Read Tobelo O TIMOTIUS MADODIHIRAKA 4 Bible Online

O TIMOTIUS MADODIHIRAKA 4 - Tobelo bible

O TIMOTIUS MADODIHIRAKA 4

¹Ma Jou Madutu ai Womaha itemo ihi totararonuku maöraha aha iböa, o nyawa utu aha yodohuku, de iwihi pongono o Kristus. Onanga aha ihi ngounu o womaha yahirö rehe-rehenika, deʼ yanïki o womaha madorou madodötoko,

²ihi ngahu de madodagi o nyawa madorou de yototengeluku. Manga hininga madararono o nyawa gënanga, ihuhutuoka.

³Onanga yädotoko o nyawa, mangale uha yokawingi, deʼ yaol̄omua o inomo ihi totatapuoka. Enahioko o inomo gënanga ma Jou Madutu wohidadioka mangale yäol̄omo de yotemo tarima kasi Unangika mangale o nyawa iwi ngakuoka o Kristusika, deʼ yanakoka o dodötoko madiai ma Jou Madutuino.

⁴Hagala moi-moi ma Jou Madutu wohi dadioka gënanga yaoa, deʼ kamoiö de koiwa kiani hapulono maharamu nako hatarimaka de hotemo tarima kasi ma Jou Madutuika.

⁵Hababu o barakati ma Jou Madutuino deʼ o niata yadiai o inomo gënanga idadi i halali.

⁶Nako ngona nädotoko mata-mata gënanga o roriadodotika o ngongaku moi, ngona aha nodadi o Kristus Yesus ai leleani de nomanarama yaoa. Deʼ ngona aha gila-gila naburere ani hininga de ma Jou Madutu ai demo ngone hangongaku-ngaku, deʼ o dodötoko-do dötoko madiai ngona nanïkoka madekanino nënanga.

⁷Nomahi kurutika o ade-ade o ngongaku ipoparahaja de mabaraguna ko ö iwa-iwa. Kiani nomahibiaha ani diri mangale o puji mawowango.

⁸O hibiaha o röehe mahidoku mahuhutulu dika mafaidä, mä o hibiaha o rohani mafaidä hagala o hali magoronaka, hababu yongohamika o jaji mangale o ngango maöraha nënanga deʼ oraha aha iböböa-böa.

⁹O hali gënanga itiai deʼ kiani hätarima de hängaku itototomo.

¹⁰Hababu gënanga ngone hoparangi de homanarama hohauku, hababu ngone honganono itötotomo ma Jou Madutuika wowö wango-wangoika; Unanga Wohihö hohalamati o nyawa mata-mata, duru mal̄okuoka o nyawa yongöngaku-ngaku.

¹¹Nadotoko mata-mata gënanga deʼ nähuloko o nyawa yamoteke.

¹²Uha namal̄aika o nyawa moiö ini pulono ngona okiaua ini däene karana ngona kanomagö ikahi. I idulu yaino, kokiani ngona nodadi o dulada mangale o nyawa yongaku-ngaku ani ade-ade deʼ ani kalakuanga magoronaka, madodagi magoronaka ngona nahininga ani dodiawo o nyawa mahi dogoronaka deʼ ani ngongaku o Yesus Kristusika, deʼ ani wowango nadebi-debini.

¹³Oraha gënanga, damä ngohi hi ädono toböa, ngona kiani nagou-goungu nadabasa Ma Jou Ai Demo ma Buku o nyawaika, deʼ nähitomo de nadotoko önanga.

¹⁴Uha ngona nawohanga napäke o ngongike ma Jou Madutu ai Womahino, inihi döakoka ngonaika maöraha o jemaat matutuda-tutuda toönanga manga giama yogelengaka ani häeke mal̄okuoka, deʼ o nabi-nabi ihi adonoka ma Jou Madutu ai behehongo imakorona ani diri.

¹⁵Namanarama mata-mata gënanga de magou-goungu laʼ ani manarama mahasili yamäke o nyawa mata-mata.

¹⁶Nolega nohidodiai ani diri, deʼ nolega nohidodiaiö ani dodötoko. Kiani ngona nosetia nadiai mata-mata gënanga, hababu de hoko gënanga ngona aha nohihalamati, yaoa ani diri mahirete yaoa o nyawa inihigö gihe-gihene.