Read Tobelo O YOSUA 5 Bible Online

O YOSUA 5 - Tobelo bible

O YOSUA 5

¹O Amori manga koano mata-mata o Yordan ma Ngairi o wange ma dumuniha, deʼ mata-mata o Kanaan ma koano o Ngöto i Kokorona o gahil̄e yoihene o Yordan ma Ngairi ma Jou wa dudungoka madëkana o Israel manyawa yatöbongo o ngairi gënanga. Done önanga idadi yohawana deʼ yohahara karana o Israel manyawa.

²O öraha gënanga ma Jou wïtemo o Yosuaika, ”No diai o gakana o helewo, deʼ na diai oli o huna ma upacara mangale hagala o Israel manyawa.”

³Done o Yosua wadiai ma Jou Ai pareta, deʼ wä huna o Israel manyawa mangï ihi rö röma-römanga o Huna ma Doporono.

⁴ Maöraha hagala o Israel manyawa o Mesir ma tonakoka deʼ yo hupu, mata-mata o nau-nauru yahunaoka. Mä maöraha yodagi yakaika yakaino o tönaka ikö kakaha oka o taongo moruata madëkana, toönanga manga ngoha-ngohaka o nau-nauru kao nyawa moiö de koiwahi i ma huna. Deʼ o taongo moruata mabobahaka gënanga, o nau-nauru maöraha o Mesir matonakoka deʼ yohupu yadonoka manga umuru i patutu iwohama yotentara, mata-mata yohonengoka, karana yamotekua ma Jou Aipareta. Done imadäene deʼ ma Jou Aiköbotoönanga yahigumal̄aua yamäke o berera iboburere deʼ mahasili ilamo-amoko gënanga yahijäjajioka toönanga mangaete deʼ mangatohoraika.

⁷Mahababu gënanga mata-mata toönanga manga ngohaka o nauru koya hunaowahi. O gö maduru nënanga o Yosua wähuna.

⁸Mata-mata önanga yähuna deʼ ibötoönanga yögögere o tau-tau madoomuoka hiädono toönanga manga nabo i togumu.

⁹Ma Jou wïtemo o Yosuaika, ”O wange nënanga ngini nihikokauku hokä o gogilaongo o Mesir matonakoka Tahohihangoka.” Mahababu gënanga o ngï gënanga ihirömanga o Gilgal hiädono o öraha nënanga.

¹⁰ Magogiria imä tau o Gilgal madaeraoka o tönaka irata-rata o Yerikho madatekoka, o Israel manyawa ihi rame o Paskah o bimaoauku mawange ngimoi de iata o mede gënanga.

¹¹Yarehino, mangale madodihiraka önanga yaol̄omo o inomo o Kanaan maberera mahasiliö roti maragi koiwa-iwa deʼ o gandum il̄ofo-lofo.

¹² O wange genangö o manna itifaokaua o dihanguku, deʼ o Israel manyawa imatogumu yaol̄omo o manna. I mulaenge o öraha gënanga önanga yaol̄omo o Kanaan matonaka mahasili.

¹³O öraha moiuku o Yosua naga woma hi tigi-tigika o Yerikhoika. I todokanino ünanga wïmäke o nauru womatëngo womaoko ino aihimangoka deʼ aioworo warahukil̄e. O Yosua womahi tigi o nyawaika gënanga, deʼ wïleha, ”Ngona nënanga mia dodiawo, ekola mialawani?”

¹⁴”Konia dodiawoua, deʼ konialawanua,” wo haluhu o nyawa gënanga, ”Ngohi taino nenangino hokä ma Jou Aitentara manga kapita.” Woihene gënanga o Yosua deʼ majapatioka womahi tudukuku wïhuba o nyawa gënanga. ”Okia yakunu ngohi tadiai mangale ngona Tuanga?”

¹⁵Ma Jou Aitentara manga kapita gënanga wohaluhu, ”Nahuputu anihapoto; o tönaka mangï ngona noma okoino gënanga o tönaka itebi-tebini.” Done o Yosua wahuputu aihapato.