Read Tobelo O TIMOTIUS MADODIHIRAKA 3 Bible Online

O TIMOTIUS MADODIHIRAKA 3 - Tobelo bible

O TIMOTIUS MADODIHIRAKA 3

¹Igoungu itiai o demo nënanga, ”O nyawa yöigo yodadi o jemaat yototailako, yöigo o manarama moi duru de maraganeoka.”

² O nyawa moi wototailako o jemaat, o nyawa kiani koiwa ai kuranga, ngoi hekata duga-duga momatëngo, wanako watumungu ai diri, wobarija, deʼ ai datoro irahai; ünanga woigo wätarima o nyawa ai tauoka; deʼ wakunu wadotoko o nyawa;

³uha o nyawa wotoba daluku, ekola woigo imakangamo. I idulu yaino, kokiani ünanga ai hininga mabole-bole deʼ aha woigo o dame. Unanga yakunua wokal̄il̄u o tiwi.

⁴Unanga kiani wohi öriki watatoro de madiai ai tau madol̄a, deʼ wadotoko ai ngoha-ngohaka mangale manga hingounu deʼ manga horomati unangika.

⁵Hababu nako o nyawa ihi örikua yatatoro manga tau madol̄aka mahirete, sarakia ünanga wakunu watatoro ma Jou Madutu ai jemaat?

⁶O nyawa womatëngo wototailako o jemaat yakunua dahaö wo Haranino, hababu done ünanga idadi ai hininga ikurutil̄e daha wamäke o lolai hokä o Ibilihi mahira.

⁷Unanga kiani o nyawa ai romanga maoa-oa kawaha manga hidogoronaka; hababu nako hoko genangua, done o nyawa aha iwihikauku ünanga, hiädono wo otaka o Ibilihi madadagoko magoronaika.

⁸O jemaatoka yäriwo-riwo kianiö o nyawa yaoa deʼ manga hininga irikoto; wokal̄il̄ua o tiwi deʼ woigoua wokere o angguru duru koha amoko.

⁹Onanga kiani yasö ibitumu de manga hininga madobote idödodono, o Haranioka manga ngongaku madodotokika wohimato-matokoka ma Jou Madutu.

¹⁰Kiani önanga yätailako okahi ihira, deʼ nako inyata önanga koiwa manga kuranga, daha önanga yakunu yäriwo o jemaat magoronaka.

¹¹To önanga manga hekataö kiani o nyawa maoa-oa, igoungua o nyawa yoigo i hi ade-ade o demo itotiaiua. Onanga kiani ihi öriki yatumungu manga diri, deyorikoto hagala o hali magoronaka.

¹²Yariwo-riwo o jemaatoka kiani manga hekata momatëngo dika. Unanga kiani wohi öriki watatoro ai ngoha-ngohaka deʼ ai tau madol̄a de kaya oa-oa.

¹³O nyawa yäriwo-riwo irahai o jemaat magoronaka, aha yahoromati deʼ idadi iholoi yobarani yotemo-temo imakorona to önanga manga ngongaku o Kristusika.

¹⁴Ngohi tonganono i tedekanoka uaoli ngohi aha tonilega. Ngaro hoko gënanga, ngohi totulihi dika o hurata nënanga ngonaika,

¹⁵laʼ nako ngohi totedekanika, ngona nohi örikoka sarakia ngone kiani howango hokä ma Jou Madutu ai tau madol̄a manyawa, enagënanga ma Jou Madutu ai jemaat iwango-wango. O jemaat nënanga matero-tero o liate madidiki de maroriwo o dodötoko madiai ma Jou Madutuino.

¹⁶O nyawa moiuaö yakunu ihi pongono, hokokia ma amoko tongone nanga agama marahasia: Unanga womahi matoko ai diri o nyawa ma rupa ma goronaka, deʼ ihi matoko o diai ma Jou Madutu ai Womaha, de yamäke o malaekat-malaekat. Ma abari ihi boakoka o hoana iago-agomo mahi dogoronaka, deʼ Unanga iwi ngaku o dunia ingodumu deʼ iwi goraka o horogail̄e.