Read Tobelo O YOSUA 20 Bible Online

O YOSUA 20 - Tobelo bible

O YOSUA 20

¹ Deʼ ipaha ma Jou wïhüloko o Yosua

²wa tëmo hoko nënanga o Israel manyawaika, ”Ngohi to hiparetaka o Musa ika hupaya ünanga wohingahu nginiika mangale o wo rïwo makota, enagënanga hagala o kota o nyawa yäkunu i hi öara manga diri la yamäke o rorïwo. O örahanënanga niaïriki hagala o kota gënanga.

³O nyawa yätöma-töma o nyawa mahomoä ko yohangajaua, yäkunu yopirïngana o kotaika gënanga la womahirëhene deʼ o nyawa yomau yabälaha itotorou unangika.

⁴Unanga yäkunu wo pirïngana o kotaika gënanga itimoi wadäene, deʼ wöiki o juru hakimi mangïika o kota gënanga mangörana ma ägo-ägomo, daha wohitarärono o tutüda-tutüdaika genangoka okianaga i dädadioka. O tutüda-tutüda gënanga aha iwihigumal̄a ünanga wöngöhama o kota gënanga, deʼ iwihidöaka unangika o ngï la wogögere.

⁵Nako o nyawayömau-mau yabälaha i tötorou gënanga iwi ginïki ünanga hiädono genangika dau, o berera ma dutu gënanga yakunua iwihilapahi ünanga o nyawaika gënanga. Onanga kokiani iwïrïwo ünanga, hababu ünanga wätöma o nyawa kowohangajaua, deʼ karana kowïdohatua.

⁶Unanga yäkunu wogögere o kotaka gënanga hiädono ünanga iwi tailakoka wahöwono ekola kowali o kawaha manga himangoka, deʼ hiädono o nyawa wodä dadi ma Imam wo Lamo-ämoko ma orahoka gënanga wohönenge. Gënanga dei i böto dahaö o nyawa ge ünanga yäkunu wolio aikapongika kiaka ünanga wohi öara aidiri genangokadau deʼ waino.”

⁷Done o Yordan ma Ngairi madaera o wange madumuniha o Israel manyawa ihitantu o kota-o kota nënanga hokä o rorïwo makota: o Kedes o Naftali aitonakoka deʼ mal̄oku-l̄okuoka o Galilea madaeraoka, o Sikhem o Efraim aitonakoka deʼ mal̄oku-l̄okuoka de, o Hebron o Yehuda aitonakoka deʼ mal̄oku-l̄okuoka.

⁸O Yordan ma Ngairi madaera o wange mahiwaröko o tönaka ikokakaha irata-rata oka o Yerikho o wange mahiwaröko idaduoka, önanga ihi tantu o kota-kota nënanga hokä o rorïwo makota: o Bezer makota o Ruben aidaeraoka, o Ramot makota o Gilead mabereraka o Gad aidaeraoka, deʼ o Galon makota o Basan maberera oka o Manasye aidaeraoka.

⁹Gënanga mata-mata o rorïwo makota ihi tö tantu mangale o Israel manyawa deʼ mangale o nyawa ma poretino yogögögere toönanga manga hidogoronaka. Moi-moi o nyawa yätöma o nyawa ma homoa ko yo hangaja ua, yäkunu yamäke o wo rïwo o kota oka gënanga nako naga o nyawa yäginïki yomau yabälaha ito torou onangika; ünanga yakunua iwitöma nako iwitailakowahi wahowono ekola kowali o kawaha manga himangoka.