Read Tobelo O TIMOTIUS MADODIHIRAKA 1 Bible Online

O TIMOTIUS MADODIHIRAKA 1 - Tobelo bible

O TIMOTIUS MADODIHIRAKA 1

¹ Timotius, ahingohaka madutu mangale ma Jou! O hurata nënanga ngohioka de yaika, o Paulus, o Kristus Yesus ai rasul imoteke ma Jou Madutu ai pareta, Wonahi hohalamati ngone, deʼ imoteke o Kristus Yesus ai pareta, tongone nanga ngonganono. Tanu ma Jou Madutu o Ama deʼ o Kristus Yesus tongone nanga Jou wonihi döaka o barakati, Ai hayanga de Ai dora deʼ o lolä ngonaika.

³Ngohi toigo hupaya ngona nogogere norïdi o Efesusoka, hokä ngohi tonihi ributuoka ngonaika maöraha ngohi toiki o Makedoniaika. Hababu, o Efesusoka naga o nyawa yamuruono naga ihi gerewoto o dodötoko itotiaiua, deʼ ngona kiani nahibareti önanga.

⁴Natemo onangika laʼ ibötohi ihi gihenika o demo ito totiaiua deʼ o ade-ade kai hira-hira ikahi koi toa-toakua. Mata-mata gënanga, duga-duga ihipuda o ributu dika, deʼ koi tagiua ma Jou Madutu ai datoro duga-duga hakunu hanako de madodagi o ngongaku Unangika.

⁵Tongohi ahi hitiari gënanga madungutu ganga, hupaya o nyawa yakunu yapäke o hininga idododono deʼ manga hininga magoronaka madebi-debini, de igou-goungu iwi ngaku ma Jouika, deʼ de hokogënanga önanga yakunu yahininga manga dodiawo o nyawa.

⁶Naga o nyawa o hidoku moi yowango okaua hokä hoko genangoli, deʼ yorehene o ributu-ributu magoronaka mabaraguna koiwa-iwa.

⁷Onanga yomau yodadi o agama maguru-guru, ena hioko önanga mahirete imangaratiua o demo yapö päke-päke önanga, ekola o hali-hali ihihimanga önanga de hoko gënanga ihi goungu.

⁸Ngone hohiöriki o agama matita ganga yaoa, nako hokä sarakia yapäke demadiai.

⁹Maraioka kiani nohininga o tita idiai o nyawa maoaikaua, mä o nyawa o tita yatotilakurika, yododiai o dorou, o nyawa yororuae, o nyawa baradohaika, o nyawa yo o agamaua, o dunia manyawa, o nyawa yätoma-toma manga ayo de manga amaika, yototoma-toma mata-mataika,

¹⁰o nyawa manga wowango isösafaruneika, yodiai o howono imahi kokanauru, yotohi-tohiki o nyawa, yo elu-eluku; o hakihi ielu-eluku, deʼ o nagona dika yodiai o hali-o hali ima däenua de o dodötoko madiai.

¹¹O dodötoko gënanga hamäke o Abari ma Oa magoronaka de ihi ngakuoka ngohino laʼ tohibarihi, enagënanga o Abari ma Oa ma Jou Madutuino womomulia deʼ kiani hihigiriri.

¹²Ngohi totemo tarima kasi o Kristus Yesusika tongone nanga Jou. Unanga wohihi döakoka o kuata ngohino mangale tileleani Unanga, deʼ Unanga wohipulono ngohi topatutu mangale o manarama gënanga,

¹³ ngaro mahira ngohi tidiai o romanga madorou, deʼ tianiaya, de tïhikauku Unanga. Mä ma Jou Madutu wohihininga ngohi, karana öraha gënanga ngohi tongaku uahi, hoʼ ngohi tohiörikua okia ngohi tadiai.

¹⁴Deʼ ngohi kai holoi Ai hininga mahayanga de madora tongone nanga Jou. Unanga wohihi döaka o kuata ngohino mangale tingaku Unangika deʼ tahininga ahi dodiawo o nyawa. O kuata gënanga wonahi döakoka ngoneino mata-mata, horimoioka de o Kristus Yesus.

¹⁵Igoungu itiai o demo nënanga — hababu gënanga ipatutu nia tarima deʼ nia ngaku i tototomo — : ”O Kristus Yesus woböa o duniaka nënanga mangale wahi halamati o nyawa yobobaradoha.” Deʼ ngohila o baradoha manyawa duru itötotorou.

¹⁶Mä mangale hababu gënanga ma Jou Madutu wohihininga ngohi, laʼ o Kristus Yesus yakunu wohi dumutu Ai sabari ingodumu ngohino, o nyawa duru tobobaradoha nënanga. Deʼ nenanga idadi o dulada moi mangale o nyawa mata-mata, damä aha yongaku Unangika deʼ yamäke o ngango madutu deʼ ikakali.

¹⁷Ma Jou Madutu, hagala o öraha ma Koano, ipatutu hihoromati deʼ hihigiriri ka hoko genangika, hababu Unanga wokakali, himäke-mäkeua deʼ woma tëngo-tëngoka! Amin.

¹⁸Timotius, ahingohaka! O manarama nënanga ngohi tonihi gögoanoka ngonaika, hohininga aha ma Jou Madutu ai behehongika ihiado-adonoka o nabi-nabi o jemaat magoronaka imakorona Ani diri. O behehongo gënanga kiani idadi o bilaono ngonaika ani manarama maoa-oa magoronaka.

¹⁹Nomanarama de noma hijojö o ngongaku madiaika, deʼ ani hininga magoronaka itebi-tebini. Naga o nyawa yohaduliua manga hininga madobote magoronaka, hiädono iwedere toönanga manga ngongaku.

²⁰Mahi dogoronaka o Himeneus deʼ o Aleksander. O nyawa yahinoto gënanga ngohi tahukumoka de tahilapahi o Ibilihika, laʼ onanga imadotoko mangale imatogumu iwi hikauku ma Jou Madutu.