Read Tobelo O YOSUA 6 Bible Online

O YOSUA 6 - Tobelo bible

O YOSUA 6

¹O Yerikho makota mangorana ilö lägo-ägomo yögöanoka ihi dodiai deʼ yabeno yakëkëkete hupaya o Israel manyawa yakunua yowöhama. Ka o nyawa moiö deʼ yahigumal̄aua yohupu yowöhama o kota gënanga.

²Ma Jou wïtemo o Yosuaika, ”O öraha nënanga Ngohi tohidöaka ngonaika o Yerikho makota deʼ ma koano deʼ mata-mata aitentara yonau-nauru gënanga.

³Ngona deʼ anitentara kokiani yotüono yakilöliti o kota gënanga o wange moi nihigali mamoi o wange butangaino madëkana.

⁴Yatumidi o imam, moi-moi yoao o trompet, kokiani imä dagi o Jaji ma Peti mahimangoka. O wange matumidoka, ngona deʼ anitentara kokiani yakilöliti o kota gënanga nihigali matumidi magogiriaka o imam-imam yawuwu manga trompet.

⁵De ipaha o imam-imam gënanga kokiani yawuwu manga trompet deʼ mailingi yogira-girangika. Hokogënanga ngini ni ihene mailingi magira-girangika gënanga, mata-mata o tentara kokiani youlili yakua-kuatil̄e, done o kota mabebeno o mehele gënanga aha i ruba. Daha ngini mata-mata ko kiani gila-gila niö ngöhama o kota gënanga.”

⁶Done o Yosua wä ähoko o imam-imam gënanga deʼ wätemo, ”Nia göraka o Jaji ma Peti gënanga; yätumidi tingini mahidogoronaka kokiani yotagi mahimangoka ikali yoao o trompet.”

⁷Deʼ o Yosua wähüloko aitentara yotüono yakilöliti o kota gënanga, o gogöana maduduono mahima-himangoka yohihira, yotagi ma Jou Ai Jaji ma Peti mahimangoka.

⁸Imamöteke deʼ o Yosua aipareta, o gogöana maduduono mahima-himangoka imagöraka yahidoduruino o imam-imam o trompet yowuwuwu, yänïkino o imam-imam yamö moku-moku o Jaji ma Peti deʼ ipaha ihi bobaha o gogöana maduduono mapore-poretoka. Magogiriaka önanga yotagi, o trompet kahoko genangika yawuwu.

¹⁰Mata-mata o tentara yahiparetaka mangale yakunua youlili deʼ o demo kao döaka moiö deʼ koyotemoua nako o Yosua wahipareta owahi.

¹¹Hoko gënanga o Yosua wä hüloko aitentara yäo o Jaji ma Peti yakilöliti o kota gënanga ihi gali mamoi, deʼ ipaha ima idulu o tau-tau madoomuino, deʼ ima hiduhutu genangokadau.

¹²Yarehino duru o ngoru-ngorumino, o Yosua womömiki deʼ ihigali mahinotoka o imam-imam deʼ o tentara yotüono yakilöliti o kota gënanga deʼ manga duduono madatoro hokä, o wange i paha-paha: madodihiraka o gogöana maduduono mahima-himangoka, deʼ ipaha yatumidi o imam-imam o trompet yowüwuwu, deʼ yänïkika o imam-imam yamö moku-moku o Jaji ma Peti, deʼ mabobaha o gogöana maduduono mapore-poretoka. Ma gogiriaka gënanga o trompet kahoko genangika yawuwu.

¹⁴O wange mahinotoka gënanga yakilöliti o kota ihi gali mamoi deʼ ipaha ima idulu o tau-tau madoomu ino. Hoko gënanga önanga yadiai o wange i hi gëtongo o wange butanga ino madëkana.

¹⁵O wange matumidoka önanga yomömiki o ngoru-ngorumino maöraha o wange malako daha keipotokail̄e, deʼ yotüono ihi gali matumidi yakilöliti o Yerikho makota gënanga deʼ madodagi kaima tero. Duga-duga o wange matumidoka dika, önanga yakilöliti o kota gënanga i hi gali matumidi.

¹⁶Ihi gali matumidoka, hokogënanga o imam-imam yawuwu manga trompet, o Yosua wo hidöaka o pareta o duduono mata-mataika mangale youlili. O Yosua wätemo, ”Ma Jou wohidöakoka o kota nënanga nginika!

¹⁷I ngodumu o kota deʼ hagala madol̄a kokiani nia wedere kamamoi uku hokä o huhuba mangale ma Jou. Duga-duga o ngo Rahab, o ngoheka amiröehe mahuku-hukunu gënanga deʼ ami röriadödoto dika yakunu niamal̄aika yowango, karana münanga mä riwoka o berera yotötailako.

¹⁸Yakunua nial̄ë okianaga moi ö mata-mata kokiani niwedere. Nako ngini nial̄ë, o Israel matau madoomu aha yatapal̄u o bodito deʼ o huha.

¹⁹Mata-mata o baranga o haaka, o gurasi, o tabaga, deʼ o behi kokiani itingaka mangale ma Jou, deʼ i gögono to ma Jou Aiarata magogögono mangï magoronaka.”

²⁰ Deʼ o imam-imam yawuwu manga trompet. Deʼ hokogënanga o Israel manyawa yo ihene o trompet ma ilingi gënanga, önanga youlili yakua-luatil̄e, deʼ o Yerikho makota mabebeno o mehele i ruba. Yongodumu o Israel manga tentara gila-gila yadoa, deʼ yö ngöhama o kota gënanga daha yaora.

²¹Mata-mata o kota gënanga magoronaka, o gikiri magö deʼ o dimono, o nauru deʼ o ngoheka, yätoma deʼ o oworo. Hagala ipöpaliara o hapi, o duba deʼ o keledai ma yatoma.

²²Yähinoto yodadioka o berera yotötailako, o Yosua wätemo onangika, ”Niöiki o ngoheka amiröehe mahuku-hukunu amitauika gënanga, deʼ nimiao münanga nimihihupu kamamoi deʼ amiröriadödoto hokä ngini nijäjajioka munangika.”

²³Done o berera yotötailako yahinoto gënanga yöiki, deʼ imiao imihihupu o ngo Rahab kamamoi deʼ amiama deʼ ngomiayo, amiröriadödoto ma homoahi. Yongodumu o ngo Rahab amiröria dödoto gënanga deʼ ami gogilaongo yaao yahihupu o ngï irö rïdika imahi tigi-tigika deʼ o Israeloka manga tau madoomu.

²⁴Deʼ ipaha o Israeloka manga tentara yatühuku yamata-mataka o kota gënanga mata-mataika deʼ hagala moi-moi naga magoronaka, sowaliua o bara-baranga o gurasi, o haaka, o tabaga deʼ o behi. O bara-baranga gënanga önanga yal̄ë deʼ yäo toma Jou Aiarata magogögono mangïika.

²⁵ Mä o ngo Rahab o ngoheka ami röehe mahuku-hukunu gënanga deʼ yongodumu amiröriadödoto o Yosua wämal̄a önanga yo wango, karana münanga märiwoka yahinoto o berera yotötailako o Yosua wähülo-hüloko o Yerikhoika. (Hiädono o wange nënanga o ngo Rahab ami difauku kanagahi o Israel mabereraka.)

²⁶ O öraha gënanga o Yosua wohihupu o hiduhunu nënanga, ”O nagona dika yousaha i higokoli o Yerikho makota nënanga, aha yakorona ma Jou Ailolai. O nagona yögelenga mapondasi aha ihihanga manga ngohaka o riaka; deʼ o nagona i hidiai mangorana ilolägo-ägomo aha i hihanga manga ngohaka madodoto.”

²⁷Ma Jou wïtomoteke o Yosua, deʼ o Yosua airomanga kaya hëto-hëtongo o berera gënanga yamöde-mödekika.