Read Tobelo O YOSUA 17 Bible Online

O YOSUA 17 - Tobelo bible

O YOSUA 17

¹O Yordan ma Ngairi owange madumuniha idaduoka ma hönonga yahidöaka o tau moi-o tau moika o Manasye o Yusuf aingohaka o riaka aidifauku mahönonga. O Makhir o Gilead aiama, ganga o Manasye aingohaka o riaka. Karana ünanga wo poparängi, done o Gilead deʼ o Basan madaera magögere o Yordan ma Ngairi o wange mahiwaröko idaduoka iwihidöaka unangika.

²O Yordan ma Ngairi o wange madumuniha idaduoka ya hidöaka o tau moi-o tau moika ma homoä o Manasye aidifauku, enagënanga manga tau madol̄a: o Abiezer, o Helek, o Asriel, o Sekhem, o Hefer deʼ o Semida; mata-mata gënanga o nau-nauru o Manasye o Yusuf aingohaka aidifauku. Onanga ganga o tau madol̄a mabälu-bäluhu.

³O Zelafehad, o Hefer aingohaka, o Gilead ai dänongo (o Gilead ganga o Makhir aingohaka, o Manasye ai danongo), koiwa aingohaka o nauru, duga-duga aingohaka o ngoheka, enagënanga; o ngo Makhla, o ngo Noa, o ngo Hola, o ngo Milka, o ngo Tirza.

⁴ Onanga yöiki ma Imam Eleazarika, o Yosua o Nun aingohaka deʼ o tutüda-tutüda, deʼ yato, ”Ma Jou wahetongoka o Musaika ngomiö kokiani mata-mata hakokimäke o tönaka hokä tongomi mia ira-ïranga.” Karana gënanga, ima möteke deʼ ma Jou Aipareta, o Zelafehad aingoha-ngohaka o ngoheka gënanga nia hidöaka o tönaka ka mamoi deʼ toönanga manga ira-ïranga.

⁵Hoʼ koigoungua duga-duga ka o nau-nauru o Manasye aidifauku ya mäke o hidöku o tönaka, mä aidifauku o ngongoheka ö. Mahababu gënanga yadodoa ho o Manasye aihöana niahidöaka o hidöku ngimoi, mahomöa deʼ o Gilead deʼ o Basan matonaka o Yordan ma ngäiri o wange mahiwaröko idaduoka. O Gilead matonaka niahidöaka o Manasye aidifauku mahomoahi.

⁷O Manasye aihöana manga daera mabätingi madodungü imulaenge o Asyer deʼ yaino o Mikhmetatika o Sikhem o wange mahiwaröko idaduoka. Genangokadau o dodungü gënanga iuti o koreharauku hiädono o En-Tapuah aiahaluku manga daeraika.

⁸O Tapuah madaera ganga tömanasye aihöana manga daera, mä o Tapuah makota, o batingoka, ganga to Efraim aihöano.

⁹Deʼ igila-gilaoli o Manasye aidaera mabätingi madodungü gënanga iuti hiädono o Kana ma Ngairi maitiuku. O koreharail̄e idadu o ngäiri maiti gënanga makota-kota ganga to Efraim, ngaroka naga o Manasye aidaera magoronaka. O Manasye aidaera mabätingi madodungü gënanga igila-gila yanönu o ngëkomo o ngäiri maiti o koremieuku idaduoka gënanga, daha ihi bobaha o Ngöto iKokoronaka.

¹⁰Hokogënanga o Efraim naga o koreharail̄e idaduoka, deʼ o Manasye o koremieuku idaduoka, deʼ o Ngöto iKokorona ganga toönanga manga bätingi o wange madumuniha idaduoka. O wange madumuniha deʼ o koremie uku mahidogorona, o Manasye aihöana gënanga imahika bätingi deʼ o Asyer aidaera, deʼ o wange mahiwaröko deʼ o koremieuku mahidogorona, ima hika bätingi deʼ o Isakhar ai daera.

¹¹O Isakhar deʼ o Asyer manga daera magoronaka gënanga naga to Manasye ai tönaka, enagënanga: o Bet-Sean deʼ o Yibleam deʼ makäpo-käpongo ma gilolitïno. Deʼ inoli: o Dor (o kota ma gögere o gahi ma datekoka), o En-Dor, o Taanakh, o Megido deʼ makäpo-käpongo am gilolitïno.

¹² Mä o manasye aihöana yakunua yä duhu o kota gënanga ma nyawa; ma hababu gënanga o Kanaan manyawa kaihirahi yo gögere genangokadau.

¹³Ma boboloi oli o wange ma duru ino o Israel manyawa iholoi yo kuatoka, önanga yä duhu ua mata-mata o Kanaan ma nyawa; önanga duga-duga yä pakisä o nyawa geönanga yo karajänga mangale önanga.

¹⁴O Yusuf aidifauku yo tëmo o Yosuaika, ”Yadodoa hongomi imi hidöaka o tönaka duga-duga moiika, enahïoko ngomi duru kamiangöe, karena ma Jou womi hibarakatioka ngomi?”

¹⁵O Yosua wohäluhu, ”Karana ngini niwöe holi, deʼ o Efraim ai daera deʼ mal̄oku-l̄okuoka itehëhotoholi mangale ngini, ni öiki deʼ o Refaim manyawa manga daeraika. Nima hidiai niangï mahungi toönanga manga honganoka gënanga.”

¹⁶O Yusuf aidifauku gënanga yohäluhu, ”O daera deʼ mal̄oku-l̄oku gënanga maluasi mimake wedonua, enahïoko o Kanaan manyawa yogögögere o tönaka irata-rataoka deʼ manga kereta o behi ihi poparängi — kayaoa önanga yogögögere o Bet-Seanoka deʼ ma käpo-käpongo magilolitïno, kayaoa önanga yogögögere o Yizreel ma Waioka.”

¹⁷Done O Yosua wätemo o Efraim aihöana deʼ o Manasye o wange madumuniha gënanga, ”Itiai, ngini duru kaniangöe ikali ni kuata, deʼ ipätutu hini hidöaka iholoi deʼ o hidöku moi o tönaka.

¹⁸Nia l̄ë o daera deʼ mal̄oku-l̄oku, hababu ngarokö o daera gënanga kao honganohi, ngini yakunu nihidiai o daera gënanga deʼ ni ma hi tingini mata-mataika, deʼ mangale hagala o Kanaan manyawa gënanga, ngini yäkunu niäduhu önanga yoküata deʼ manga kereta o behi ihi poparängi.”