Read Tobelo O TIMOTIUS MAHINOTOKA 3 Bible Online

O TIMOTIUS MAHINOTOKA 3 - Tobelo bible

O TIMOTIUS MAHINOTOKA 3

¹Nohininga nënanga: O wange mabobahaka aha naga o huha kohangöe.

²O nyawa aha yohininga manga diri mahirete, yokal̄il̄u o tiwi, ima hil̄e, deʼ yoigo yotemo-temo koiwa magoungu. Onanga yoigo yahikauku o nyawa, yota lawani manga dimonika, yanakoua yotarima kasi, deʼ yolega ikaua o rohani.

³Onanga yahiningaua manga dodiawo, yoluku yahi apongo, önanga yoigo yadadi o dorou o nyawa mahomoa manga romanga, yoigo yapäke o pakisa, koiwa manga hayangi, deʼ yoigoua o oa-oa.

⁴Onanga yosetiaua, yoedenge, deʼ yatibanga ikurutua. Onanga yoigo iholoi, o dunia makaramata de ngaro iwi moteke ma Jou Madutu.

⁵Ngaroka madodagi maporetino, önanga ihi ngounu ihidagi o agama mamau-mau, mä yatila o agamaino matiti mahirete gënanga. Nomahi tingaka o nyawa hokä hoko gënanga.

⁶Naga toönanga manga hidogoronaka yowohama o tau-tauika, daha manga hininga yadäene o ngongoheka ima sosikaua manga baradoha duruhe kohä amoko deʼ yakuaha irupa-rupa o nahihu.

⁷O ngongoheka gënanga ima togu-togumua yogahoko yadotoko, mä komaiwahi yakunu yanako o dodötoko madiai ma Jou Madutuino.

⁸ Hokä sarakia mahira o Yanes deʼ o Yambres iwi lawani o Musa, hoko genangö o nyawa geönanga yalawani o dodötoko ma Jou Madutuino. To önanga manga dibanga itorouoka, deʼ to önanga manga ngongaku itirïoka.

⁹Mä onanga aha okia-kiaua yamäke, hababu toönanga manga bodo aha ihi öriki mata-mata o nyawa, hokä yamäke ö o Yanes deʼ o Yambres.

¹⁰Mä ngona nanïkoka ahi dodötoko-dodötoko, tongohi ahi kalakuanga, deʼ ahi ngango madumutu. Ngona mahirete namäkeoka sarakia ngohi tagou-goungu tingaku o Yesus Kristusika, deʼ tahininga ahi dodiawo o nyawa. Ngonaö nohi öriki ahi sabari de ahi dongohono.

¹¹ Ngona namäkeoka ngohi ihi aniaya deʼ ngohi tatagongo. Ngona nohi öriki mata-mata idadioka ngohino o Antiokhia madaeraoka, o Ikoniumoka, deʼ o Listraoka; deʼ ngona nohi öriki mata-mata ngohi tatagongo! Mä ma Jou wohihihalamatioka ngohi mata-mataino gënanga.

¹²Igoungu o nyawa mata-mata yomau yowango yopuji deʼ yowango yorimoi de o Kristus Yesus aha ya aniaya,

¹³mä o nyawa madorou deʼ o nyawa yotipu-tipu aha iholoi manga dorou. Onanga yatipu o nyawa mahomoa enahioko önanga mahireteö maya tipu dika.

¹⁴Mä mangale ngona, Timotius, ngona kiani nomahi jöjö ikekete o dodötoko-o dodötoko madiai ika ini doto-dotokoka ngonaika, deʼ ngona nangaku ingodumu; hababu ngona nohi öriki o nagona ani guru-guru.

¹⁵Ngona kiani nohininga kani ete-etekohi ngona nänakoka Ma Jou Ai Demo ma Buku. Ma Jou Ai Demo ma Buku gënanga yakunu inihi döaka o mangarati ngonaika, mangale namäke o halamati itilakuru nia ngongaku o Kristus Yesusika.

¹⁶Mata-mata itulihi Ma Jou Ai Demo ma Buku magoronaka, de ma Jou Madutu ai tutuda, de mabaraguna mangale yädotoko o diai, mangale yahidaaere, deʼ yatiai ihöhowo-howono, deʼ mangale yadotoko o nyawa hupaya yowango i mamoteke ma Jou Madutu ai mau.

¹⁷De Ma Jou Ai Demo ma Buku gënanga o nyawa iwi leleani ma Jou Madutu yakunu yadongodumu itötotomo, mangale hagala marupa o manarama maoa-oa.