaka ikurutika de o manarama isösafarune.

⁴O nau-nauru nia hidogoronaka kokiani ihi öriki sarakia yowango yorimoi de manga hekata de madodagi yasanangi ma Jou Madutu ai hininga deʼ o nyawa manga hininga.

⁵Uha niwango nia moteke nia nahihu nia hekatika, hokä yadodiai o nyawa iwi näko-näkoua ma Jou Madutu.

⁶O hali hoko gënanga magoronaka kao nyawa moiö de uhali nidiai o howono nia dodiawoika, ekola niä tipu. Mahira ngomi mihi döakoka o hohininga de makuata nginika, ma Jou wähukumu hagala o nyawa yododiai o howono hokä hoko gënanga.

⁷Ma Jou Madutu wonä ahoko ngone, koigoungua hupaya ngone howango isafarune, duga-duga hupaya ngone howango de madodagi Ai hininga hasanangi.

⁸O nyawa yaolu-oluku o dodötoko nënanga ko o nyawaua yäoluku, duga-duga iwi oluku ma Jou Madutu wohi döa-döaka ai Womaha itebi-tebini nginika.

⁹I paralu okaua ngomi mitulihi nginika, mangale sarakia kokiani ngini niä dora nia roriadodoto o ngongaku moi. Ngini mahirete ma Jou Madutu winï dotokoka la nimä kodora.

¹⁰Deʼ o hali nënanga ngini nihi matokoka o roriadodotika o ngongaku moi, o Makedonia madaera mata-mataika. Mä Roriadodoto ngomi migahoko de magiria, hupaya niawowango iholoioli yaoa.

¹¹Nihidailako niwango de nia hininga irïdi deʼ nia ganu-ganuua o nyawa mahomoa manga hali. Kokiani ngini nimanarama nimä lingiri mahirete nia ngol̄omo de nia ngokere, hokä sarakia mahira ngomi mihiparetaka nginika.

¹²Nako ngini niwango hoko gënanga, ngini kamoi ikaö de nima higagaoua, deʼ hagala o nyawa yongaku-ngakua o Kristusika aha inï horomati ngini.

¹³Roriadodoto, ngomi mioigo hupaya ngini nihi öriki demadiai mangale hagala o nyawa yohone-honengoka; hupaya ngini nia hininga ihuhaua hokä o nyawa mahomoa manga ngonganono koiwa-iwa.

¹⁴Ngone hongaku o Yesus wohonengoka de wowango okali. Mahababu gënanga ngomi mingakuö ma Jou Madutu aha wahi wango okali mata-mata o nyawa yongaku-ngaku o Yesusika deʼ yohonengoka, hupaya önanga yowango dede Unanga.

¹⁵ Yakorona o hali gënanga, nënanga doka ma Jou ai dodötoko ngomi mimau minihi ngahu nginika: Ma Jou Yesus woböa maorahoka, ngone kaho wango-wangohi aha hohihiraua de o nyawa yohone-honengoka ihira.

¹⁶Damä o malaekat womomulia aha wopöaka deʼ ma Jou Madutu ai trompet aha yawuwu hokä o nonako o pareta ima sadia. Daha ma Jou Yesus mahirete aha wouti o horogaka de wauku, de o Haranioka manyawa yohone-honengoka aha itihira wahiwango.

¹⁷Iböto de gënanga, ngone kaho wango-wangohi o öraha gënanga aha kama moi inä göraka dede önanga o lobi-lobi ma goronaika la homakamäke de ma Jou o gitawaoka. Daha ngone aha hogogere de ma Jou kahi ado-adonika.

¹⁸Hababu gënanga, kokiani ngini nima hikukuata nia hininga de nia päke o demo-demo nënanga.