Read Tobelo O YOSUA 1 Bible Online

O YOSUA 1 - Tobelo bible

O YOSUA 1

¹O Musa, ma Jou Ai gilaongo gënanga wohonenge ipaha ika, ma Jou wïtemo o Musa aiwakilika, enagënanga o Yosua o Nun aingohaka.

²Ma Jou wato, ”O Musa Ahi giläongo wohonengoka. Done o öraha nënanga kayao deʼ ngona deʼ yongodumu o Israel manyawa nima hidiai mangale niatöbongo o Yordan ma Ngairi, deʼ niongöhama o berera Tahidöa-döaka onangika.

³ Ngohi ta hetongoka o Musaika moi-moi o daera niö agu-aguroka Tohidöakoka ngonaika, Yosua, deʼ yongodumu Ahi umatika.

⁴Nia daera aha imahöheika o tönaka ikokakahaka deʼ yaino o koreharail̄e idaduoka hiädono o Libanon mal̄oku o koremieuku deʼ o Efrat ma Ngairi maämo-ämokoka gënanga de yaino o wange mahiwaroko i gila-gila yakilolitïno o Het manyawa manga berera hiädono o Ngöto i Kokoronaika o wange madumuniha.

⁵ Ka o nyawa moi ö ma aha koyakunua ini hïhanga ngona, Yosua, hoani wowängo ma umuru. Hababu Ngohi aha salalu toni datekuku hokä mahira Ngohi tidatekuku o Musa. Ngohi tonimal̄aikaua ngona.

⁶ Kokiani ngona nongaku nagöu-göungu deʼ nobarani, hababu ngona aha nä tuda o höana deʼ o berera manyawa nënanga maöraha önanga yö gögere o berera ta hijäjajioka toönanga mangaete deʼ manga tohoraika.

⁷Duga-duga kokiani ngona i göu-göungu nongaku deʼ no barani. Ngona kokiani nö göana hupaya ngona nohingounu o tita i ngödumu wohidöa-döaka o Musa Ahi gilaongo gënanga ngona ika, ka ma huhutulö mauha ngona ko nö lega ika ua, done ngona aha no häsili.

⁸O tita ma buku gënanga kokiani salalu nä da basa Ahi umatika. No nä dötoko o buku gënanga o hutu deʼ o wange, hupaya salalu ngona na diai mata-mata ta to tüli-tülihi ma goronaka. Nako ngona nadiai mata-mata gënanga, aniwowängo aha okia ua iküranga deʼ nohasili.

⁹Nö hohininga, Ngohi toni hiparetaka ngonaika hupaya ngona i göu-göungu nongaku deʼ nobarani. Uha ngona nohawana ekola iküranga nonauru, hababu ngohi ma Jou ani Jou Madutu tonidatekuku ngona kia ika dika ngona nöiki.”

¹⁰Deʼ o Yosua wahipareta o Israel manyawa manga tutüda-tutüda

¹¹hupaya yakilöliti o Israeloka manga tau-tau madoomu yamöde-mödekika deʼ wohidöaka o pareta nënanga, ”Nia sadia o biläono, karana o wange hangeohi ngini kokiani niatöbongo o Yordan ma Ngäiri mangale niögögere o berera ma Jou nia Jou Madutu winihidöa-döakoka nginika.”

¹² O Ruben, deʼ o Gad manga hoanika deʼ o Manasye aihöana ma hononga, o Yosua wätemo,

¹³”Niöhohininga! O Musa ma Jou Ai gilaongo gënanga wahëtongoka nginika o tönaka o Yordan ma Ngairi mawange mahiwaröko idaduoka gënanga ma Jou nia Jou Madutu winihidoäkoka nginika la idadi niaberera.

¹⁴Mata-mata niahekata deʼ niangohaka deʼ niaaiwani o gigini yakunu igögögere nënangokadau, mä yopoparangi kokiani ima hidiai yoparangi deʼ yähihira o Israel manyawa mahomoa yatöbongo o Yordan ma Ngairi. Ngini kokiani niariwo önanga

¹⁵hiädono önanga yogögere o tönaka o Yordan ma Ngairi mawange madumuniha idaduoka nënanga ma Jou nia Jou Madutu wahiöak-döaka onangika. Ma Jou wohidöaka irörirïdi ihuru-haraua yongödumu o Israel manyawaika deʼ ipaha dahaö ngini yakunu nilio niatönaka mahireteika o Yordan o wange mahiwaroko idaduoka nënanga, winihidöa-döaka o Musa ma Jou aigilaongo gënanga nginika.”

¹⁶Done o Ruben deʼ o Gad manga höana, deʼ o Manasye aihöana mahononga gënanga yahäluhu, ”Okiadika ngona nohipareta ngomino, ngomi aha miadiai, deʼ okiaika dika ngona nomïhüloko ngomi miöiki, ngomi aha miöiki.

¹⁷Ngomi aha mihingounu ngonaika imatero hoka hokä ngomi ö salalu mihingounu o Musaika. Tanu ma Jou Madutu wonidatekuku hokä ”Unanga wïdatekuku o Musa!

¹⁸Moi-moi o nyawa yöluku imaponu anikuahaika, ekola yamotekua ani pareta, aha yä hükumu yähohonenge. Kokiani ngona igou-goungu nongaku deʼ nobarani!”