Read Tobelo O YOSUA 14 Bible Online

O YOSUA 14 - Tobelo bible

O YOSUA 14

¹Ipaha deʼ nënanga ganga majarita mangale sarakia o Kanaan maberera o Yordan ma Ngäiri o wange madumuniha idaduoka ihikodoku o Israel manyawa manga hidogoronaka. Ihidoku-doku o tönaka gënanga o Israel manyawaika ganga ma Imam Eleazar, o Yosua o Nun aingohaka, deʼ o tau moi-o tau moi manga bäluhu o Israel manyawa manga höana magoronaka.

² Hokä sarakia ma Jou wohiparetaka o Musaika, o Yordan ma Ngäiri madaera-daera o wange madumuniha idaduoka ihi tötantu mangale o Israeloka manga höana hiwo deʼ mahönonga, kokiani ihi kodöku yaundi.

³O tönaka o Yordan ma Ngairi o wange mahiwaröko idaduoka o Musa wahidöakoka o höana hinoto deʼ mahönonga mahomöa gënanga. (Paralu i tülihi nenangoka o Yusuf aidifauku iregu höana hinoto: o Manasye aihöana deʼ o Efraim aihöana). Ya korona o Lewi aihöana koiwa o tönaka o Musa wahidöaka onangika. Onanga duga-duga yahidöaka o kota-o kota mangale manga ngï yogögere deʼ o tönaka ilua-luasi mangale toönanga manga hapi deʼ manga duba yapöpaliara.

⁵Hoko gënanga o Israel manyawa ima hikodöku o tönaka gënanga imamöteke deʼ ma Jou wohipöparetaka o Musaika.

⁶ O wange moiuku o Yehuda aihöana yoböa imakamäke deʼ o Yosua o Gilgal madaeraoka. Womatëngo onangoka enagënanga o Kaleb o Yefune aingohaka o Kenas manyawa, wato, ”Yosua! Ngona no hi öriki okia ma Jou wahö hëto-hëtongo o Musaika, ma Jou Madutu Aihuhüloko gënanga o Kades-Barnea madaeraka yakörona ngona deʼ ngohi.

⁷ Ngohi ahiumuru o täongo moruata maöraha o Musa ma Jou Ai giläongo gënanga, wohihüloko ngohi o Kades-Barnea deʼ taino hokä o berera yotötailäko o berera nënanga. Deʼ ngohi tomakilioro unangika deʼ toao o laporan madiai.

⁸O nyawa yoi-öiki dede ngohi, yadiai o Israeloka yo häwana. Mä ngohi kaihirahi tosetia tihingöunu ma Jou tongohi ahi Jou Madutu.

⁹ Deʼ karana gënanga, o Musa wohihi jaji o tönaka ngohi töiki tatötailäko maraioka aha wohihidöaka ngohino deʼ ahi ngoha-ngohaka idadi to ngomi miatönaka kahiädoʼädonika.

¹⁰O öraha nënanga o täongo moruata deʼ motoa iböto kade madero ma Jou wahëtongo o hali gënanga o Musaika. Gënanga idadi maöraha o Israeloka magogiriäka yödagi-dagi o tönakaikö kakahäka. Deʼ hokä ma Jou wojajioka, ma Jou ma wohïgoanoka ngohi hiädono ngohi towängo hiädono öraha nënanga, Namäke o öraha nënanga ahiümuru o täongo moritufange deʼ motoa,

¹¹mä katokuatohi hokä maöraha o Musa wohihüloko ngohi. Ngohi ahi küata kayaoahi mangale toparangi ekola okiadika todiai.

¹²Karana gënanga, nohihidöaka o öraha nënanga o daera deʼ mal̄oku-l̄okuoka wohi hijä jaji ma Jou ngohino maöraha ngohi deʼ hagala o nyawa mimako kinïki deʼ ngohi mimakilioro miao o laporan. O öraha gënanga ngona mahirete noïhene, dokengoka naga o nyawa yopöpako-pako hokä o meki yähëtongo o Enak mahöana manyawa. Onanga yogögere o kota ma ägo-ägomo mabebeno mehele magoronaka. Maraioka ma Jou aha wohïrïwo ngohi, hädono ngohi täkunu täduhu önanga, hokä ma Jou wahö hëto-hëtongo.”

¹³Done o Yosua wihigöungu o Kaleb o Yefune aingohaka, deʼ wihidöaka unangika o Hebron makota idadi aitönaka madutu.

¹⁴Hiädono öraha nënanga o kota gënanga kaidadiohi o Kaleb o Yefune aingohaka aidifauku, o Kenas manyawa gënanga, manga puhäka, karana ünanga wosetia deʼ wohingöunu ma Jouika, o Israeloka manga Jou Madutu.

¹⁵Mahiraino o Hebron yahëtongo o Arba makota. (O Arba ganga o nyawa duru wopöpäko-päko o Enak manyawa manga hidogoronaka). Done o berera gënanga i rïdi i sanangi karana o parängi okaua.