Read Tobelo O YOSUA 15 Bible Online

O YOSUA 15 - Tobelo bible

O YOSUA 15

¹O tau moi-o tau moi manyawa o Yehuda aihoanino yatarima manga hidöku o tönaka deʼ ma bätingi-ma bätingi ganga hokä nënanga: O koreharail̄e, o daera gënanga itaurika hiädono mabärene duru o koreharail̄e o Zin matonaka ikokakäha madaera o Edom mabatingoka;

²imuläenge o Hönenge ma Ngöto o koreharail̄e mabahaka de yaino,

³igila-gila o koreharail̄e yanönu ol̄oku magogelëhoro o Akrabim madaeraka hiädono o Zinika. Igila-gilali yanönu o Kades-Barnea o koreharail̄e, i gila-gila ya nönu o Hezron, idöa, o Adar madaerail̄e, deʼ ipaha irëhene madümutu o Karkaika.

⁴Genangokadau deʼ igila-gilali o Azmonika, daha yato möteke o ngäiri maiti o Mesir ma batingoka, deʼ ipaha i hi bobaha o Ngöto i Kokorona oka. Hoko gënanga o Yehuda aihöana madaera o koreharail̄e idaduoka mabätingi marïri. Deʼ o bätingi marïri gënanga imadadioli o bätingi marïri o koreharail̄e idaduoka o Israel maberera mata-mataika.

⁵O wange mahiwaröko idaduoka, mabätingi ganga o Hönenge ma Ngöto, igila-gila o koremieuku hiädono o Yordan ma Ngairi ma bionino. O koremieuku idaduoka, mabätingi imuläenge o Yordan ma Ngairi mabionino gënanga deʼ yaino,

⁶idöa o Bet-Hoglail̄e, daha igila-gila o Yordan ma Wai mabatingika. Genangokadau o koremie uku mabätingi gënanga idöa igila-gila o koremieuku hiädono o Bohan ai Helewoika (o Bohan ganga o Ruben aingohaka),

⁷deʼ ipaha igila-gila o Huha ma Waiika hiädono o Debirika, daha irehenoli o koremieuku yödümutu o Gilgal madaeraika o ngï ima tekerori hïmanga deʼ ol̄oku magogelëhoro o Adumim madaeraoka o koreharail̄e idaduoka deʼ o wai gënanga. Genangokadau deʼ igila-gilaoli o En-Semes ma äkere matitiika, daha o En-Rogelika,

⁸deʼ ipaha idöa yanönu o Hinom ma Wai o koreharail̄e idaduoka madopörono, kiaka genangoka igögere o Yerusalem, o Yebusi manyawa manga kota. Genangokadau deʼ o bätingi marïri gënanga yöümutu o dopörono matübuil̄e o Hinom ma Wai o wange madumuniha idaduoka, o Refaim ma Wai o koremieuku mabarenoka,

⁹deʼ ipaha igila-gila o Me-Neftoah ma äkere matitioka, hiädono o kota-kotaika imahi tigi-tigika o Efron mal̄okuika. Genangokadau o daera gënanga mabätingi marïri irëhene yödümutu o Baalika (enagënanga o Kiryat-Yearim),

¹⁰deʼ yakilöliti o Baala o wange madumuniha yödümutu o Edom deʼ mal̄oku-l̄okuokaika, daha igila-gila o koremie uku idaduoka o Yearim mal̄oku (enagënanga o Kesalon mal̄oku), deʼ iüti o Bet-Semesuku, deʼ ipaha i gila-gila o Timnaika.

¹¹O Timna deʼ yaino, o bätingi marïri gënanga ihigila-gila yödümutu o Ekron mal̄okuika o koremieuku idaduoka, daha i rëhene yö dümutu o Sikron ika, ya tilakuru o Baala mal̄oku, igila-gila o Yabneelika, deʼ mabobaha o Ngöto i Kokoronaoka,

¹²imadadi o bätingi marïri o Yehuda aihöana o wange madumuniha idaduoka. O daera gënanga magoronaka yogögere o tau moi-o tau moi manyawa o Yehuda aihöana magoronaka.

¹³ Imamöteke deʼ ma Jou Aipareta o Yosuaika, O Yehuda aidaera o hidöku moiiwi hidöaka o Kalebika o Yefune aingohaka o Yehuda aihoanino. Unangika iwi hidöaka o Hebron, enagënanga o Arba, o Enak aiama aikota.

¹⁴O Enak aidifauku ganga o Sesai manyawa, o Ahiman deʼ o Talmai manyawa. O Kaleb wädühu önanga mata-mata o Hebron mabereraka.

¹⁵Genangokadau ünanga wöiki wäparängi hagala o nyawa yogögögere o Debir mabereraka. (O kota gënanga mahiraino kayahëto-hëtongo hokä o Kiryat-Sefer).

¹⁶O Kaleb wato, ”O nagona yäkunu yaöra o Kiryat-Sefer, ünanga yäkunu wokäwingi deʼ tongohi ngohi öra, o ngo Akhsa.”

¹⁷O Otniel, o Kaleb aidödoto aingohaka airömanga o Kenas, waöra o kota gënanga; done o Kaleb wihidöaka o ngo Akhsa, ngoi öra, idadi o Otniel ngoi hëkata.

¹⁸Toönanga manga käwingi mawangeoka, o Otniel womigëgoto o ngo Akhsa hupaya mogähoko o tönaka o löa moi ami amaika. Done o ngo Akhsa amikeledai oka deʼ mouti, daha o Kaleb womilëha munangika okia amimau möigo.

¹⁹O ngo Akhsa mohäluhu, ”Ngohi tömau o äkere matiti o gähumu muruono naga, hababu o tönaka nohihidöa-döaka ngohino gënanga ama naga o daera madüdudungoka.” Done o Kaleb womihidöaka munangika o äkere matiti dina mautuoka deʼ o äkere matiti dai mabionino.

²⁰Deʼ ikali nënanga o tönaka yahidöa-döaka o tau moi-o tau moi manyawa o Yehuda aihöana magoronaka la idadi toönanga manga tönaka madutu.

²¹Hagala o kota duru ikurutika o koreharail̄e, idädadi to Yehuda, enagënanga magögere o Edom mabatingoka, mata-mata naga o kota monaoko deʼ hiwo, iwohamika makapo-käpongo magilolitïno. O kota-kota gënanga ganga: o Kabzeel, o Eder, o Yagur, o Kina, o Dimona, o Adada, o Kedes, o Hezor, o Yitnan, o Zif, o Telem, o Bealot, o Hazor-Hadata, o Keriot-Hezron (enagënanga o Hazor), o Amam, o Sema, o Molada, o Hazar-Gada, o Hesmon, o Bet-Pelet, o Hazar-Sual, o Bersyeba, o Baala, o Iyim, o Ezem, o Eltolad, o Khesil, o Horma, o Ziklag, o Madmana, o Sansana, o Lebaot, o Silhim, o Ain deʼ o Rimon.

³³Hagala o kota, iwohamika o kapo-käpongo magilolitïno, ma gögere o dopörono matimiino, mata-mata naga o kota ngimoi deʼ iata, enagënanga: o Estaol, o Zora, o Asna, o Zanoah, o En-Ganim, o Tapuah, o Enam, o Yarmut, o Adulam, o Sokho, o Azeka, o Saaraim, o Aditaim, o Gedera deʼ o Gederotaim.

³⁷Deʼ inoli o kota ngimoi deʼ butanga nënanga kamamoi deʼ makapo-käpongo magilolitïno: o Zenan, o Hadasa, o Migdal-Gad, o Dilean, o Mizpa, o Yokteel, o Lakhis, o Bozkat, o Eglon, o Khabon, o Lahmas, o Khitlis, o Gederot, o Bet-Dagon, o Naama deʼ o Makeda.

⁴²Deʼ ikali o kota hiwo nënanga kamamoi deʼ makapo-käpongo ma gilolitïno: o Libna, o Ester, o Asan, o Yiftah, o Asna, o Nezib, o Kehila, o Akhzib deʼ o Maresa.

⁴⁵Inoli o Ekron deʼ o kota mahohumüjuru deʼ makäpo-käpongo,

⁴⁶deʼ ikali mata-mata o kota deʼ makäpo-käpongo imahitigi-tigika o Asdod ika, o Ekron deʼ yaino hiädono o Ngöto i Kokorona ika.

⁴⁷Hoko genangoli o Asdod deʼ o Gaza deʼ makota ma ho humüjuru deʼ makäpo-käpongo imahikabarihika hiädono imahitigi-tigika o ngäiri maiti o Mesir mabatingika deʼ o Ngöto i Kokorona mahöhana.

⁴⁸Deʼ mal̄oku-l̄okuoka madaeraoka naga o kota ngimoi deʼ moi kamamoi deʼ makäpo-käpongo magilolitïno: o Samir, o Yafir, o Sokho, o Dana, o Kiryat-Sana (enagënanga o Debir) o Anab, o Estemoa, o Anim, o Gasyen, o Holon deʼ o Gilo.

⁵²Deʼ ikali o kota hiwooli nënanga, iwohamika makäpo-käpongo ma gilolitïno: o Arab, o Duma, o Esan, o Yanum, o Bet-Tapuah, o Afeka, o Humata, o Kiryat-Arba (enagënanga o Hebron) deʼ o Zior.

⁵⁵Deʼ ikali o kota ngimoioli nënanga kamamoi deʼ makäpo-käpongo magilolitïno: o Maon, o Karmel, o Zif, o Yuta, o Yizreel, o Yokdeam, o Zanoah, o Kain, o Gibea, deʼ o Timna.

⁵⁸Deʼ o kota butangaoli nënanga, kamamoi deʼ makäpo-käpongo magilolitïno: o Halhul, o Bet-Zur, o Gedor, o Maarat, o Bet-Anot deʼ o Eltekon.

⁶⁰Deʼ ikali o kota hinotoli nënanga ka mamoi deʼ makäpo-käpongo magilolitïno: o kota Kiryat-Baal (enagënanga o Kiryat-Yearim) deʼ o kota Raba.

⁶¹O tönaka iko kakäha madaeraka, naga o kota butangaoli nënanga kamamoi deʼ makäpo-käpongo magilolitïno: o Bet-Araba, o Midin, o Sekhakha, o Nibsan, o Gahi makota deʼ o En-Gedi.

⁶³ O Yerusalem makota i wohamoli tö Yehuda, mä o Yehuda manyawa koyakunua yädühu o Yebusi manyawa yogögögere genangokadau. Hiädono öraha nënanga o Yebusi manyawa kayö gogerohi deʼ o Yehuda manyawa o kotaka gënanga.