Read Tobelo O YOSUA 13 Bible Online

O YOSUA 13 - Tobelo bible

O YOSUA 13

¹O öraha nënanga o Yosua duru iwiperekioka. Ma Jou wïtëmo o Yosuaika, ”Ngona ini perekioka, Yosua! Mä kohangöe ohi o daera kokiani na öra:

²O Filistin deʼ o Gesur madaera mata-mataika,

³deʼ o Awi madaera mata-mata ika o koreharail̄e. (O Sikhor ma Ngairi madaera deʼ yaino o Mesir mabatingoka hiädono o Ekron mabatingika o koremieuku idaduoka, mata-mataika gënanga ihidëtongo o Kanaan manyawa manga daera; deʼ o Filistin ma kokoano yögögere o Gaza, o Asdod, o Askelon, o Gat deʼ o Ekron madaeraka.)

⁴Inoli kokiani yaöraoli: o Kanaan deʼ o Meara madaera mata-mataika (to Sidon manyawa), hiädono o Afek madaeraika o Amori manyawa manga daera ma batingoka;

⁵i gila-gila o Gebal manyawa manga daera, deʼ o Libanon madaera mata-mataika yodümutu o wange mahiwaröko, o Baal-Gad deʼ yaino o Hermon mal̄oku o koreharail̄e i daduoka, i gila-gila hiädono o ngëkomo yodümu-dümutu o Hamatika.

⁶ Iwohamö o Sidon manyawa mangadaera mata-mataika, yogögögere o daera deʼ mal̄oku-l̄okuoka o Libanon mal̄oku-l̄oku deʼ o Misrefot-Maim mahi dogoröna.” ”Mata-mata o höana deʼ o berera manyawa gënanga aha tä duhu, maöraha o Israel manyawa yäparängi önanga,” wohigila-gila ma Jou wïtemo o Yosuaika. ”O tönaka gënanga kokiani nahikodöku o Israel manyawa ika la idadi toönanga manga tönaka, hokä Tohi poparetaoka ngonaika.

⁷Hoʼ öraha nënanga nohikodöku o tönaka gënanga o höana hiwoika o Israeloka, deʼ o Manasye aihoanino mahönonga, hupaya gënanga idadi toönanga manga tönaka.”

⁸ O Ruben deʼ o Gad manga höana inoli o Manasye aihöana ma hönonga yatarimaka manga hidöku o tönaka o Musaino, ma Jou ai giläongo gënanga; enagënanga o tönaka o Yordan ma Ngäiri

⁹Manga daira o nanga yakiloti o Aroer (o Arnon ma Ngäiri ma Wai ma datekoka) deʼ o kota o wai ma gö goronaka gënanga. Ikali mata-mataika o tönaka irata-rata i ko kurutil̄e madaera o Merdeba deʼ yaino hiädono o Dibonika,

¹⁰deʼ hiädono o Amon madaera mabatingika, iwohamika mata-mata o kota mamoi iböto o Sihon wakuaha o Amori manag koano, wogö gögere o Hesbon mabereraka.

¹¹Iwohamika o Gilead madaera, o Gesur deʼ o Maakha ma gilolitino madaera, ikali o Hermon mal̄oku mata-mataika, deʼ o Basan madaera mata-mata ika hiädono o Salkhaika.

¹²Toönanga manga daera o yakilolitïno ma Koano o Og ai kuaha madaera, o Refaim manyawa mabobaha wo po pareta o Asytarot deʼ o Edrei mabereraka. O Musa wautumoka hagala o höana deʼ o berera manyawa gënanga deʼ wäduhu oka önanga yohüpu toönanga manga daeraka.

¹³Mä o Gesur deʼ o Maakha maberera madutu, o Israel manyawa yäduhuua; önanga ka yogogerohi o Israel matonakoka.

¹⁴ O Lewi aihöana yatarimaua manga hidöku o Musaino, hababu ma Jou wahetongoka o Musaika o Lewi aihöana enagënanga hagala o huhuba yatö tühu-tühuku o huhuba mangïoka mangale ma Jou o Israeloka manga Jou Madutu.

¹⁵O tönaka ma Jou wahi jäjaji o Israel manyawaika gënanga o hidöku moi o Musa wahidöakoka o tau moi-o tau moi o Ruben aihöana magoronaka, la idadi toönanga manga hidöku.

¹⁶Toönanga manga hidöku gënanga yakilolitïno o Aroer (o Arnon ma Ngairi ma Wai madatekoka) deʼ o kota o wai magögoronaka gënanga hiädono o tönaka irata-rata ikokurutil̄e mata-mataika o Medeba ma gilolitïno;

¹⁷ikali o Hesybon deʼ o kota mata-mata o tönaka irata-rata ikokurutil̄e oka gënanga, enagënanga: o Dibon, o Bemot-Baal, o Bet-Baal-Meon,

¹⁸o Yahas, o Kedemor, o Mefaat,

¹⁹o Kiryataim, o Sibma, o Zeret-Hasahar ihigögere o dopörono mal̄okuoka o waioka gënanga,

²⁰o Bet-Peor, o Pisga mal̄oku ma gogelëhoro, deʼ o Bet-Yesimot.

²¹Deʼ ikali iwohamikali mata-mata o kota o tönaka ilö lua-luas ikokurutil̄eoka gënanga, deʼ o Sihon o Amori manyawa manga koano aikuaha madaera mata-mataika, mahiraino wogögere o Hesybon mabereraka. Unanga deʼ yo kokuäha o Midian madaeraka ö enagënanga: o Ewi, o Rekem, o Zur, o Hur deʼ o Reba, o Musa wä utumoka. Mata-mata yokokuäha gënanga mamoi iböto yapareta o berera gënanga mangale ma Koano Sihon.

²²Manga hidogoronaka o nyawa yatötöma-töma o Israel manyawa iwïmäkeö o Bileam o Beor aingohaka, womai-maihi.

²³O Yordan ma Ngäiri marupa o bätingi o Ruben aihöana manga daera o wange madumuniha idadu oka deʼ o kapo-käpongo ya hidöa-döaka o tau moi-o tau moika o Ruben aihöana magoronaka la idadi toönanga manga tönaka madütu.

²⁴O hidöku moi o tönaka ma Jou wahijäjajioka o Israel manyawaika o Musa wahidöakoka o tau moi-o tau moika o Gad aihöana magoronaka, la idadi toönanga manga tönaka madütu.

²⁵O daera gënanga yakilöliti o Yaezer deʼ mata-mata o kota o Gilead madaeraka deʼ inoli o Amon manyawa daera mahönonga hiädono imatëro magurutika deʼ o Aroer o Raba o wange mahiwaröko idaduoka;

²⁶o Hesybon madaeraka de yaino hiädono o Ramat Mizpaika deʼ o Betonim, deʼ ikali o Mahanaim madaeraka deʼ yaino hiädono o Lodebar mabatingika, mata-mata gënanga iwohamoli o Gad aihöana manga daera.

²⁷O Yordan ma Wai oka, o Gad aihöana madaera gënanga yakilolitïno o Bet-Haram, o Bet-Nimra, o Sukot, deʼ o Zafon, enagënanga ma Koano Sihon aidaera mahou o Hesybon madaera. O Gad aihöana madaera gënanga mabatingi o wange madumuniha ganga o Yordan ma Ngairi hiädono imatëro magurutika deʼ o Galilea ma Taaga o koremieuku idaduoka.

²⁸Gënanga hagala o kota deʼ o käpongo yahidöaka o tau moi-o tau moika o Gad aihöana magoronaka la idadi toönanga manga tönaka madütu.

²⁹O tönaka ma Jou wahijä jajioka Israel manyawaika gënanga o hidöku moi o Musa wahidöakokali o tau moi-o tau moika o Manasye aihöana mahönonga magoronaka la idadi toönanga manga tönaka madütu.

³⁰O daera gënanga mabätingi hiädono o Mahanaimika, iwöhama o Basan madaera mata-mataika — enagënanga mata-mataika o Og ma koano Basan aikuäha madaera, deʼ moributanga o Yair makäpo-käpongo o Basan madaeraoka.

³¹Deʼ ikali i wohamö o Gilead madaera ma hönonga, ikali o Asytarot deʼ i Edrei, enagënanga hinoto o popareta makota ma Koano o Og ai kuäha o Basan madaeraoka. O daera gënanga mata-mataika ya hidöaka o tau moi-o tau moika o Makhir, o Manasye aingohaka aidifauku.

³²Hoko gënanga o Musa wohikodoku o tönaka o Yerikho mawange mahiwaröko idaduoka, o Yordan ma Ngairi mahononga, maöraha ünanga naga o Moab matonaka irata-rataka.

³³ Mä o Lewi aihöana, o tönaka kamahuhutulö ma yamäkeua o Musaino. O Musa wahetongoka onangika o hidöku yahidöa-döaka onangika ganga o hagala o huhubaino ihihöhuba-huba ma Jou o Israel manga Jou Madutuika.