Read Tobelo O YOSUA 16 Bible Online

O YOSUA 16 - Tobelo bible

O YOSUA 16

¹O tönaka mabätingi madodungü yatö tümu-tümutu mangale to Yusuf aidifauku, imulaenge o Yordan ma Ngäiri deʼ yaino imahitigi-tigika o Yerikhoika, o wange mahiwaröko maakere matiti hiädono o tönaka ikokakähaika. O Yerikho deʼ yaino, o dodungü gënanga i döa hiädono o Betel madaera deʼ mal̄oku-l̄oku oka ika.

²O Betel deʼ yaino, o dodungü gënanga madümutu o Lusika, yanönu o Atarot, enagënanga o Arki manyawa manga ngï yogögere.

³Genangokadau deʼ o dodungü gënanga madümutu o wange madumuniha o Yaflet manyawa manga daeraika, hiädono o Bet-Horon-ma Bionino, igila-gila o Gezerika, daha mabaha o Ngöto iKokoronaika.

⁴Gënanga doka o daera yahidöa-döaka o Manasye deʼ o Efraim manga hoanika, la idadi toönanga manga tönaka madütu.

⁵Deʼ ikali nënanga ganga mabätingi-ma bätingi o tönaka yahi döa-döaka o tau moi-o tau moika o Efraim aihöana magoronaka. O wange mahiwaröko, toönanga manga tönaka madodungü imulaenge o Atarot-Adar deʼ yaino hiädono o Bet-Horon mautuiha,

⁶daha igila-gila madümutu o Ngöto iKokorona ika, O Mikmetat igögere o koremie uku idaduoka. O wange mahiwaröko, o bätingi ma dodungü gënanga irëhene madümutu o Taanat-Silo ika, daha ya nönu o wange ma hiwaröko madümutu o Yanoahika.

⁷Genangokadau deʼ o dodungü gënanga iuti o Atarot deʼ o Naharatuku, daha igila-gila yaïgoro o Yerikho deʼ mabaha o Yordan ma Ngairoka.

⁸O wange madumuniha, o Efraim aibätingi madodungü gënanga imulaenge o Tapaah deʼ yaino hiädono o Kana ma Ngairi maitiika, daha mabaha o Ngöto i Kokoronaoka. Gënanga doka o tönaka yahidöa-döaka o tau moi-o tau moika manyawa o Efraim aihoanino, la idadi toönanga manga tönaka madütu

⁹iwohamika o kota mahohumüjuru deʼ o käpongo magögere o Manasye ai daera magoronaka.

¹⁰ Mä o Efraim aihöana manyawa yäduhu ua o Kanaan manyawa o Gezer madaeraoka. Mahababu gënanga hiädono öraha nënanga o Kanaan manyawa kayogogerohi o Gezer madaeraoka ka mamoi deʼ o Efraim manyawa, mä önanga yäpakisä yokarajänga hokä o giläongo mangale o Efraim manyawa.