Read Tobelo O TIMOTIUS MAHINOTOKA 1 Bible Online

O TIMOTIUS MAHINOTOKA 1 - Tobelo bible

O TIMOTIUS MAHINOTOKA 1

¹ Timotius, ahingohaka tonihohininga! Ngohi, o Paulus totulihi o hurata nënanga ngonaika, deʼ tönganono tanu ma Jou Madutu o Ama tongone nanga Jou Kristus Yesus wonihidöaka Ai barakati, Ai hayanga de Ai dora deʼ Ai lolä ngonaika. Mangale de ma Jou Madutu ai mau, ngohi wohigorakoka todadi o Kristus Yesus ai rasul deʼ wohihuloko mangale tohi ngahu mangale o ngango ma Jou Madutu wohi jäjajioka. O ngango gënanga ngone hatarima karana horimoi de o Kristus Yesus.

³Ngohi totemo tarima kasi ma Jou Madutuika ngohi tileleani de ahi hininga madobote itotararono de itebi-tebini, hokä mahira yadiai tongohi ahi ete de ahi tohora. Ngohi hoko genangika totemo tarima kasi ma Jou Madutuika, öraha mahigetongo tonihininga ngona ahi niata magoronaka, yaoao wange yaoaö o hutu.

⁴Ngohi tohininga ani hininga mahuha. Hababu gënanga ngohi duru toigo homamäke dede ngona laʼ ngohi yakunu idadi igou-goungu tomörene.

⁵ Ngohi tohininga ani ngongaku magou-goungu o Kristusika, hokä imatero manga ngongaku ngoni el̄e o ngo Lois deʼ ngoni ayo o ngo Eunike. Deʼ ngohi tongaku ngonaö ani ngongaku hokä hokogënanga.

⁶Hababu gënanga ngohi tonihidöaka ngona o hohininga mangale nohiwango o ngongike ma Jou Madutu wonihi döa-döakoka ngonaika maöraha ngohi togelenga ahi giama ani l̄okuoka.

⁷Hababu ma Jou Madutu ai Womaha wonahi döaka ngoneino, igoungua o Womaha inadiai ngone idadi hohawana. Ilio yaino ma Jou Madutu ai Womaha gënanga inadiai ngone idadi hokuata, iomanga de o dora deʼ hakunu nanga diri hatumungu.

⁸Hababu gënanga uha inimal̄eke nohidöaka o hakihi mangale tongone nanga Jou, deʼ uhaö ini mal̄eke imakorona ngohi, ihi buika karana Unanga. Ilio yaino, kiani ngona de ma Jou Madutuino ai kuata, no moteke nohangihara mangale o Abari ma Oa gënanga.

⁹Ma Jou Madutu wona hihalamati deʼ wona ahoko ngone laʼ ngone hodadi Ai umati mahirete. Unanga wodiai gënanga igoungua matiti okia ngone hamo manaramoka, mä matiti Ai datoro mahirete deʼ Ai hayanga de Ai dora itötotomo. Unanga wonahi döaka ngoneino Ai hayanga de Ai dora i tilakuru o Kristus Yesus, o dunia nënanga kaidadiö de kowahi.

¹⁰Deʼ oraha nënanga, ma Jou Madutu wohi dumutu Ai hayanga de Ai dora i tötotomo gënanga ngoneino, de Ai böa tongone nanga Koano Wohi hohalamati o Kristus Yesus. O Kristus wautumoka o honenge makuaha deʼ woao o ngango ikokakali itilakuru o Abari ma Oa gënanga.

¹¹ Mangale tohingahu o Abari ma Oa gënanga ma Jou Madutu wohigoraka ngohi todadi o rasul deʼ o guru.

¹²Hababu gënanga ngohi tatagongo mata-mata nënanga, mä ngohi tatapu tongaku, hababu ngohi tohi öriki de madiai o nagona ngohi tängaku. Ngohi tongaku okia Unanga wohihi ngongakuoka ngohino, Unangö wakunu wögöana hiädono o Kiamati ma Wange.

¹³Nanïki dema gou-goungu o dodötoko madiai ngohi tonihi döa-döakoka ngonaika. Deʼ kokiani ngona tatapu näsö o ngongakuika deʼ o dora idadi tongone madutu, karana horimoi de o Kristus Yesus.

¹⁴De ma Jou Madutu ai Womaha ma roriwo iwango ngoneoka, kiani ngona nogöana nohidodiai o hali-o hali maroraganeoka, inihi ngongakuoka ngonaika.

¹⁵Ngona nohi öriki o nyawa mata-mata o Asia ma daeraka ihi mal̄aka ngohi, yodogoikaö o Figelus deʼ o Hermogenes.

¹⁶Mä o Onesiforus ai tau madol̄a ihigali muruono naga iböto yamörene tongohi ahi hininga. Tanu ma Jou woigo wohidumutu Ai dora de Ai hayangi onangika. Ngaroka ngohi o bui magoronaka, o Onesiforus aha iwi mal̄ekua tongohi ahi hali gënanga.

¹⁷Kade womahi ädono o Romaka, gila-gila ünanga wohidailako wohilingiri ngohi, hiädono ünanga mimamäke dede ngohi.

¹⁸Deʼ ngona nohi öriki o Efesusoka hara mangöe ünanga wohiriwo ngohi. Tanu ma Jou wohidumutu Ai dora de Ai hayangi unangika, ma wange o Jou watailako o nyawa o umati yongodumu.