Read Tobelo O TIMOTIUS MADODIHIRAKA 2 Bible Online

O TIMOTIUS MADODIHIRAKA 2 - Tobelo bible

O TIMOTIUS MADODIHIRAKA 2

¹Mahira-hiraka, ngohi togahoko de magiria laʼ nia gogahoko, nia hubayanga, deʼ nia niata o dodohanga de o demo tarima kasi nihi ädono ma Jou Madutuika mangale o nyawa mata-mata;

²mangale o kokoano deʼ mangale o nyawa mata-mata yasösö o kuaha. Hogahoko laʼ ngone yakunu howango ho ogoro de horïdi mangale ma Jou Madutu de nanga manarama ipatu-patutu.

³Gënanga yaoa de ma Jou Madutu ai hininga yasanangi, ngone Wonahi hohalamati.

⁴Unanga womau laʼ mata-mata o nyawa wahihalamati de ihi öriki o diai.

⁵Hababu, duga-duga naga ma Jou Madutu womatëngo, deʼ duga-duga womatëngo womahi togoronauku ma Jou Madutu de o nyawa nanga hidogoronaka, enagënanga Kristus Yesus.

⁶Unanga o nyawa womatëngo wohi döakoka Ai diri mangale wahilapahi o nyawa mata-mata toönanga manga baradohaka. De gënanga ma Jou Madutu wohidumutu maöraha yakokokorona, Unanga woigo la o nyawa mata-mata wahihalamati.

⁷ Deʼ hababu gënanga ngohi ihi huloko toiki o Yahudi manyawa okaikaua mangale tohi abari onangika o abari mangale o ngongaku madiai. Ngohi tohihimanga nënanga ganga itiai, ngohi toëlukua.

⁸Ngohi tomau laʼ kiakaö dika o nyawa o nau-nauru ima niata de manga hininga itebi-tebini, koiwa o gangamo ekola o ributu.

⁹ Kokiani o nyawa o ngoheka ima päke manga diri de biaha dika deʼ imahi päke o pakeanga de ma ada-adatoka. Uha ima päke manga tadauru imadobikoka yatorou o lolegaka ekola imahi poromu o gurasi de o muhutika ekola o pakeanga ihali-hali.

¹⁰Mä, kokiani o ngoheka imapäke manga diri de o manarama maoa-oa hokä sarakia ipatutu mangale o ngoheka iwi puji-puji ma Jou Madutuika.

¹¹O ngoheka kiani imadotoko de ima rirïdi manga diri, deʼ manga hingounu.

¹²Ngohi tohi goungua o ngoheka yädotoko ekola yäpareta o nau-nauru; önanga kiani ima rirïdi.

¹³ Hababu madodihiraka iwihi dadi ganga o Adam deʼ daha ituru o ngo Hawa.

¹⁴ Deʼ ko o Adamua, mä o ngoheka imi taili hiädono matilakuru ma Jou Madutu ai pareta.

¹⁵Ngaroka hoko gënanga, o ngoheka aha mohalamati de mohidadi o ngohaka, iti münanga de ami hininga madipokouku tatapu mingaku o Kristusika, deʼ tatapu mahininga o nyawa mahomoa de ami wowango mohi taioka mangale ma Jou Madutu.