Read Tobelo O TESALONIKA MAHINOTOKA 2 Bible Online

O TESALONIKA MAHINOTOKA 2 - Tobelo bible

O TESALONIKA MAHINOTOKA 2

¹ Mangale nanga Jou Yesus Kristus ai böa, deʼ mangale aha ngone inä toomu kamamoi dede Unanga, nënanga doka ngohi togahoko de magiria nginino:

²Uhali itai-taiti ningaku ekola nia hininga ihuha karana naga o abari, bari yadonoka ma wange ma Jou Yesus woböaokali. Mudukua o abari nënanga ma ahali moi o nubuatino, ekola moi o dodotokino; ekola yakunoli idadi naga yotemo bari ngomi mamoi iböto mitulihi mia hurata moiani magoronaka.

³Ngaro sarakiali mauha nima higumal̄a ngini o nyawa inï tipu. Hababu ihira de o Wange gënanga iböa, kokiani o hali nënanga ihira idadi: O nyawa manga ngöe aha yosetia okaua o agamaika, iwihi pongono o Kristus; deʼ o Nyawa ma Dorou mahirahi de hitantuoka la wowohama o narakaika, aha ai diri wohimatoko.

⁴ De woma hil̄e ünanga aha wolawani deʼ ai diri wohikurutil̄e ma l̄okuoka hagala mata-mata o nyawa yähuba-huba, ekola mata-mata o gikiri o nyawa yadodiai manga Jou Madutu. De igoungu ünanga aha wo gogeruku ma Jou Madutu ai Tau magoronaka deʼ wohingahu wohi kawahaoko una ganga ma Jou Madutu.

⁵Nio hohininga mamoi iböto ngohi tinihi ngahuoka mata-mata gënanga maöraha ngohi naga dede nginiohi.

⁶Deʼ ngini nihi öriki okia öraha nanga kaya tätatokohi la mata-mata gënanga idadi. Damä maöraha ma Jou Madutu wohi totantuoka, o Nyawa ma Dorou gënanga aha wohupu womahimatoko.

⁷O kuata imomanarama o dorou gënanga imulaengoka imanarama kaya rörahasia, mä kaya tumu-tumungohi. Damä näko yatumu-tumungu ihi rehenoka,

⁸ dahaö o Nyawa ma Dorou gënanga iwi mäke. Ho maöraha ma Jou Yesus woböa, de to Una ai womaha Ai uruiha, Unanga aha wa toma o Nyawa ma Dorou gënanga deʼ wabinaha de to Una ai böa maleletongo.

⁹ O Nyawa ma Dorou gënanga aha wohupu womahimatoko de o kuaha malamo-amoko moi o Ibilihino. Unanga aha wodiai hagala rupa ihëra-hëranga deʼ o hali-o hali ibobiahaua iömanga de o tipu.

¹⁰Unanga aha wapäke hagala rupa o tipu mausaha itotorou la hagala o nyawa aha yobobinaha yorehene o ngëkomo itotorouika. Onanga aha yobinaha hababu yatila de yoigoua o abari madiai ma Jou Madutuino yakunu yahihalamati önanga.

¹¹Mahababu gënanga ma Jou Madutu wadotagao onangika moi o kuaha la yorehene o ngëkomo itotorouika, hi ädono önanga yangaku okianaga madiaiua.

¹²Mabaha o nyawa mata-mata yoigo o baradoha deʼ yongakua o diai ika gënanga, aha yähukumu.

¹³Roriadodoto ma Jou winï dora-dora! Kokiani ngomi salalu mitemo tarima kasi ma Jou Madutuika mangale ngini, hababu kadema hirahi ma Jou Madutu winï irikoka ngini la ini hihalamati. O hali gënanga idadi de okia yamomanarama ma Jou Madutu ai Womaha nginika la winihidadi ngini ma Jou Madutu ai umati itebi-tebini deʼ ma karana ngini ningaku o abari madiaika ma Jou Madutuino.

¹⁴Mangale gënanga doka ma Jou Madutu winï ahoko ngini de madodagi o Abari ma Oa ngomi mihi ngahu-ngahu nginika. Ma Jou Madutu winï ahoko ngini, karana Unanga womau hupaya dede ngini nia mäo nanga Jou Yesus Kristus ai mulia.

¹⁵De mahababu gënanga Roriadodoto, nima oko nimatotiail̄e deʼ nimahi jojö gila-gila o dodötoko-dodötokika ngomi minihi döa-döakoka nginika, kayaoa mio uruika kayaoa de mia dulihi.

¹⁶Tanu nanga Jou Yesus Kristus mahirete, deʼ ma Jou Madutu tongone nanga Ama winï laru deʼ wohi kuata nia hininga, hupaya ngini yakunu nia manarama deʼ nihi ngahu okianaga maoa-oa. Hababu ma Jou Madutu wonä dora ngone, deʼ karana Ai hininga maoa Unanga wadiai ngone i tatapu nanga hininga ikuata, inoli hönganono maoa-oa.