Read Tobelo O YOSUA 10 Bible Online

O YOSUA 10 - Tobelo bible

O YOSUA 10

¹O Adoni-Zedek, o Yerusalem ma koano, woihene o Yosua waoraka deʼ duru wawëde-wëderuku o Ai makota, inoli wïtöma ma koano hokä wadiaioka o Yerikho makotaika deʼ ma koano. Unanga woihenoli o Gibeon manyawa yadiaioka o jaji ima kohöbata deʼ o Israel manyawa deʼ yogögere toönanga manga hidogoronaka.

²O Yerusalem maberera madutu duru yohäwana, hababu o Gibeon ganga o kota malägo-ägomo; ima ketero ma ägo-ägomo deʼ hagala o kota deʼ mahoanoka, maboboloi iholoi ilämoko deʼ o Ai makota. Hagala manga nyawa ma o tentara yoso sawaro yoparangi.

³Hababu gënanga o Adoni-Zedek wähüloko o nyawa ma Koano Hohamika o Hebron mabereraka, ma Koano Piream o Yarmut mabereraka, ma Koano Yafia o Lakhis mabereraka, deʼ ma Koano Debir o Eglon mabereraka, deʼ yoao o behëhongo nënanga,

⁴”Niaino nïhïrïwo ngohi haparangi o Gibeon, hababu manganyawa yadiaioka o jaji imakohöbata deʼ o Yosua deʼ o Israel manyawa.”

⁵Done o Amori ma koano yämotoa ö gënanga, enagënanga ma koano Yerusalem, o Hebron, o Yarmut, o Lakhis deʼ o Eglon i ma kodogoino, daha toönanga manga tentara yongödumu, önanga ihi gilolitoka o Gibeon deʼ yaparangi.

⁶O Gibeon manyawa ihidïngoto o abari nënanga o Yosuaika o tau madoomuoka o Gilgal madaeraoka, ”Uha nomï mal̄aika ngomi mahirete, Tüanga! Noböa itai-taiti nomïrïwo ngomi, hababu o Amori ma koano manga tentara mata-mata deʼ mal̄oku-l̄okuoka madaeraka ima kodogo inoka imï lawani ngomi!”

⁷Daha o Yosua deʼ aitentara yongödumu yowohamika aitentara madudüono yaoa-oa, o Gilgal madaeraka deʼ imä jobo la yoparangi.

⁸Ma Jou wïtemo o Yosuaika, ”Uha nämödongo onangika. O ütumu Tonihidöakoka ngonaika, hababu gënanga önanga kao nyawa moi ö ma ko inïpöaua inï lawani ngini.”

⁹O hutu moi yahaiwätiki o Yosua deʼ aitentara madudüono ima göraka o Gilgal madaeraka deʼ o Gibeonika, daha yäparangi o Amori manyawa yähitodokanika.

¹⁰Ma Jou wadiai o Amori manyawa yohäwana imahikokorikinokaua kadeʼ yämäke o Israeloka manga tentara. Manga ngöe o Amori manyawa yätöma o Gibeon mabereraka, deʼ yowango-wangohi yäginïki yahigüti ol̄oku magelehorüku o Bet-Horon madaeraka hiädono magurutikka o Azeka deʼ o Makedaika o koreharail̄e idaduoka.

¹¹Maöraha o Amori manyawa go giriaka yauti ol̄oku ma gelëhoro gënanga karana yädokaöara o Israeloka manga tentara, ma Jou wäditifa o äwana o es o dihangoka deʼ onanguku o ngëkomo magürutu hiädono o Azekaika. Yohöne-hönenge yatotapal̄u o äwana o es i holoi yowöe deʼ o Israel manyawa yätöma-töma.

¹²O wange gënanga maöraha ma Jou wahidöaka o Israel manyawaika yäütumu o Amori manyawa, o Yosua wïtemo ma Jouika. Deʼ o Israel manyawa manga himangoka, o Yosua wotemo, ”Hei o wange malako! Noma tögumu o Gibeon mal̄okuoka. Deʼ ngona o mëde! O Ayalon ma Waioka deʼ uha nomahëloro.”

¹³ Done o wange malako imatögumu deʼ o mëde koimahelorua hiädono o Israel manyawa yabötoka yähohïhanga hagala manga haturü. Idödädadi nënanga ihi tülihi o Yasar ma Buku magoronaka. O wange moi magähumu o wange malako imatögumu o dïhanga mahidö dogoronaka, deʼ duru kahädëkana dahaö i tümunu.

¹⁴Komaiwa idadi deʼ aha komaiwaka idadi o wange moi ani hokä o wange gënanga, ma Jou wohimöteke o nyawa manga nahihü. Ma Jou woparangi wahiböa o Israeloka!

¹⁵O parangi gënanga deʼ iböto, o Yosua kamamoi deʼ aitentara imakilioro manga tau madoomuika o Gilgal madaeraka.

¹⁶Mä o Amori ma koano gënanga yämotoaö yöotana deʼ ima ngïunu moi o äruku magoronaka o Makeda madaeraka.

¹⁷O nyawa yämäke önanga, deʼ ihi ngähu o Yosuaika toönanga manga ngï imangïunu.

¹⁸”Nio dulülu o helewo ma pako-pako o äruku gënanga ma uruika, deʼ nia göana genangokadau,” o Yosua wato,

¹⁹”Ma ngini uha nima tögumu genangokadau. Niä ginïki nihigïla-gïla, deʼ niaparangi önanga manga poretino niäböa; uha niahigumal̄a önanga yowöhama toönanga manga kotaika! Ma Jou Madutu wohidöakoka ngini niäütumu önanga.”

²⁰O Yosua deʼ o Israel manyawa yätöma hagala o Amori manyawa gënanga mä naga ö toönanga manga hidogoronaka yopirïngana toönanga manga kotaika yolïngiri o ngï imangïunu, hiädono koyätömaua.

²¹Deʼ ipaha o Yosua aitentara mata-mata imakilïoro yongödu-ngödumu o Yosuaika o tau madoomuoka o Makeda madaeraka. O bereraka gënanga komoiua yobarani okianaga yotëmo-tëmo yälawani o Israel manyawa.

²²Gënanga deʼ iböto o Yosua wotemo, ”O örahanënanga niahelenga o äruku gënanga maüru deʼ niä ao nenangino yamotoa ö o koano gënanga.”

²³O äruku gënanga ma yahelënga, daha o Yerusalem ma koano, o Hebron, o Yarmut, o Lakhis deʼ o Eglan yätäuru yahihüpu,

²⁴deʼ yä ao o Yosuaika. Daha o Yosua wa ahoko o Israel manyawa mata-mata i ma toomu, deʼ ipaha wahipareta hupaya yokokapita yonöninïki yoparangi dede ünanga yaino deʼ yadokouku o kokoano gënanga manga tomaruku. O kokapita gënanga mayaino deʼ yadokouku o kokoano gënanga manga tomarüku.

²⁵Gënanga deʼ iböto, o Yosua wätemo ai kokapitaika, ”Uha niä hïninga i hüha deʼ nihäwana. Kokiani ngini ningaku deʼ nibarani, hababu hoko nënanga madodagi ma Jou wahidiai niähaturü mata-mata.”

²⁶Dahaö Yosua wätöma o kokoano gënanga deʼ wä nüne uku önanga o liate motoauku. Toönanga manga mayeti yodogumal̄a ika genangokadau hiädono o biomaoa.

²⁷O wange deʼ itümunu, o Yosua wohipareta, o mayeti-mayeti gënanga ihi güti daha i hi kaweli o äruku magöronauku hokokangäno o kokoano gënanga ya päke mangale i ma ngïunu. De ipaha o helewo ma lägo-ägomo yö gelënga uku o äruku ma üru oka gënanga. Hiädono öraha nënanga o helewo-helewo gënanga ka genangokadau ohi.

²⁸O wange gënanga o Yosua waparangi o Makeda, deʼ wahohïhanga o kota gënanga inoli ma koano. Yongödumu yogögögere o kota gënanga wätöma; kao nyawa moiö wamal̄aua yowängo. O Yosua wïhidiai o Makeda ma koano imatëro hokä wihidiai o Yerikho ma koano.

²⁹Gënanga deʼ iböto, o Yosua deʼ aitentara yotägi gïla-gïla o Makeda deʼ yaino o Libnaika deʼ yaparangi o Libna.

³⁰Ma Jou wahidöakoli o Israel manyawaika yaütumu o kota nënanga deʼ ma koano. Ka i ma tengö deʼ wämal̄aikaua yowango; o nyawa mata-mata o kota gënanga magoronaka yätöma. O Yosua wïhidiai o kota gënanga ma koano hokä ünanga wïhidiai o Yerikho ma koano.

³¹Deʼ ipaha o Yosua deʼ aitentara yo tägi manga himangika o Libna deʼ yaino o Lakhisika daha ihigilolitoka o kota gënanga deʼ yaparangi.

³²Ma Jou wahidöaka o Israel manyawaika yaütumu o Lakhis o parangi magoronaka o wange mahinotoka. Okia önanga yodiai o Libna mabereraka önanga yadiaioli o Lakhis mabereraka; kaima tengö deʼ wämal̄aikaua yowängo, mata-mata yätöma.

³³O Horam, o Gezer ma koano woböa wörïwo o Lakhis, mä o Yosua wähohïhanga ünanga deʼ aitentara; kai ima tengö deʼ wä mal̄aikaua, mata-mata yohönenge.

³⁴Deʼ ikali, o Yosua deʼ aitentara yotägi manga himangika o Lakhis deʼ yaino o Eglonika daha ihi giloliti o kota gënanga deʼ yaparangi.

³⁵O wange genangö önanga yaöra o Eglon, deʼ yätöma mata-mata manyawa genangokadau hokä önanga yodiai o Lakhis mabereraka.

³⁶O Eglon deʼ yaino, o Yosua deʼ aitentara yadöa il̄ol̄oku-l̄oku deʼ yöiki o Hebron makotaika, daha yaparangi

³⁷deʼ yaöra o kota gënanga. Ma koano deʼ manyawa o kota gënanga magoronaka deʼ o kota-kota mahomoa magilolitino, mata-mata yätöma. O Yosua duru wawede-wederüku o kota gënanga hokä wadodiai o Eglon makotaika. Ka ima tengö deʼ wämal̄aikaua yowango genangokadau.

³⁸Gënanga deʼ iböto, o Yosua deʼ aitentara imaidulu de yaparangi o Debir.

³⁹O kota gënanga deʼ ma koano ikali mata-mata o kota mahomöa magilolitïno o Yosua waöra. Mata-mata manyawa genangokadau yätöma. O Yosua wädiai o Debir deʼ ma koano hokä ünanga wadiai o Hebron deʼ o Libna deʼ ma koano.

⁴⁰O berera gënanga mata-mataika o Yosua waparetaka. Unanga wahohïhanga o kokoano o daera il̄ol̄oku-l̄okuino, o dopörono ma gelehoröka, ol̄oku matimino o wange madumuniha, deʼ o tönaka ilua-luasoka o koreharail̄e. Kaima tengö deʼ wämal̄aikaua yo wangi genangokadau; mata-mata yätöma. Gënanga imöteke deʼ o pareta ma Jouino o Israeloka manga Jou Madutu.

⁴¹O Yosua wähohïhanga o daera-daera o Kades-Barnea deʼ yaino o koreharail̄e idaduoka hiädono o Gazaika imahi tigi-tigïka deʼ o gahil̄e madaera, i wohamika o Gosyen madaera mata-mataika, igila-gila hiädono o Gibeonika o koremieuku.

⁴²Mamoi dika woparangi, o Yosua wäu ütumu mata-mata o kokoano gënanga deʼ waöra toönanga manga daera yakokuaha, karana ma Jou, o Israeloka manga Jou Madutu, woparangi mangale o Israel.

⁴³Gënanga deʼ iböto, o Yosua deʼ aitentara ima ïdulu manga tau madoomuika o Gilgal madaeraka.