Read Tobelo O YOSUA 12 Bible Online

O YOSUA 12 - Tobelo bible

O YOSUA 12

¹ O Yordan o wange mahiwaröko madaera, o Arnon ma Ngairi ma Waioka de yaino i döa gïla-gïla o Yordan ma Waiika hiädono imatëro magurutika deʼ o Hermon mal̄oku o koremieuku, yaoraka deʼ yögogeroka o Israel manyawa. Naga o koano yahinotoönanga yäütumu.

²Womatengö airömanga o Sihon, o Amori ma koano wogögögere o Hesybon mabereraka. O daera wakokuaha o Gilead madaera mahönonga ihigilolitino: enagënanga o Aroer deʼ yaino (o Arnon ma Wai ma datekoka) deʼ o kota o wai magögoronaka gënanga hiädono ima tëro magurutika o Yabok ma Ngairi o Amon manyawa manga daera mabatingoka;

³inoli yakilolitino o Yordan ma Wai madaera o wange ma hiwaröko, o Galilea ma Taaga deʼ yaino madümutu o korehara il̄e hiädono o Bet-Yesimotika (o Hönenge ma Ngöto o wange mahiwaröko), gila-gila o Pisga mal̄oku matimiino.

⁴O koano mahomöa o Israeloka iwi utu-ütumu ganga ma Koano Og o Basan mabereraino, wogögögere o Asytarot deʼ o Edrei madaeraoka. Unanga womatengöhi mahou o Refaim manyawa.

⁵O daera wakokuaha yakilolitino o Hermon mal̄oku o Salkha, deʼ o Basan madaeramata-mataika imatëro magurutika o Gesur deʼ o Maakha madaera; inoli yakilolitino o Gilead madaera ma hönonga hiädono imatero magurutika ma Koano Sihon aidaera wakokuaha o Hesybon makotaka.

⁶ Gënanga ma koano yahinoto o Musa deʼ o Israel manyawa yä utu-ütumu. O kokoano mangatönaka gënanga o Musa ma Jou Aigiläongo gënanga wahidöaka o Ruben deʼ o Gad manga hoanika deʼ o Manasye aihöana mahönonga, la idadi toönanga manga tönaka madutu.

⁷O kokoano o Yosua deʼ o Israel manyawa yäutu-ütumu ganga mata-mata o kokoano o Yordan ma Ngairi o wange madumuniha madaeraka, o Baal-Gad o Libanon ma Waioka deʼ yaino igila-gila hiädono il̄ol̄oku-l̄oku magota koiwa-iwaika o koreharail̄e idaduoka imahi tigi-tigika o Edomika. O daera gënanga o Yosua wäkokeregu o Israel manga höa-höanika la idadi önanga manga tönaka madutu.

⁸O daera gënanga yakilolitino o daera deʼ mal̄oku-l̄okuoka, o dopörono matimino madaera o wange madumuniha idaduoka, o Yordan ma Wai deʼ madopörono matimino madaera ihi gogelëhoro o wange mahiwaröko idaduoka, deʼ o tönaka ikokakäha madaera o koreharail̄e idaduoka. O daera-daera gënanga ganga manga ngï ihira-hira o Het, o Amori, o Kanaan, o Feris, o Hewi deʼ o Yebusi manyawa manga daera.

⁹O kokoano yä utu-ütumu, mata-mata mangangöe yämoruange de yämoi; enagënanga o kokoano o kota-kotaino nënanga: o Yerikho, o Ai (itigi deʼ o Betel), o Yerusalem, o Hebron, o Yarmut, o Lakhis, o Eglon, o Gezer, o Debir, o Geder, o Horma, o Arad, o Libna, o Adulam, o Makeda, o Betel, o Tapuah, o Hefer, o Afek, o Lasaron, o Madon, o Hazor, o Simron-Meron, o Akhsaf, o Taanakh, o Megido, o Kedes, o Yokneam (o Karmeloka) o Dor (o gahi madatekino), o Goyim (o Galileaoka) deʼ o Tirza.