Read Tobelo O TESALONIKA MAHINOTOKA 1 Bible Online

O TESALONIKA MAHINOTOKA 1 - Tobelo bible

O TESALONIKA MAHINOTOKA 1

¹ Roriadodoto jemaat o Tesalonika mabereraka, nidädadi ma Jou Madutu ai umati tongone nanga Ama deʼ nanga Jou Yesus Kristus! Ngomi, enagënanga o Paulus, o Silas de o Timotius,

²minganono tanu ma Jou Madutu nanga Ama deʼ nanga Jou Yesus Kristus winihidöaka o barakati deʼ o lolä nginika.

³Roriadodoto, ngomi salalu kokiani mitemo tarima kasi ma Jou Madutuika karana ngini. Deʼ itiai mapatutu ngomi midiai hoko gënanga, hababu ngini kai dogo-dogo niwingaku o Kristusika, deʼ ngini kai dogo-dogo nimä kodora moi de moi.

⁴Mahababu gënanga yadodoa ho ngomi mitemo-temo mangale ngini mihi gëto-gëtongo ngomi miä ädono ma Jou Madutu ai jemaat-jemaat. De mia hininga iamoko ngomi mihi ade-ade sarakia ngini itatapu ibitumu nia ngongaku o Kristusika o aniaya magoronaka deʼ o huha de o hangihara ngini nia oha-ohana.

⁵Deʼ nenangokadau i nyata hokokia ma Jou Madutu ai adili hokä o hakimi: Ngini nia tagongoka o huha de o hangihara karana ma Jou Madutu ai Dunia ma Hungi, deʼ karana gënanga ngini aha inï etongo nipatutu niwohama o Dunia ma Hungika.

⁶Unanga aha wodiai okia iadi-adili, deʼ aha wabalahi de o huha de o hangihara o nyawaika yodö dodiai ngini nia tagongo o huha de o hangihara.

⁷Deʼ nginika o öraha nënanga nia tago-tagongo o huha de o hangihara — hoko genangoli ngomino — ma Jou Madutu aha wonahidöaka o hininga masanangi ma Jou Yesus ai wangeoka wouti o horogaka de wauku deʼ womahimatoko Ai diri de to Una Ai mömalaekat yonö nau-nauru

⁸deʼ o uku i toka-tokara. Unanga wouti la wähukumu hagala o nyawa iwi hohaduliua ma Jou Madutu deʼ yo olu-oluku yowango hokä imoteke de o Abari ma Oa mangale o Yesus tongone nanga Jou.

⁹ Hagala o nyawa gënanga aha yatarima o hukumanga o bobinaha kahi ado-adonika, yäumo yohupu de ma Jou ai bobareta deʼ Ai kuaha i kokurutil̄e;

¹⁰mata-mata gënanga aha idadi ma wange Unanga ai böa oka la Ai umati iwi himulia deʼ mangale iwi horomati hagala o nyawa iwi ngaku-ngaku. Nginiö ma aha naga ma Jou Madutu ai umati manga hi dogoronaka gënanga, hababu ngini ningakuoka o abari minihi ngahu-ngahuoka nginika.

¹¹Mahababu gënanga ngomi salalu minihi hubayanga ngini. Ngomi mimä niata hupaya ma Jou Madutu winihidadi ngini ipatutu mangale niwango imoteke Ai mau; mangale gënanga doka Unanga winï ahoko ngini. Tanu ma Jou Madutu de Ai kuaha, wohi ömanga nia ngigo mangale o oa nidiai, deʼ wohitotomo o manarama mata-mata ngini nia dodiai karana niwingaku o Kristusika.

¹²De hoko gënanga ngini niwihi mulia nanga Jou Yesus, deʼ ngini mä o Yesus winihi mulia karana ma Jou Madutu deʼ ma Jou Yesus Kristus manga hininga maoa.