Read Tobelo O YOSUA 24 Bible Online

O YOSUA 24 - Tobelo bible

O YOSUA 24

¹O Yosua wätoomu mata-mata o Israel manyawa o Sikhem mabereraka, daha wähüloko manga bälu-bäluhu, o tutuda, o hakimi deʼ o kokapita yaino iwï hïmanga. Done önanga yaino wï hïmanga ma Jou Madutu.

² Deʼ ipaha o Yosua wätemo onangika mata-mata, ”Ni ïhene okianaga wahëto-hëtongo nginika ma Jou o Israeloka manga Jou Madutu, ’Kahuruonino niaete deʼ niatohora yo gögere o Efrat ma Ngairi mahonongaka, deʼ yahuba hagala o gömanga. Womatëngo toönanga manga hidogoronaka una ganga o Terah, o Abraham deʼ o Nahor manga ama.

³ Daha Ngohi til̄ë o Abraham, niatohora manga ama gënanga, manga bereraka o Efrat mahonongaka gënanga, deʼ tïhüloko ünanga wödagi wa kaika wa kaino wa mode-modekika o Kanaan maberera. Ngohi tihidöaka unangika o ngohaka deʼ o dänongo manga ngöe. Madodihiraka Tihidöaka unangika o Ishak,

⁴ daha o Ishakika Tihidöaka o Yakub deʼ o Esau. Ngohi tihidöaka o Esauika o Edom matonaka deʼ mal̄oku-l̄okuoka idadi ai tönaka ma dutu, mä o Yakub, nia tohora ai ama gënanga, ima tagali o Mesir ika, ka mamoi deʼ aingoha-ngohaka.

⁵ Deʼ ipaha Ngohi tähüloko o Musa deʼ o Harun, deʼ to hitapal̄u o bodito ma ägo-ägomo o Mesiruku, daha dokengoka deʼ ngohi tinihihupu.

⁶ Ngohi täao niaete deʼ nia tohora gënanga o Mesir mabereraka deʼ yo hupu, daha o Mesir manyawa yä ginïki önanga deʼ o kereta ihipo parängi deʼ o tentara o kuda uku yö bäre-bärene. Deʼ maöraha nia ete deʼ nia tohora gënanga ima hiädono o Gelagah ma Ngötoka,

⁷önanga ima hiböaka ngohino yo gähoko o ro rïwo. Done önanga deʼ o Mesir manyawa manga hidogoronaka gënanga Tadiai idadi ihuhutu, deʼ hagala o Mesir manyawa gënanga Tä tämunu deʼ o gahi hiädono önanga mata-mata yä lutu. Ngini ni hiörikoka okianaga Ta dodiai o Mesirika. Duru kahädekanino ngini nigögere o tönaka i kokakahaoka.

⁸ Daha Ngohi tinïao ngini o Amori manyawa manga bereraika yo gögere o Yordan ma Ngairi o wange mahiwaröko. Onanga inï parängi ngini, mä Ngohi ta diai ngini niä ütumu önanga. Ngini nia öra toönanga manga berera, deʼ ngohi tä binaha önanga.

⁹ Daha o Moab manga koano, enagënanga o Balak o Zipor aingohaka wi nïlawani ngini. Unanga wähüloko o nyawa o Bileamika o Beor aingohaka deʼ wogähoko hupaya o Bileam winilolai ngini.

¹⁰Mä ngohi tohimotekua o Bileam ai mau, done ünanga wi ni hibarakati ngini. Hoko gënanga o Balakoka deʼ Ngohi tinihihalamati ngini.

¹¹ Deʼ ipaha ngini niatöbongo o Yordan ma Ngairi, deʼ ni ma hiädono o Yerikhoika. O Yerikho manyawa inï parängi ngini, hoko genangoli o Amori manyawa, o Feris manyawa, o Kanaan, o Het, o Girgasi, o Hewi deʼ o Yebus manyawa. Mä Ngohi tohidöaka ngini niaütumu önanga mata-mata.

¹² Maöraha ngini ni tagi nia himangika niaparängi önanga, Ngohi tadiai önanga yobingu deʼ yo häwana, hiädono ma koano Amori yahinoto gënanga nginioka deʼ yopiringana. Konia oworua deʼ ikali konia toimua yadiai ngini niä ütumu.

¹³ O tönaka Tinihidöaka nginiika, ngini nia tarima koiwa mahuha deʼ makangela. De hagala o kota Tini hidöa-döaka ngini ika konginiua nihigoko. Maöraha nënanga ngini nigögere dokengoka, deʼ ka nginioli nia jäme ma angguru mahöhoko inoli ma zaitun mahöhoko, enahioko konginiua nidätomo.’ ”

¹⁴O Yosua wohigila-gila wätemo, ”Hoʼ öraha nënanga,” ”niwi horomati ma Jou. Ni ma giläongo unangika deʼ nia hininga ma debi-debini deʼ nia setia. Nia tingakika hagala o gikiri ma homoa ya höhuba-huba naiete deʼ niatohora kahuruono o Mesopotamia deʼ o Mesir mabereraka. Nimahigiläongo duga-duga ma Jouika.

¹⁵O demo ma ade ngini niöluku nimahigiläongo ma Jouika nia pütuhu o wange nënanga dika o nagonaika ngini nimau nimahigiläongo: hagala o gikiri mahomoaika yahöhuba-huba niaete deʼ niatohora o Mesopotamia matonakoka ekola o Amori manyawa manga gikirika dika manga berera ngini niö gögere örahanënanga. Mä ngomi — ngohi deʼ tongohi ahi tau manyawa — aha mimahigiläongo duga-duga kama Jouika.”

¹⁶Done o Israel manyawa gënanga yohäluhu, ”Ngomi hakali-hakali aha komiwi mal̄aua ma Jou la mimahigiläongo hagala o gikiri mahomoaika!

¹⁷Ma Jou tongone nanga Jou Madutu wahilolapahi tongone nangaete deʼ nangatohora deʼ ngone mahirete hokä o giläongo o Mesir ma tonakoka. Ngone hamäkeoka ihohëra-hëranga wadodiai ma Jou. Salalu ma Jou wonägöana ngone tongone nanga dodagi magoronaka mata-mata, hatilakuru o nyawa ma homoa manga berera.

¹⁸Deʼ maöraha ngone höngöhama o berera nënanga, ma Jou waduhu mata-mata o Amori manyawa yogögögere nenangokadau. Hoʼ, ngomi mimau mimahigiläongo ma Jouika, hababu Unanga to ngone nanga Jou Madutu!”

¹⁹Daha o Yosua wätemo, ”Mä ngini mudukua aha konia pöaua nimahigiläongo ma Jouika, hababu Unanga ma Jou Madutu wo tëbi-tëbini, Wo ma Tengo-tengoka. Unanga wöluku naga ai lawani yo holoi. Nako ngini ni wi mal̄a Unanga deʼ nimahigiläongo hagala o gikiri mahomoaika, Unanga aha kowa apungua niabaradoha. I idulu yaino, Unanga aha winilawani deʼ winïhükumu ngini. Unanga aha winïbinaha ngini, ngarokö mahira Unanga yaoa nginiika.”

²¹Done o Israel manyawa gënanga yohäluhu, ”Kowali! Ngomi aha ko mimahigiläongo hagala o gikiri mahomoaika. Ngomi aha mimahigiläongo duga-duga ka ma Jouika!”

²²Daha o Yosua wätemo, ”Aa, ngini mahirete mahakihi ngini ni ma putuhoka la nimahigiläongo duga-duga ma Jouika.” ”I tiai,” önanga yohäluhu, ”ngomi mahirete mahakihi.”

²³”Nako hokogënanga, niatingakika hagala o höana deʼ o berera mahomoa manga gikiri naga nginioka gënanga,” o Yosua wato, ”deʼ nijaji ngini aha nisetia ma Jouika, o Israeloka manga Jou Madutu.”

²⁴Daha hagala o nyawa gënanga iwïtemo o Yosuaika, ”Ngomi aha mimahigiläongo duga-duga kama Jouika, tongone nanga Jou Madutu. Ngomi aha mihingöunu hagala aipareta.”

²⁵Done o wangeoka gënanga o Sikhem mabereraka o Yosua wodiai o jaji deʼ o Israel manyawa; deʼ genangokadau ünanga wo hidöaka onangika hagala o tita deʼ o dätoro-o dätoro kokiani önanga ihingöunu.

²⁶Mata-mata o tita deʼ o dätoro-o dätoro gënanga watülihi ma Jou Madutu Ai Tita mabuku magoronaka. Deʼ ipaha ünanga wal̄ë o gähumu moi o helewo mapako-pako daha wohi gokoil̄e o gota ma ägo-ägomo matimiuku o ngï yatinga-tingakoka mangale ma Jou.

²⁷Gënanga deʼ iböto o Yosua wätemo o nyawa mata-mataika gënanga, ”O helewo nënanga idadi to ngone nanga hakihi. Mata-mata o demo-demo ma Jou wahö hëto-hëtongo ngoneino, wahetongoka o helewo nënanga mahimangoka. Hoʼ, o helewo nënanga aha idadi tingini niahakihi, la ini hihohininga ngini hupaya niwilawanua nia Jou Madutu.”

²⁸Wohibobaha o Yosua wä hüloko hagala o nyawa gënanga yolio; daha önanga mata-mata ima kilioro toönanga manga tonakika moi-moi.

²⁹Deʼ ipaha o Yosua o Nun aingohaka ma Jou Aigiläongo gënanga, wohönenge aiümuru o taongo o ratuhu moi deʼ ngimoioka.

³⁰ Unanga iwi jëre toünanga aitonakoka mahirete o Timnat-Serah mabereraka o Efraim aitönaka deʼ mal̄oku-l̄okuoka o Gaas mal̄oku o koremieuku.

³¹Madëkana o Yosua kawo wango-wangohi, o Israel manyawa imahigiläongo ma Jouika. Deʼ ünanga wohonengoka makaihirahi imahigiläongo ma Jouika, hokokia ma dëkana toönanga manga hidogoronaka kanagaohi o tutuda-tutuda yahö hakihioka mahirete hagala moi-moi wadodiai mangale o Israel manyawa.

³² O Yusuf ai mayeti o Israel manyawa o Mesir mabereraka deʼ yao-ao, yajëre o Sikhem mabereraka o tönaka o Yakub waija-ija oka maija o tiwi haaka o ratuhu moi o Hemor aingoha-ngohaka o Sikhem aiama. O tönaka gënanga o Yusuf ai difauku yahipuhaka.

³³Deʼ ipaha o Eleazar o Harun aingohakö wohönenge, deʼ iwijëre o Gibea maberera, enagënanga o kota magögere o Efraim aidaera oka matonaka deʼ mal̄oku-l̄okuoka. O kota gënanga iwi hidöakoka o Pinehasika, o Eleazar aingohaka.