Read Tobelo O YOSUA 3 Bible Online

O YOSUA 3 - Tobelo bible

O YOSUA 3

¹Yarehino mawange, o Yosua deʼ yongodumu o Israel manyawa duru o ngoru-ngorumino deʼ yomömiki, deʼ yamal̄a toönanga manga tau madoomu o Sitim mabereraka, deʼ yöiki o Yordan ma Ngairika. Genangoka önanga imatau ikali yödamä maöraha mangale yödöbongo.

²O wange hange ipahaika, hagala o tutüda yo gilöliti o tau madoomu yamöde-mödekika,

³deʼ ihidöaka o pareta nënanga o Israel manyawaika, ”Nako ngini niamäke o imam-imam yamoku ma Jou nia Jou Madutu aiJaji ma Peti, kokiani ngini ö nimagoraka niamal̄a o tau madoomu mangï nënanga. Nia moteke o Peti gënanga,

⁴mäuha nimä dagi itigikaholi deʼ o Peti gënanga; niatomoteke maporetino mahöana o kilo moi. Deʼ hoko gënanga ngini aha nihiöriki o ngëkomo kokiani ngini nia nonu, hababu ngini komaiwahi niöiki o daeraika gënanga.”

⁵O Yosua wötemo o Israel manyawaika, ”Kokiani ngini nia tebini niadiri, hababu yarehe ma Jou aha wodia ihöhëra-hëranga nia hidogoronaka.”

⁶Deʼ o Yosua wahipareta o imam-imam hupaya yagoraka o Jaji ma Peti gënanga deʼ ima goraka yö hohira o Israeloka. Onanga yadiai o Yosua aipareta.

⁷Ma Jou wïtemo o Yosuaika, ”Mulaenge o wange nënanga ngona aha Tonihidadi o nyawa yolago-agomo hiädono o Israel manyawa yongodumu inihoromati deʼ yanako Ngohi tonidatekuku ngona hokä ngohi Ti datekuku o Musa.

⁸O örahanënanga nahipareta o imam-imam yamömoku-moku o Jaji ma Peti gënanga hupaya önanga i ma hiadonika o ngairoka önanga yowöhama o ngairi ma akeruku gënanga deʼ i ma okoino ma datekoka.”

⁹Deʼ o Yosua wäahoko hagala o Israel manyawa, deʼ wätemo, ”Niaino niihene okia ma Jou nia Jou Madutu wohipareta nginika.

¹⁰Nako ika-ika nitagi niahimangika, ma Jou marai wäduhu o Kanaan, o Heti, o Hewi, o Feris, o Girgasi, o Amori, deʼ o Yebusi manyawa. Deʼ maöraha ma Jou wako kuaha o alam ai Jaji ma Peti ya töbongo o Yordan inïhihira ngini, ngini aha niamäke ma Jou Madutu wowango-wango naga tingini niahidogoronaka.

¹²O öraha nënanga kokiani ngini niäiriki yängimoi deʼ yahinoto. O Israeloka o höana yögetongo woma tëngo.

¹³Dahaö nako o imam-imam yamomoku-moku ma Jou Ai Jaji ma Peti manga l̄ou ihidoko o akeruku o Yordan ma Ngairoka gënanga, ma akere ma hahuru aha i töaka; o akere ihöhähahuru mautuoko aha itoomuino o ngïmoioka.”

¹⁴O öraha gënanga magogiriaka o gugutuku, deʼ hokä mabiaha o Yordan ma Ngairi maakere ihebulu. Maöraha o Israel manyawa yamal̄a toönanga manga tau ma doomu mangale ya töbongo o Yordan ma Ngairi, o imam-imam yo hira yotagi ikali yao o Jaji ma Peti. Deʼ maöraha o imam-imam gënanga ihidoko manga l̄ou o ngairuku,

¹⁶o örahagënanga dika o ngairi gënanga mahahuru itöaka. Dina magurutika o ngairi ma utuiha, ma akere imatoomu o Adam makotaka, moi o kota ma gögere o Sartan makota mahonongaka. O akere o ngairi ma bionoka ihöhähähuru o Honenge ma Ngötika duru itöakoka, hiädono o Israel manyawa yakunu yotöbongo o tönaka madüdüdungu mal̄oku ika i ma rihimanga deʼ o Yerikho makota. O imam-imam yamömoku-moku o Jaji ma Peti gënangaoka hirahi ima oko ino o ngairi mahidödogoronaoka hiädono yongodumu o Israel manyawa ima honongaika.