Read Tobelo O YOSUA 21 Bible Online

O YOSUA 21 - Tobelo bible

O YOSUA 21

¹ O wange moiuku o tau madol̄a ma bälu-bäluhu o Lewi aihöana magoronaka yöiki o Siloika o Kanaan mabereraka, deʼ iwïhïmanga ma Imam Eleazar, o Yosua o Nun aingohaka, deʼ o tau madol̄a mabälu-bäluhu yongödumu o Israeloka manga höana. Onanga yotëmo, ”Deʼ ma dodagi o Musa, ma Jou wo hiparetaka hupaya ngomino, o Lewi manyawa, ni mi hidöaka o kota mangale to ngomi mia ngï migögere deʼ o tönaka irörata-rata mia kota gënanga magilolitïno mangale tongomi mia aiwani mia pöpaliara,”

³Done o Israel manyawa yamöteke ma Jou Aipareta. Toönanga mahirete manga tonakino, önanga yahidöaka o Lewi manyawaika o kota ihitö tantu deʼ matonaka irö rata-rata ika.

⁴Duru madodihiraka yatarima manga kota ganga o Kehat aiahaluku o Lewi aihöana manga tau madol̄a. Ma Imam Harun aidifauku manga tau madol̄a ya hidöaka o kota ngimoi deʼ hange o Yehuda o Simeon deʼ o Benyamin manga höana madaeraino.

⁵O tau madol̄a ma homoa o Kehat ai bol̄arino ya hidöaka o kota ngimoi o Efraim aihöana manga daera ino, o Dan aihöana deʼ ikali o Manasye aihöana o Yordan mangäiri o wange ma dumuniha idaduoka.

⁶O Gerson aiahaluku yamäke o kota ngimoi deʼ hange o Isakhar, o Asyer, o Naftali manga höana madaera ino, deʼ o Manasye aihöana o Yordan ma Ngairi o wange ma hiwaröko i dadu oka.

⁷O tau madol̄a o Merari aiahaleno ya mäke o kota ngimoi deʼ hinoto o Ruben, o Gad deʼ o Zebulon manga hoanino.

⁸Hoko gënanga o Israel manyawa ihikodöku hagala o kota iheto-hetongoka deʼ matonaka irö rata-rata deʼ madodagi o undi o Lewi manyawaika, hokä ma Jou wohipo pareta o Musaika.

⁹O Kehat aiahale o Lewi aihöana magoronaka, o imam-imam o Harun aidifauku madodihiraka yatarima manga kota; önanga ya hidöaka o kota ngimoi deʼ hange deʼ matonaka irata-rata ika. O Yehuda deʼ o Simeon manga hoanino önanga yatarima o kota hiwo, enagënanga: o Libna, o Yatir, o Estemoa, o Holon, o Debir, o Ain, o Yuta, o Bet-Semes deʼ o Arba, ihirömanga i möteke o Enak aiama airömanga. O kota gënanga, örahanënanga ma römanga o Hebron, ganga moi o rorïwo makota o Yehuda ai tonakoka deʼ mal̄oku-l̄okuoka. O kota nënanga madumüle deʼ makäpo-käpongo iwihidöakoka o Kalebika o Yefune aingohaka la idadi toünanga aitönaka madutu. O Benyamin aihoanino önanga yatarima o kota iata, enagënanga: o Gibeon, o Geba, o Anatot deʼ o Almon.

²⁰O tau madol̄a ma homoa o Kehat aiahali ya hidöaka o kota ngimoi deʼ matonaka irö rata-rata. O Efraim aihoanino önanga yatarima o kota o gähumu iata, enagënanga: o Bet-Horon, o Kibzaim, o Gezer deʼ o Sikhem, ganga moi o rorïwo ma kota o Efraim aitonakoka, deʼ mal̄oku-l̄okuoka. O Dan ai hoanino önanga yatarima o kota iata, enagënanga o Elteke, o Gibeton, o Ayalon deʼ o Gat-Rimon. O Manasye aihoanino o wange madumuniha idaduoka önanga yatarima o kota hinoto, enagënanga: o Taanakh deʼ o Gat-Rimon.

²⁷Moi o ahaluku ma homoa o Lewi aihöana magoronaka enagënanga o Gerson aiahaluku. O tau-o tau madol̄a o Gerson magoronaka yahidöaka o kota ngimoi deʼ hange deʼ matonaka irörata-rata. O Manasye aihoanino o wange mahiwaröko idaduoka yatarima o kota hinoto, enagënanga: o Beestera deʼ o Golan moi o rorïwo makota o Basan madaeraoka. O Isakhar aihoanino önanga yatarima o kota iata, enagënanga: o Kisyon, o Dobrat, o Yarmut deʼ o En-Ganim. O Asyer aihoanino önanga yatarima o kota iata, enagënanga: o Misal, o Abdon, o Helkat deʼ o Rehob. O Naftali aihoanino önanga yatarima o kota hange, enagënanga: o Hamat-Dor, o Kartan deʼ o Kedes moi o rorïwo makota o Galilea madaeraoka.

³⁴O ahaluku mahou o Lewi aihöana magoronaka enagënanga o Merari aihöana yahidöaka o kota ngimoi deʼ hinoto deʼ matonaka i rörata-rata. O Zebulon aihoanino önanga yatarima o kota iata, enagënanga: o Yokneam, o Karta, o Dimna deʼ o Nahalal. O Ruben aihoanino önanga yatarima o kota iata, enagënanga: o Bezer, o Yahas, o Kedemot deʼ o Mefaat. O Gad aihoanino önanga yatarima o kota iata, enagënanga: o Mahanaim, o Hesybon, o Yaezer deʼ o Ramot, moi o rorïwo makota o Gilead madaeraoka.

⁴¹Hoʼ i ngödumu o Israel manyawa manga tonakoka mangöe naga o kota moruata deʼ tufange deʼ matonaka irörata-rata magilolitïno yahidödöa-döaka o Lewi manyawaika.

⁴³Hoko gënanga ma Jou wahidöaka o Israel manyawaika mata-mata ika o tönaka wa hijä jaji deʼ ma köboto toönanga mangaete deʼ mangatohora. Yö gogeroka o berera gënanga o Israel manyawa yogögere ihigila-gila dokengoka.

⁴⁴Deʼ ima möteke okianaga ma Jou wa hijä jaji oka toönanga manga ete deʼ manga tohora ika, o berera gënanga irïdi karana ma Jou wö göana. Toönanga manga haturü-haturü ka moi ö ma yakunua ya läwani, hababu ma Jou wo hidöaka o Israel manyawa ika yä ütumu toönanga manga haturü mata-mata.

⁴⁵Ma Jou waganäpu aijaji moi-moi o Israel ma umatika; koiwa moi wa ganäpu ua.