Read Tobelo O YOSUA 7 Bible Online

O YOSUA 7 - Tobelo bible

O YOSUA 7

¹Ma Jou wohiparetaka o Israel manyawaika hagala moi-moi Yerikho makotaka kokiani yabinaha, kamoiö ma yakunua yal̄ë. Mä o pareta gënanga ihi ngounua. O nauru womatëngo airomanga o Akhan watilakuru o pareta gënanga, hiädono ma Jou duru wängamo o Israel manyawaika. (O Akhan aiama airomanga o Karmi deʼ ai ete ai romanga o Zabdi, o Zerah aiahaluku o Yehuda aihöana magoronaka.)

²O öraha gënanga o Yosua wähüloko yämuruono naga o Yerikho deʼ yaino yöiki o Ai ika, enagënanga moi o kota o Betel mawange mahiwaröko, imahitigi-tigika o Bet-Awenika. O nyawa geönanga yähüloko mangale yöiki yatailäko o daera gënanga. Onanga yadiaioka o manarama gënanga deʼ iböto,

³önanga i ma idulu deʼ ihingahu o Yosuaika. Onanga yato, ”I paraluua ngone mata-mata höiki haparangi o Ai. Hahidïngoto dika donehö yäribuhu hinoto ekola yäribuhu hange. Uha hahidïngoto mata-mata o tentara dokengika mangale yoparangi, karana o kota gënanga kamaitëteke dika.”

⁴Hoʼ yöi-öiki yaparangi o kota gënanga duga-duga ya ribuhu hange, ma önanga yahidodöhuku.

⁵O Ai manyawa yäginïki önanga o Ai makota mangorana maägo-ägomo hiädono yohai-haiti o haaka deʼ o gurasiika, daha yätoma doneho yamoruange deʼ yä butanga toönanga manga hidogoronaka o doporono ingunu-ngunungoka. Done o Israel manyawa manga hininga ihuha deʼ yohawana.

⁶O Yosua deʼ o Israel manyawa manga tutuda-tutuda duru manga hininga i huha hiädono önanga yakakihi toönanga manga pakeanga, deʼ o wange magurutu hiädono yöhutu önanga imahitudukuku ma Jou Ai Jaji ma Peti mahimangoka deʼ yögelenga o kafo toönanga manga mumukuku hokä manonako manga hininga i huha.

⁷O Yosua wïtemo ma Jouika, ”O Jou Madutu ahi Jou Madutu! Mangale okia Ngona nomïao ngomi hiädono o Yordan ma hönongaino nënanga? Boteka mangale ngomi nahidöaka o Amori manyawaika? Hupaya ngomi mihonenge? Iholoi yaoa ngomi migögögere dokengoka dika, o Yordan mangairi mahonongaka!

⁸O Jou! O haturu yahi dodohukoka o Israel manyawa. O öraha nënanga okia kokiani ngohi totëmo?

⁹O Kanaan manyawa deʼ mata-mata o nyawa mahomoa o daeraka nënanga aha yoihene mangale o hali gënanga. Onanga aha imi higilolitöka deʼ imï toma ngomi. Daha okia aha Ngona nodiai mangale naso sö Ani horomati?”

¹⁰Ma Jou wïbaluhu o Yosua, ”Nomömiki! Koiwa mafaidä ngona nomahitudukuku hokogënanga o tonakoka!

¹¹O Israel manyawa yodiaioka o baradoha. Ngohi tahiparetaka hupaya önanga i hingounu o jaji ngohi dede önanga manga hidogoronaka, mä önanga yatilakuru! O bara-baranga kokiani yabinaha önanga yal̄ë oka. Onanga yatohiki deʼ yagögono toönanga manga bara-baranga mahidogoronaka hupaya ihiorikua.

¹²Ma hababu gënanga önanga yakunua yähïmanga manga haturü. Onanga manga haturü yahidodohuku karana önanga mahirete mayätapal̄uoka o hukumanga mangale yobinaha. Ngohi aha tinïtomotekokaua ngini, nako o bara-baranga maböhono nia l̄ë gënanga koniabinahaoawahi.

¹³O örahanënanga nomömiki Yosua! Nä tebini o Israel ma nyawa deʼ nä hüloko önanga i ma hidiai mangale hï hïmanga Ngohi. Na hi pareta önanga yarehe i ma hidiai, hababu ngohi ma Jou o Israeloka manga Jou Madutu aha ta hëtongo nënanga onangika: ’Hei Israel manyawa! O bara-baranga To hi po paretaka nginika mangale nia binaha, o hidoku moi naga ngini oka. Ngini ko nia umowahi o bara-baranga gënanga, ngini aha ko niakunua nia läwani nia haturü!ʼ

¹⁴Hababu gënanga, Yosua, nahingahu onangika yarehe o ngorumino önanga aha yätailako mangatagali o höana magoronaka gënanga kokiani yotagi manga himangika o ahaluku tagali o ahaluku. Deʼ nako Ngohi tatümutu moi o ahali, mata-mata o tau moi-o tau moi madol̄a kokiani yotagi manga himangiha madol̄a o tau moi tagali o tau moi. Deʼ ipaha nako Ngohi tatumutu madol̄a o tau moi, o nyawa moi-nyawa moi madol̄a o tau moi magoronaka gënanga kokiani yotagi manga himangiha ima tëngo-tëngo.

¹⁵Daha o nyawa iwito tumu-tumutu deʼ inyata wagögono o bara-baranga yodödühu-dühunu gënanga kokiani yatühuku yamata-mataka kamamoi deʼ aitau manyawa deʼ hagala moi-moi toünanga; karana ünanga watotilakuru o jaji deʼ wodiai o dorou ma lägo-ägomo o Israel manyawa manga hidogoronaka.”

¹⁶Yarehino, duru o ngoru-ngorumino, o Yosua wähüloko o Israel manyawa yotagi mahimangiha, o höana imatagali o höana, deʼ o Yehuda aihöana yakorona.

¹⁷Deʼ o Yosua wähüloko o Yehuda aihöana yotagi mahimangiha, o ahali i ma hi tagali o ahali, deʼ o Zerah ai ahali yakorona. Deʼ ipaha o Zerah ai ahali yotagi manga himangiha, deʼ o Zabdi ai tau manyawa yakorona.

¹⁸Gënanga deʼ iböto o Zabdi aitau madol̄a yotagi manga himangiha, i ma tëngo-tëngo; done o Akhan, o Karmi aingohaka, o Zabdi aidanongo iwi korona.

¹⁹O Yosua wïtemo o Akhanika, ”Ahingohaka, nomangaku, deʼ nahëtongo nohitotiaika nenangokadau ma Jou Aihimangoka, o Israeloka manga Jou Madutu, okia ngona nadodiaioka. Nohingahu ngohino uha nagögono.”

²⁰”Itiai,” o Akhan wato, ”Ngohi tadiaioka o baradoha ma Jouika, o Israeloka manga Jou Madutu. Nënangadoka ngohi tadodiai:

²¹O bara-baranga ngone ha öra-öra mahidogoronaka, ngohi ta mäke o juba duru mahöhailoa o dobiki moi, o Babilonia manyawa yadodiai, o haaka ö donehö o kilo hinoto, deʼ o gurasi o dobiki moi o kilo mahönonga iholoi. Ngohi duru tönahihü o bara-baranga gënanga, done ngohi tal̄ë deʼ tagögono o tönaka magoronaka tongohi ahi tauoka, mahaaka duru dau itimi-timiuku.”

²²Daha o Yosua itäi-täiti wahidingoto o nyawa o Akhan aitauika. I nyata o bara-baranga yahi dühu-dühunu gënanga mata-mata naga genangokadau, wagogonika o tönaka magoronaka, deʼ mahaaka duru dau itimi-timiuku.

²³Onanga yal̄ë o bara-baranga gënanga deʼ yäo o Yosuaika deʼ mata-mata o Israel manyawa. Daha o bara-baranga gënanga yakelengauku ma Jou Ai himangoka.

²⁴Deʼ ipaha o Yosua deʼ yongodumu o Israel manyawa iwi tägoko o Akhan, deʼ ünanga iwi ao o Huha ma Waika kamamoi deʼ aingohaka mata-mata, aihapi ipöpaliara, o keledai, o duba, aitau deʼ hagala moi-moi touna deʼ aihaaka, o juba deʼ o gurasi watohi-tohiki.

²⁵Daha o Yosua wïtemo o Akhanika, ”Yadodoa hongona nonädotagao o huha ngoneino? O öraha nënanga ma Jou aha wonïdotagao o huha ngonaika!” Done o Akhan kamamoi deʼ aitau manyawa o Israel manyawa mata-mata yäkaweli deʼ o helewo hiädono yohönenge. Mata-mata toünanga aiarata, deʼ aibara-baranga o dohikino ya tühuku ya mata-mata.

²⁶Gënanga deʼ ibötoönanga yödoporono o ngï gënanga deʼ o helewo duru kahängöe hiädono o wange nënanga kanagahi gangoka. Ma hababu gënanga o ngï gënanga kaihi romangohi o Huha ma Wai. Done ma Jou Ai döhata i ögoro.