Read Tobelo O TIMOTIUS MADODIHIRAKA 5 Bible Online

O TIMOTIUS MADODIHIRAKA 5 - Tobelo bible

O TIMOTIUS MADODIHIRAKA 5

¹Uha ngona nängamo ikiria o nyawa iholoi yobaluhu de ngona, mä nihigaro ünanga wohigihene ani demo-demo matero-tero ünanga ani ama. Nadiai o gogoduru hokä ani riadodoto,

²deʼ o ngongoheka yobalu-baluhu hokä ngoni ayo. O momoholehe kiani ngona nadiai hokä ani biranga, de ani jako idödodono.

³Nahoromati o bobao-bobao igou-goungu yowango o diri ima tengokahi.

⁴Mä nako o bobao moma tëngo de tomünanga ami ngoha-ngohaka ekola ami dano-danongo, önanga gënanga madodihiraka kiani nahidöaka o mangarati, önanga kiani yahohininga toönanga manga riadodoto, deʼ yabalahi manga gogao toönanga manga dimono deʼ manga el̄e. Hababu o hali gënanga yasanangi ma Jou Madutu ai hininga.

⁵O bobao igou-goungu o diri momatëngoka, de moiua münanga yakunu imipaliara, duga-duga mïnganono ma Jou Madutuika. O hutu de o wange münanga momatogu-togumua moma niata ma Jou Madutuika mangale mogahoko Ai roriwo.

⁶Mä o bobao moigo mowango momahi sosanangi, mohonengoka ngaroka münanga kamowangohi.

⁷Nahi ädono o hidumutu-o hidumutu nënanga onangika, laʼ onanga yowango de koiwa manga kuranga.

⁸Mä nako naga o nyawa yäpaliaraua manga roriadodoto, maboboloi manga riadodoto mahirete, o nyawa gënanga ihi pongono manga ngongaku; önanga iholoi itorou ngaro de o nyawa yongaku-ngakua.

⁹Duga-duga o bobao itotomo madodagi hokä hoko nënanga yakunu ihi ngohama o bobao-bobao mabuku magoronaika: manga umuru kiani ikurangua de taongo mori butanga, mahira duga-duga mamoi mokawingi,

¹⁰imi näko hokä o ngoheka modiai o hali maoa-oa, hokä hohitotero: ami ngoha-ngohaka mä amokoka de maoa-oa, mosanangi matarima o nyawa imi adonino de ima hidodogumu ami tauoka, maleleani o nyawa yongaku-ngaku, mariwo o nyawa yohuhuha, deʼ madiai dema gou-goungu hagala marupa o manarama maoa-oa.

¹¹Uha nohingohama o buku magoronaika gënanga o bobao-bobao kayagö gö ohi. Hababu nako önanga yamäo manga nahihu idadi duru kohakuata, önanga yomau yokawingoli, deʼ iwi mal̄aka o Kristus.

¹²Ma önanga yahowono hababu yatiaiua manga jaji yahi döa-döakoka onangika.

¹³Hoko genangoli önanga yaumo-umo öraha de yohupu yowohama o nyawa manga tau. Deʼ iholoi itorouoli, enagënanga önanga imadotoko yadadi dorou o nyawa mahomoa manga romanga deʼ yaganu-ganu o nyawa manga hali de ihi ade-ade o hali-o hali ipopatu-patutua ihi ade-ade.

¹⁴Hababu gënanga ngohi tomau hupaya o bobao-bobao magö yokawingoli, yamäke o ngohaka deʼ yatatoro manga tau madol̄a, laʼ nanga haturu imä mäkeua öraha mangale yadadi dorou tongone nanga romanga.

¹⁵Hababu naga o bobao-bobao yorehenoka yanïki o womaha madorou.

¹⁶Mä nako o ngoheka o Haranioka momatëngo tomünanga ami tau madol̄aka yodadioka yofäo, münanga kiani mariwo o bobao-bobao gënanga; uha mamal̄aika o jemaat yätagongo önanga. De hoko gënanga o jemaat yakunu yariwo o bobao-bobao nako manga dutu duru komoi okaua.

¹⁷O jemaat matutuda yadiai manga manarama de madiai, kiani yahidöaka o horomati o lape hinoto, de duru mal̄okuoka önanga yamomagawe yoriwayati deʼ yodotoko.

¹⁸ Hababu Ma Jou Ai Demo ma Buku magoronaka itulihi, ”O hapi magogiria yadoko-doko o gandum mangale yarero o gandum mamui magobe oka, mauru uha nia aro-aro”, hoko genangoli, ”O nyawa yomanarama, yakunu yatarima manga hewa”.

¹⁹ Uha nia tarima o galaki o jemaat matutuda womatëngoika, sowaliua nako ihi kuata mangale o nyawa yoho hakihi yahinoto ekola iholoi.

²⁰O nyawa yodiai o baradoha, kokiani nia hidaaëre o jemaat yongodumu manga himangoka, laʼ mahomoa idadi yohawana.

²¹Ma Jou Madutu, o Kristus Yesus manga himangoka, deʼ o malaekat-malaekat yairi-irikoka, ngohi togahoko de magiria laʼ ngona namoteke o hidumutu-o hidumutu nënanga koiwa ani takihiri o nagonaikaö, deʼ koiwa natingaka de nafara.

²²Uha kalioli itaiti nogelenga ani giama o nyawa moi-moi manga l̄okuoka mangale nahitatapu nägoraka hokä ma Jou iwilö leleani. Nako o nyawa mahomoa yobaradoha, uha nanïki ini hidiliko o baradoha gënanga magoronaka. Nogöana ani diri laʼ tatapu idodono.

²³Uhali kao akere dika nokere; nokerö o angguru mahuhutulu mangale nohiriwo ani inomo mangengedere, hababu mamoi-mamoi ngona nopanyake.

²⁴O nyawa o hidoku moi yobaradoha, yatailakouahi, yamäkeoka de madiai. Mä o nyawa mahomoa manga baradoha ipahaino daha ihi öriki.

²⁵Hoko genangö o manarama-o manarama maoa-oa gila-gila yamäke. Deʼ ngaroka igapangua yamäke koi yakunua gila-gila i iunu.