Read Tobelo O YOSUA 4 Bible Online

O YOSUA 4 - Tobelo bible

O YOSUA 4

¹Yongodumu o israel manyawa gënanga ima hiadonoka o ngairi mahonongaika deʼ ipaha, ma Jou wïtemo o Yosuaika,

²”Nä iriki ya ngimoi deʼ yahinoto, o höana moi wo ma tëngo.

³Nahipareta önanga mangale yal̄ë o helewo o gahumu ngimoi deʼ hinoto o Yordan ma Ngairi mahidödogoronaka, yako koronauku o imam-imam manga ngï imaoko-okoino. Nä hüloko önanga yamöku o helewo-helewo gënanga hiädono nima tau-tauika maöraha o hutu-hutu dahaö.”

⁴Done o Yosua wäahoko yängimoi deʼ yahinoto yäiri-irikoka gënanga,

⁵deʼ wätemo, ”Niöiki o Yordan ma Ngairi mahidö dogoronaika, ma Jou nia Jou Madutu Ai Jaji ma Peti mahimangika. Moi-moi kokiani niagöraka genangoka o helewo o gahumu moi — mangöe o helewo ngimoi deʼ hinoto ima tëro deʼ mangöe o höana o Israel manyawa mahidogoronaka.

⁶O helewo-helewo gënanga aha yahihohininga o Israel manyawa nënanga okianaga ma Jou wadodiaioka. O wange maduruino nako niangoha-ngohaka yolëha okia mamangarati nginika o helewo-helewo nënanga,

⁷ko kiani ngini ni hingahu onangika o Yordan ma Ngairi i töaka maöraha ma Jou Ai Jaji ma Peti yäo yatöbongo o ngairi gënanga. O Helewo-helewo gënanga aha salalu yahihohininga o Israel manyawa okianaga idödä dadi nenangokadau.”

⁸Yangimoi deʼ yahinoto gënanga yadiai o Yosua aipareta. I ma möteke deʼ ma Jou Aihidumutu o Yosuaika, önanga yal̄ë o helewo o gahumu ngimoi deʼ hinoto o Yordan ma Ngairi mahidödogoronaka — ma ngöe ima tëro deʼ ma ngöe o höana o Israel mahidogoronaka — deʼ yäo toönanga manga tau madoomu mangï ika.

⁹O Yordan ma Ngairi mahidödogoronaka ö gënanga, o Yosua wohikokaläpeuku o helewo ngimoi deʼ hinoto yakokoronauku o imam-imam manga ngïima oko-okoino yomö moku-moku o Jaji ma Peti gënanga. (O helewo-helewo gënanga ka enanagahi genangokadau hiädono o öraha nënanga).

¹⁰O imam-imam kahirahi i ma okoino o Yordan ma Ngairi mahidödogorona ka hiädono o nyawa geönanga yaböto yadiai hagala wohipopareta ma Jou onangika itilakuru o Yosua. Gënanga imamöteke deʼ o hidumutu-hidumutu o Musaino o Yosuaika. Deʼ majapati o Israel manyawa yatöbongo o Yordan ma Ngairi.

¹¹Mata-mata i ma hiadonoka o ngairi ma honongaika deʼ ipaha, o imam-imam yamömoku-moku o Jaji ma Peti gënanga yotagi toönanga manga himangoka.

¹²Ima möteke deʼ o Musa wohipopareta, yopoparangi o Ruben aihoanino, o Gad deʼ o Manasye aihöana mahononga, yohiraka yatöbongo o ngairi.

¹³Mata-mata yaribuhu moruata o nau-nauru deʼ manga däe deʼ imahidödamä mangale yoparangi. Ma Jou Aihimangoka, önanga yo töbongo yo dumutu o tönaka i rata-rata o Yerikho ma datekoka.

¹⁴O wange gënanga ma Jou wodiai o hali-o hali yadiai o Israel manyawa i wi horomati o Yosua hokä o nyawa yolago-agomo. Manga umuru magurutu önanga iwihoromati ünanga hokä önanga iwihoromati o Musa.

¹⁵Deʼ ipaha ma Jou wïhüloko o Yosua

¹⁶wahipareta o imam-imam yamö moku-moku o Jaji ma Peti gënanga yohupu o Yordan ma Ngairino.

¹⁷O Yosua wadiai okianaga ma Jou wihi pareta unangika.

¹⁸Hoko gënanga o imam-imam gënanga imahiädono o ngairi madatekika, o ngairi gënanga ma akere i mulaenge ihähuru deʼ i hebulu hokä mahiraoli.

¹⁹O Israel manyawa imahiädono o Yordan mahonongaika deʼ mawange ngimoi o mede madodihiraka, deʼ önanga imä tau o Gilgal mabereraka o Yerikho o wange mahiwaroko idaduoka.

²⁰Genangokadau o Yosua wohikokalapeuku o helewo ngimoi deʼ hinoto yal̄öl̄e-l̄e o Yordan ma Ngairoka.

²¹Deʼ o Yosua wätemo o Israel manyawaika, ”O wange maduruino nako niangoha-ngohaka yolëha mangale mamangarati o helewo-helewo nënanga,

²²nia hingahu onangika o Israel manyawa yatöbongo o Yordan ma Ngairi nënanga o tönaka madüdüdungu mal̄okuino.

²³Nia hijarita onangika ma Jou nia Jou Madutu wadüdungu o Yordan ma Ngairi maakere gënanga mangale ngini hiädono ngini mata-mata ni mahiädono o ngairi ma hononga ika, ima tëro hokä ünanga wa düdungu o Gelagah ma Ngöto mangale ngomi,

²⁴hupaya mata-mata o nyawa o duniaka ihi öriki hokokia ma ämoko ma Jou Ai kuaha. Deʼ de hokogënanga ngini aha niwihoromati ma Jou nia Jou Madutu kahi ädo-ädonika.”