Read Tobelo O TIMOTIUS MAHINOTOKA 2 Bible Online

O TIMOTIUS MAHINOTOKA 2 - Tobelo bible

O TIMOTIUS MAHINOTOKA 2

¹Timotius, ahingohaka! Kiani ngona nokuaha de o dora de o hayangi itotomo inahi döa-döaka ngoneino, karana ngone horimoi de o Kristus Yesus.

²O dodötoko mahira ngona noihenoka ngohino o nyawa yowöe-wöe manga himangoka, kiani ngona nahingongaku o nyawaika yakunu yangaku deʼ yosawaro yadotoko o nyawa mahomoa.

³Ngona kiani nonïki natagongo o hangihara hokä o Kristus Yesus ai tentara wososetia.

⁴O tentaraoka womatëngo magogiriaka womanarama, aha wotasibua ai diri de wohidailako ai diri mahirete, hababu ünanga woigo ai kapita ai hininga wasanangi.

⁵Womatëngo woigo wohibiaha ai röehe ikuata aha wodadiua mahimangoka o rorebe moi magoronaka, nako ünanga wamotekua madatoro-madatoro.

⁶Yototumule yomanarama imahi kokangelaka, önanga manga haku madodihiraka yamäke yodato-datomo mahasili.

⁷Natibanga naluku-luku okia ngohi tohihimangoka gënanga, hababu ma Jou aha wonihi döaka ngonaika mangale nakunu nomangarati mata-mata.

⁸Nohininga nënanga: O Abari ma Oa ngohi tohi ngahu-ngahu gënanga ganga o abari mangale o Yesus Kristus, o Daud ai difauku; Unanga o Kristus wowangokali o honengino.

⁹Karana tohingahu o Abari ma Oa gënanga, ngohi tatagongo o hangihara; iholoi idogo hiädono ihi rante hokä o nyawa madorou moi. Mä ma Jou Madutu ai demo yakunua yaliko de o rante.

¹⁰Hababu gënanga ngohi totongohono tatagongo o hangihara mata-mata gënanga mangale manga paralu o nyawa wairi-irikoka ma Jou Madutu, laʼ onanga yamäke o halamati wahidöaka itilakuru o Kristus Yesus, deʼ ima nïki o mulia ikokakali.

¹¹I goungu itiai o demo nënanga, ”Nako ngone hohonengoka homakinïki dede Unanga, ngone aha howango homakinïki dede Unanga.

¹² Nako ngone hotatapu hotongohono, ngone ö aha hopareta homakinïki dede Unanga. Nako ngone hihipongono Unanga, Unangö aha wonahipongono ngone.

¹³Nako ngone hosetiaua, Unanga tatapu wosetia, hababu Unanga wakunua walawani Ai diri mahirete.”

¹⁴Kiani ngona nahidöaka o hohininga o nyawa mangale mata-mata nënanga. Ma Jou Madutu ai himangoka, nahitiari önanga laʼ uha imateke ributu mangale o demo-o demo kabiahaua. Gënanga koiwa mabaraguna, ma iholoi idogo duga-duga yaruae o nyawa manga gogihene.

¹⁵Kiani ngona nohi dailako nagou-goungu laʼ woni nako ma Jou Madutu hokä o nyawa i patu-patutu yomanarama Unangika. Nohidailako laʼ ngona koini mal̄ekua imakorona ani manarama, mä duga-duga nadotoko de madiai o dodötoko-o dodötoko madiai ma Jou Madutuino.

¹⁶Nomahi kurutika o ade-ade koiwa-iwa mabaraguna deʼ iwi hikauku ma Jou Madutu. O ade-ade hokä hoko gënanga duga-duga yadiai o nyawa iholoi itorou.

¹⁷O nyawa manga dodötoko itahe hokä o panyake o totengedere ibiha-biha. Toönanga manga hidogoronaka yodogoika o Himeneus deʼ o Filetus.

¹⁸Onanga yorehenoka deo dodötoko madiai, deʼ yaruae o nyawa utu manga ngongaku. Onanga yotemo, o momiki o honengino idadioka.

¹⁹ Mä o hohol̄e ipo puturungu ma Jou Madutu wadodiai yakunua yagiwi. Mal̄okuoka itulihi nënanga, ”Ma Jou wänako to Unanga ai nyawa”, deʼ ”O nyawa yotemo önanga toma Jou, o nyawa gënanga kiani imatogumu yodiai o manarama ihowo-howono”.

²⁰O tau ma amoko magoronaka hamäke irupa-rupa mapakakaha. Naga yadiai o haäkaino ekola o gurasi, mä nagaö o gotaino ekola o tonaka. Naga ihi päke mangale iparalu irorahaika, deʼ nagaö yapäke mangale maparalu biaha.

²¹O nyawa ima tebini manga diri mata-mata itotorouino, o nyawa gënanga aha yapäke mangale irorahaika. Unanga wodadi madutu woma dinga-dingakoka deʼ wobaraguna mangale ai tuangika. Unanga iwi hi diai oka mangale iwi päke moi-moi o manarama maoa-oa.

²²Nomahi kurutika o nyawa yogogoduru manga sanangi. Nohidailako mangale nowango imamoteke ma Jou Madutu ai mau, nosetia Ai dodotokika deʼ nahininga ani dodiawo, de imanïki tongona ani hininga irirïdi. Hoko gënanga nowango dede önanga imahi boaka yogahoko o roriwo ma Jouika de manga hininga idodono.

²³Uha nanïki o nyawa bodo manga ributu magoronaka, kokia-kiaua ihi öriki. Ngona nohi öriki mata-mata gënanga ihi puda duga-duga o gangamo.

²⁴O nyawa yomanarama mangale ma Jou ipatutua ima kokangamo; ünanga kiani woigo wododiawo o nyawa mata-mataika, deʼ wakunu wadotoko o nyawa iyaoa deʼ ai sabari.

²⁵Unanga kiani de ai hininga mabole-bole wadotoko o nyawa yoigo yotoba lawani; tanu ma Jou Madutu wahidöaka o öraha o nyawaika gënanga mangale önanga i bötohi yodiai o baradoha deʼ yanako o dodötoko madiai.

²⁶De hoko gënanga önanga idadi ima todokanokali, deʼ yolapahioka o Ibilihi madadagokoka yautumoka önanga deʼ yapakisa önanga yanïki mamau.