Read Tobelo O YOSUA 22 Bible Online

O YOSUA 22 - Tobelo bible

O YOSUA 22

¹Deʼ ipaha o Yosua wäähoko o Ruben deʼ o Gad manga hoanino manyawa deʼ o Manasye aihöana mahönonga o Yordan ma Ngairi o wange mahiwaröko idaduoka,

² daha wätemo onangika, ”Ngini niadiaioka hagala moi-moi wohi poparetanginika o Musa ma Jou Ai giläongo genanga. Deʼ ngini o ni hi ngounoka hagala ahi pareta.

³Ma dëkana komaiwa ngini nia mal̄a ika nia röria dödoto, o Israel manyawa mahomoa, yoparängi onamahirete. Ngini nihingounoka ma Jou nia Jou Madutu Ai pareta nia göu-göungu.

⁴Done imamöteke deʼ aijaji, ma Jou nia Jou Madutu wahidoakoka manga berera irïdi nia röriadodotika o Israel manyawa mahomoa. Hoʼ, öraha nënanga nimailioro nia daera mahireteika o Yordan ma Ngäirika o wange mahiwaröko idaduoka gënanga o Musa wi nihidöa-döaka nginiika kahuruonino.

⁵Deʼ niö göana hupaya ngini nihingöunu o tita o Musa wohipo pareta nginiika enagënanga: Ni wï dora ma Jou nia Jou Madutu, nia möteke Ai mau nihingöunu hagala Ai pareta, ni setia unangika, deʼ ni ma giläongo unangika deʼ niahïninga magähumu deʼ niajiwa magähumu.”

⁶Deʼ ipaha o Yosua wa hibarakati deʼ wa higumal̄a önanga ima kilioro toönanga manga daeraika deʼ wahidöaka o behëhongo nënanga, ”Ngini öraha nanga ni kaya deʼ ngini ma kilioro deʼ ni ao o aiwani o gigini, o haaka, o gurasi, o tabaga, o behi deʼ o pakëanga. Nia banäkono mahasili gënanga niahikodökuö mahomoaika nimako höana moi manyawa.” Done o Ruben, deʼ o Gad manga höana, deʼ o Manasye aihöana o Yordan o wange mahiwaröko gënanga yämal̄a o Israel manyawa mahomoa, daha o Silo mabereraka deʼ imä jobo o Kanaanika yameta toönanga manga tönaka mahirete o Gilead madaeraka. Onanga yogögere o tönaka gënanga deʼ ma Jou Aipareta deʼ madodagi o Musa. (O Manasye aihöana mahönonga yatarimaka o Musaino, o tönaka gënanga o Yordan ma Ngäiri o wange mahiwaröko idaduoka, deʼ o Manasye aihöana mahönonga mahomoahi yatarima o tönaka o Yosuaino o Yordan ma Ngairi o wange madumuniha ka mamoi deʼ o höana mahomoa.)

⁷

⁸

⁹

¹⁰Maöraha o Ruben deʼ o Gad manga höana, deʼ o Manasye ai höana o Yordan o wange ma hiwaröko gënanga i ma hiädono o Gelilot mabereraka — ka o Yordan ma Ngairokahi o wange ma dumuniha idaduoka — önanga i hi goko o gähumu moi o huhuba mangï ma ämo-ämoko deʼ i küata i ma hi tigi-tigika o ngairika.

¹¹O Israel manyawa ma homoa i ma ko höana moi yo ïhene önanga yo tëmo, ”O Ruben deʼ o Gad manga höana manyawa deʼ o Manasye aihöana o Yordan ma Ngäiri o wange mahiwaröko i hi gokoka o gähumu moi o huhuba mangï o Gelilot mabereraka ima hi tigi-tigika o Ngairika to ngone nanga daera oka!” Done önanga mata-mata imatoomu o Silo mabereraoka yomau yäparängi o Israeloka manga höana manyawa o Yordan ma Ngairi o wange mahiwaröko.

¹²

¹³Daha o Pinehas, ma Imam Eleazar aingohaka o Israeloka iwi hüloko o Ruben deʼ o Gad manga hoanika, deʼ o Manasye aihöana o Gilead madaeraoka o Yordan o wange mahiwaröko.

¹⁴Ima ko möteke deʼ o Pinehas ima jobo oli ya ngimoi o Israeloka manga höana mabälu-bäluhu, — o höana amomoi o Yordan ma Ngairi o wange madumuniha womatëngo, moi-moi ganga o tau madol̄a manga häeke toönanga manga ahaluku magoronaka.

¹⁵Done önanga ima hiädono o Ruben deʼ o Gad manga höana mangïoka deʼ o Manasye aihöana o Gilead manga daera oka.

¹⁶ Deʼ yo ngödumu ma Jou Aiumati deʼ toönanga manga römanga, önanga yätemo o Ruben deʼ o Gad manga höana manyawaika deʼ o Manasye ai hoanika gënanga, ”Ya dodoa ho ngini ni diai o hali ito torou nënanga o Israeloka manga Jou Madutuika? Deʼ nihigoko niahuhuba mangï mahirete ngini niwilawani ma Jou! Ngini nihimotekoka ua hagala aipareta!

¹⁷ Boteka ngini nimä hiningaua tongone nanga baradoha o Peor mabereraoka? Oraha gënanga ma Jou wonä hükumu ngone deʼ o babaku o panyake, ngarokö ngone nënanga ai umati mahirete! Hiädono o öraha nënanga ngone ka hatagongohi ma gorehau. Boteka gënanga ka ikurangohi?

¹⁸Deʼ öraha nënanga, boteka ngini nimau niwïporetoli ma Jou? Nako o wange nënanga ngini niwilawani ma Jou, yarehe ünanga aha wo ngamo o Israel manyawaika mata-mata.

¹⁹Nako nia daera gënanga ipëseke deʼ ipatutua mangale niadiai o pupuji mangï ma Jouika, ni ma tagali dika nenangino ma Jou Ai daera ino, kiaka genangoka naga ma Jou Ai Tau. Ni gähoko to ngomi mia daera o hidöku moi, mä uha ni wi lawani ma Jou ekola ni mï lawani ngomi deʼ niö dogo o gähumu moi o huhuba mangï ma homoa, ena hioko ena naga ma Jou to ngone nanga Jou Madutu ai huhuba mangï.

²⁰ Ni mä hininga o Akhan o Zerah aingohaka wöluku wa möteke ma Jou Ai pareta ya korona o bära-bäranga kiaka kokiani ya binaha, deʼ okia ma bobahaka? I ngödumu o Israel manyawa wähükumu. Yo baradoha duga-duga o Akhan, mä yo hönenge ka unangua dika mahirete!”

²¹Daha o Ruben deʼ o Gad manga höana manyawa deʼ o Manasye o wange mahiwaröko gënanga yo häluhu,

²²”Duru Wo Ko kuaha ganga ma Jou! Duru Wo Ko kuaha ganga ma Jou! Unanga wo hi öriki ya dodoa ho ngomi midiai o hali nënanga, deʼ ngomi mi mau hupaya ngini manihiöriki! O dëmo ma ade ngomi midiai o hali gënanga deʼ madüngutu miwilawani ma Jou ekola karana ngomi miwingakuokaua unangika, mal̄aikali ngomi mihönenge öraha nënanga dika.

²³Ma Jou mahirete womï hükumu ngomi, nako ngomi deʼ mia düngutu miwilawani ma Jou deʼ mihigoko o huhuba mangï to ngomi mahirete la mï hihuba o huhuba yatötühu-tühuku ekola o huhuba o gandum ekola o rimoi mahuhuba to ena mal̄okuoka.

²⁴Ko genangua tongomi mia düngutu. Roria dödoto! Ngomi mihigoko o huhuba mangï gënanga, karana ngomi mi hawatere damä o wange ma duru ino ti ngini nia difa uku aha ya tëmo mia difa uku, ’Ngini kö kia-kia ua nia do döhanga deʼ ma Jou, o Israeloka manga Jou Madutu.

²⁵Nia mäke ünanga wo hi gogeroka o Yordan ma Ngairi nënanga tongone nanga hidogoronaka imöteke ma diai mangale imi hikitingaka ngomi dede ngini deʼ o Ruben deʼ o Gad manga nyawa. Igöungu ngini kokia-kiaua nia dodöhanga deʼ ma Jou.’ Done okia aha ima dadi? Maraioka ti ngini nia difauku aha yadiai tongomi mia difauku ima tögumu yopuji ma Jouika.

²⁶Hoʼ ngomi mihigoko o huhuba mangï, ko igoungua mangale o huhuba yatö tühu-tühuku ekola mangale to ngomi mia huhuba mi hi huba-huba,

²⁷mä mangale idadi o nonako ngone ino ari hohononga, deʼ mangale to ngone nanga difauku o wange ma duru ino, itiai ngomi nënanga mipuji ma Jouika aidoomu ma Tauoka deʼ miao o huhuba ya tö tühu-tühuku, o huhuba ihihuba-huba deʼ o rimoi mahuhuba. Deʼ hoko gënanga tingini nia difauku aha koyotëmoua tongomi mia difauku ko kia-kia ua manga dodöhanga deʼ ma Jou.

²⁸Hoʼ, to ngomi mia düngutu ganga: o demo ma ade ti ngini nia difauku yo tëmo hoko gënanga, done to ngomi mia difauku yäkunu yo tëmo, ’Nia mäke o huhuba mangï gënanga! To ngomi miaete deʼ miatohora i hi goko o gähumu moi o huhuba mangï ka imatëro deʼ ma Jou Ai huhuba mangï, ko igoungua mangale o huhuba yatötühu-tühuku, mä mangale o nonako ngone ino ari hohononga.’

²⁹Ni ngaku, ngomi miöluku miwilawani ma Jou ekola mimatögumu mihigiläongo Unangika deʼ miö dogo o huhuba mangï ma homoa mangale o huhuba yatötühu-tühuku ekola o huhuba o gandum o huhuba mihihö huba-huba, enahioko ma Jou tongone nanga Jou Madutu Ai huhuba mangï enanaga ma Jou Ai Doomu ma Tau mahimangoka.”

³⁰Mata-mata ihiade-ade o Ruben deʼ o Gad manga höana manyawa deʼ o Manasye aihöana o wange mahiwaröko gënanga ma Imam Pinehas woihene deʼ ikali o Israel makawaha manga bälu-bäluhu yängimoi ö o Yordan ma Ngairi o wange maumunino. Done onangö ya maö yosanangi yoïhene manga hitararono gënanga.

³¹Daha o Pinehas, ma Imam Eleazar aingohaka, wätemo, o Ruben deʼ o Gad manga höana manyawaika deʼ o Manasye o wange mahiwaröko, ”Orahanënanga ngomi mihiöriki ma Jou naga dede ngini, karana ngini niwilawanua Unanga: Ngini nia hihalamatoka o Israel manyawa deʼ ma Jou Ai hukumangino.”

³²Gënanga deʼ iböto o Pinehas deʼ o Israeloka manga bälu-bäluhu gënanga ima göraka yosobo. Onanga yämal̄a o Ruben deʼ o Gad manga höana manyawa o Gilead madaeraoka, daha ima kilioro o Kanaanika, deʼ ipaha o perekara gënanga ihingahu o Israel manyawaika.

³³Done o Israel manyawa mayamaö yosanangi deʼ o hali gënanga, hiädono önanga iwi higo giriri ma Jou Madutu. Onanga ihiade-ade okaua mangale toönanga manga niati mangale yäparängi o Ruben deʼ o Gad manga nyawa, deʼ mangale yabinaha manga berera.

³⁴Mabobaha o Ruben deʼ o Gad manga höana gënanga yotëmo, ”O huhuba mangï nënanga o hakihi mangale ngone mata-mata ma Jou ganga ma Jou Madutu.” Done önanga ihi römanga o huhuba mangï gënanga ö Hakihi”.