Read Tobelo O YOSUA 23 Bible Online

O YOSUA 23 - Tobelo bible

O YOSUA 23

¹Madekanoka ma Jou wahidöaka o Israel manyawaika manga berera irïdi; toönanga manga haturü ya ruaeokaua. O öraha gënanga o Yosua duru iwiperekioka.

²Done ünanga wa ähoko yongödumu o Israel manyawa, manga bälu-bäluhu, manga tutuda, manga haki-hakimi, deʼ manga kokapita, daha wätemo, ”Ngohi örahananga ihiperekioka.

³Ngini niamäkeoka hagala moi-moi ma Jou nia Jou Madutu wadodiai mata-mata o höana deʼ o berera manyawaika nenangokadau mangale ngini. Yopoparängi mangale ngini ganga ma Jou nia Jou Madutu mahirete.

⁴Hagala o höana deʼ o berera manyawa manga tönaka mahouohi, hoko genangoli mata-mata o höana deʼ o berera manyawa manga tönaka ngohi tautu-utumoka, enagënanga o tönaka ima höhöhe ika o Yordan ma Ngairi o wange mahiwaröko deʼ yaino igila-gila o wange madumuniha hiädono o Ngöto iKokoronaika, mata-mata gënanga ngohi to hikodöku oka ngini ika la idadi niatönaka ma dutu.

⁵Ma Jou nia Jou Madutu aha wahidodöhuku o höana deʼ o berera manyawa gënanga, deʼ nginioka deʼ yopiringana nako ngini niöiki niäparängi önanga. Ngini aha nima hitingini toönanga manga berera, hokä ma Jou nia Jou Madutu wini hijajioka nginiika.

⁶Karana gënanga, nimä göana hupaya ngini nihingöunu deʼ ni hi dagi hagala itö tüli-tülihi o Musa ai Tita ma Buku magoronaka. Kamoiö mauha niatilakuru o tita-tita gënanga.

⁷Deʼ hoko gënanga ngini aha ko ni maka ganua deʼ hagala, o höana deʼ o berera manyawa mahouohi tingini nia hidogoronaka. Ngini aha kokiani nia hetongua toönanga manga gikiri ma röma-römanga ekola ni köboto deʼ o römanga gënanga. Ikali ngini ni puji ua ekola ni huba o gikirika gënanga.

⁸Ngini yo mo holoi ka ihirahi ni setia ma Jouika, hokä ngini nia do diai oka hiädono öraha nënanga.

⁹Hagala o höana deʼ o berera ilägo-ägomo deʼ ikua-kuata ma Jou wä duhu ika mangale ngini; önanga ka o nyawa moi ö ko yopöaua inï lawani ngini.

¹⁰ Ima tëngo tingini niahidogoronaka ni äkunu nia hïhanga deʼ manga rïbu-rïbuhu, karana ma Jou nia Jou Madutu wo parängi mangale ngini, hokä winïjaji oka.

¹¹Hababu gënanga, ni mä ho hininga la ni wïdora ma Jou nia Jou Madutu.

¹²Nako ngini ni setia ua deʼ ngini nimaka ganu deʼ o höana deʼ o berera manyawa ka yo gö gögerohi nia hidogoronaka, deʼ ngini ni kawingi de de önanga,

¹³ni mä hininga marai ma Jou nia Jou Madutu aha ko wä duhu oka ua mangale ngini. Iiduluyaino, önanga aha yo dadi o bodito mangale ngini, hababu önanga aha yo dadi hokä o modoi ekola hokä o dadägoko mangale ngini. Onangö aha inï diai ngini hangihara; hababu önanga aha yo dadi hokä o g göhara nia poretika ekola hokä o hihika nialako magoronaka. Ngini aha gila-gila nihangihara hiädono nia hidogoronaka ka o nyawa moi ö ma ko yo gö gogerua o berera ma oa-oaka nënanga ma Jou nia Jou Madutu winihidöa-döakoka nginiika.

¹⁴O örahanënanga maorahoka ngohi tohönenge. Ngini mata-mata, moi-moi nihi öriki itiai ma Jou nia Jou Madutu winihidöakoka nginiika hagala ma oa-oa Winijäjaji. Moi-moi Ai jaji Waganapuoka, ka moi ö deʼ waganapuua.

¹⁵Mä hokä sarakia Unanga waganapu moi-moi Ai jaji nginiika, hoko genangoli ünanga marai oka aha Wadiai moi-moi nia go göhara nginiika.

¹⁶Nako ngini nia tilakuru o jaji ma Jou nia Jou Madutu wohipo paretaka nginiika hupaya nihi ngöunu, deʼ ngini ni öiki nipuji o gikiri mahomoaika ikali ni huba o gikiri gënanga, done ma Jou aha wongamo deʼ winï hükumu ngini. O öraha madodipoko magoronaka ngini mata-mata aha nihïhanga o berera maoa-oaka nënanga, winihidödöa-döaka ma Jou.”